تخيل وفاة الريس

[hero]

السلام عليكم ورحمة الله وبركاته

إلتفتت الأسرة حول فراش الزعيم وهو يلفظ أنفاسه الأخيرة

قال الزعيم بصوت ضعيف ولكنه حازم فى نفس الوقت

حسنى: كلكم موجودين
سوزان: أيوه ياحسنى ... أنا جنبك أهه ... وأدى جمال وعلاء ... قمرين دول ولا عينين

حسنى: طب إسمعوا اللى حقوله كويس
جمال: سامعينك يابابا ... إتكلم
حسنى: مصر دى كنز ياولاد ... إمكسوا فيها بإيديكم وسنانكم ... بنسرق فيها بقالنا سنين وسنين ولسه بتدينا
علاء: هيا دى البركة اللى بيقولوا عليها يابابا
حسنى: أيوه يابنى .... ربنا يبارك لكم ولعيالكم فيها ... ودلوقتى إسمعونى
علاء: إنته على الهوى يابابا ... إتكلم
حسنى: أنا مش مديون لحد ياولاد ... يعنى أى واحد يصيع عليكم ويقول لكم أبوكم كان مستلف منى فلوس تفوا فى وشه على طول
علاء: إطمن يابابا ... حرامى على حرامى ما يلعبش
حسنى: أنا سيبت لكم ياولاد اللى يكفيكم إنتوا وعيالكم وعيال عيالكم ويفيض ... فلوس متلتلة متتعدش ... مش حقول لكم حافظوا عليها وبس ... لآلآلآلآ ... زودوها كمان وكمان لجل ما روحى ترتاح وأنا فى تربتى
جمال: هيا الفلوس اللى إنته عملتها يابابا دى بتسميها فلوس شفنى أنا وعلاء حنعمل إيه .... ولا صحيح حتشوفنا إزاى عموماً ما تقلقش
حسنى: ودلوقتى إسمعوا وصيتى ..... الحكم لأولاد مبارك ... لازم أول ما جمال يحلف اليمين تغيروا إسم مصر وترجعوه زى ما كان زمان أيام الملك فاروق( والملكة نازلى (المملكةالمصرية
جمال: مفهوم يابابا ... خش فى اللى بعده
حسنى: الجيش والشرطة والأزهر ... أوعوا واحد من التلاته دول يخرج عن طوعكم أبداً
علاء: مفهوم برده ... اللى بعده .... ياساتر ده إنته ملل
سوزان: عيب ياعلاء لما تكلم أبوك كده
علاء: بهزر ياماما
حسنى: الهرم لأم العيال ... ليكى ياسوزان بعد ما خدمتينى بتفانى وإخلاص طول السنين دى
سوزان: هرم !!!!!!! .... هيا دى آخرة صبرى !!! ...... وده يسوى كام ده
علاء وهو يمسك بالألة الحاسبة : يسوى كتير ياماما ... لو تحبى أتصرف لك فيه ممكن يعمل معاكى مبلغ كويس
سوزان: مش حرضى باأقل من التلات أهرامات وأبو الهول
حسنى: مش خسارة فيكى ياغالية .... أثار النوبة لعلاء .... والأقصر لجمال ... ودلوقتى نيجى للميه ... الساحل الشمالى لعلاء والبحر الأحمر لجمال وقناة السويس تخصصوا دخلها صدقة جارية على روحى
سوزان: إنته أكيد مخبول ... مليار ونص دولار صدقة جارية على روحك
جمال: ما تاخديش على كلامه ياماما .... ده يبقى كتير لو طلعنا 100 ولا 200 جنيه على روحه
علاء وهو يمسك بالألة الحاسبة: ممكن نطلع لحد ألف جنيه ياجمال ... السيولة تسمح
حسنى: أوعوا تفرطوا فى حبيب العادلى من بعدى ياولاد ولو مشى رجعوه تانى ... حبيب قلبه ميت وإيده طرشه ... وهوه ده اللى ينفع مع الغجر اللى هنا
جمال: بس ما بيعجبنيش شنبه يابابا
حسنى: إنته مالك ومال أم شنبه ..... إحنا بنشترى مجرم
جمال: أعاهدك يابابا إنى حخليه معايا ومش حفرط فيه أبداً
حسنى: الشيخ طنطاوى ياولاد راجل بركة ..... يمين يمين شمال شمال ..... أوعوا تفرطوا فيه ولو حصل وفرطت فيه غصب عنى فى يوم حاولوا ترجعوه تانى ..... بس ما تخلوهوش يصلى عليا لأنى بصراحة مش متأكد إن كان ربنا حيقبل منه ولا لأ
علاء: ولا يهمك يابابا .... حخلى أنكل كمال الشاذلى يصلى عليك
حسنى: والله لو عملتها ياعلاء لكون متبرى منك إلى يوم الدين
علاء: بهزر معاك يابابا ..... أنكل كمال مش حافظ الفاتحة
حسنى: المشير طنطاوى ياولاد ..... مش حوصيكم عليه ..... الراجل ده عامل زى الست المستحية .... حاطط وشه فى الأرض على طول وعمره ما استجرى يرفع عينه فيا ... وفى نفس الوقت ماسك الجيش بإيد من حديد
سوزان: هوه فعلاً خجول وكل ما يشوفنى ما يقوليش غير ياست هانم .... إبقى خليه معاك ياجمال
جمال: حاضر ياماما
حسنى: عايز جنازتى ياولاد الناس تحكى وتتحاكى عنها ...... هاتوا المخرج الإيطالى ده اللى إسمه مكافيللى يصورها
علاء وهو يمسك بالألة الحاسبة: هوه حيكلفنا كتير ... لكن ممكن فى الأخر نلم مبلغ معقول لو خلينا شركة أجنبية تحتكر حق توزيع الفيديو فى أوروبا وأمريكا
حسنى: عايز أحلى مدفع يشيل النعش ياولاد
جمال: مدفع رشاش
سوزان: الهزار مش فى الحاجات دى ياجمال
جمال: آسف ياماما
حسنى: عايز أدفن فى شرم الشيخ ياولاد جنب أولمرت وشارون
علاء: بلاش كفر مصيلحة يعنى
حسنى: لأ كلها براغيت ياعلاء .... وإسم شرم الشيخ كمان أشيك بكتير

[sinderella]

هههههه حلوه يا هيرو بس ...تقريبا انت مزودها شويه يعني يا عالم الي هيجي بعد الرئيس حسني مبارك ده هيبقى شكله ايه عموما تسلم ايدك

[مونه]

أيوه أيوه أيوه
وسع وسع وسع
بسمة مصرواى وصل بنكته
أيوه كده يا عم عايزينك
على طول كده تبقى فرش

[دره]

لا جمال مش هيمسك الحكم هه
وياريت ياهيرو لما الراجل ده يتكل تبقى تفرحنى
وموضوع رائع كالعاده منك

[كناريا]

انا مش عارف ازاى الاصدقاء بيسخرو على رمز من رموز مصر المحرزسة وياريت كل واحد يصلح من نفسة الاول وهتبقى مصر من احسن دول العالم

[محمود سمير]

والله ياهيرو موضوعك جميل بس انا رايى ان جمال يمسك لانه شخصية شبابية يقدر يتفهم طبيعة الشباب المصرى وغير كده ياعم هو احسن من ناس كتير متعرفش حاجه عن البلد وجين يرشحوا نفسهم على الاقل هو عايش الواقع معانا وعارف مشاكل البلد

[عمر خورشيد]

كلام جامد أوي يا هيرو ..

خاف على نفسك بقى من دلوقتي وما تدخلش الكافية كتير علشان أنا هابلغ عنك اللي ميتسموش وهتروح ورا الشمس ونشوفك بقى بعد عمر طويل يا هيرو ..!!

ههههههههه ههههههههههه هههههههههه

ولا يهمك يا معلم تسلم أيدك على الكلام الجامد ده ..

[عفريتـــة هانم]

الراجـــل دة بيقـــول كلام زى الفـــل كـــنت فاكرة انا يا هيـــرو من شــوية انى كنت بقولك اختك مـــرام انســـى الموضوع دة انا شيلــــتة من تاريــخى اصلا هههههههههه ياعم انا عايزانى عيش انت وهبقى اطمن عليك وقت تانى

[دره]

للاخ كناريا وللاخ محمود سمير رمز الدوله يعنى اه يعنى اللى بيقتل الناس بالبطئ ولا انتو مش بتشوفو بهدله الناس واللى بيحصل ليهم ولا الارف اللى الناس عايشاه ابقو اتفرجو على برنامج واحد من الناس وشوفو مناظر الناس واقرئو عن تاريخ عمر بن الخطاب
ويعنى اه جمال قريب من الشباب يعنى اه انا قريبه من حد هو لو سنه قريب من سنى يبقى قريب ولا لو حاسس بحالى يبقى قريب منى
وبعدين اللى بيحصل لمصر كتاب مفتوح يعنى اللى بره بيشوف مش غايب يعنى من الاخر مصر بقت منفتحه بطريقه تفضح
وحسبى الله ونعم الوكيل فى من ظلمنا

[براكودا]