أبو التفانين الرايق

[SCREEM]

ابو التفانين الرايق


الحكومة الذكيه تملك قدرة عجيبه على أبتداع الغريب والنادر من القوانين والأساليب الملتويه.. والذى يفنن لها أستاذ متمرس ومعلم على حق.. وصاحب مدرسه مزاج عالى قوى .. يعلى الطاسة ويطلع بكل نادره ونصيبه لاعين رأت ولا أذن سمعت ولا خطرت على قلب بشر

- حاولت أن أحصى عدد التفانين والألاعيب التى أفتكسها فى العشر سنوات الأخيره وأحللها فوصلت لنتيجه مفداها بأنه ولد ماجبتوش ولاده ولا تقولى هتشكوك ولاغيره من مخرجى أفلام الأكشن فى هوليود

- وما على الحكومة ألا أن تضع أمامه المشكله وتتركه يخترع لها الحل السحرى الذى لا يصد ولا يرد .. وهو من فوره يقوم بتوليع محميتين وشادد النفسين ويسرح فى المشكله لحد مايجيب قرارها ويجعل الباطل صحيح أو العكس

- آخر تفانين قام بها أبو التفانين عندما طلبت منه الحكومة التخلص من النائب المشاغب مصطفى بكرى

يذهب له مندوب الحكومه فى مقره الخاص بعزبته على الطريق الصحراوى

مندوب الحكومه : شوف لنا يا أبو التفانين حل فى مصطفى بكرى نائب حلوان ومايو

- عايزين تعملوا أيه بالظبط .. حادث قضاء وقدر ..ولا فضيحة ماليه .. ولا فضيحة أخلاقيه ..ولا أرهاب ..ولا تهرب ضريبى ..ولا تمويل من الخارج

- لالا يا أبو التفانين الجدع ليه شعبيه وماينفعش القتل .. وماهواش موظف حكومى أو تاجر.. وماشى دوغرى ومالوش فى سكة النسوان .. ومالوش دعوه بالأخوان .. وبيدفع ضرايبه على داير مليم..شد حيلك كده وولع وشد حاكم أنا جايبلك صنف أكسترا من بتاع رجال الأعمال ماركة ضيعنا ضيعنا.. شعللها شعللها

( يحلق أبو التفانين مع الدخان الأزرق حتى يتوقف عن شد الأنفاس )

أبو التفانين : بتقول مش نافعه معاه الطرق القديمه ..وبتقول أنه نائب وله كرسى فى البرلمان وعامل قلق للحكومه .. تاهت ولقيناها.. نشيل الكرسى بتاعه أللى مخليه بيتنطط عليكم

مندوب الحكومه : أنت أتسطلت ياجدع يظهر أن مالكش فى الأصناف النضيفه

- أتسطلت ده أيه ..أنت أللى مخك تعبان زى أللى مشغلينك .. أفهمك وأمرى لله ولو مافهمتش أبعت حد كبير افهمه

- قول بس وبلاش لماضه .. نشيل الكرسى أزاى .. ماهو حيقعد جنب أى حد أو يطلب كرسى من البوفيه وكمان البرلمان دكك مش كراسى

- مش قولت لك أنك مخك ضلم مش حتفهم .. أقول وأمرى لله بس أرمى بياضك

- رمينا بياضنا أنت مابتشبعش ياجدع ..

- يعنى أللى مشغلينك شبعوا.. شوف ياسيدى وما سيدك ألا أنا .. مش مجلس الشعب داخل على أنتخابات .. ألغوا الدايره بتاعته أللى عامل بيها قمع ويفرجنا حيعرف يرشح نفسه أزاى

- يعنى أقول للمسؤلين أبو التفانين بيقول ألغوا دايرة مصطفى بكرى .. طب أزاى مش حتبقى حركة مهروشه والناس حتفهمها

- كله بالقانون ياحمار ..

- حنقل أدبنا ولا أيه يا ابو التفانين أتلم ولا

- ولا أيه .. شوف لكم واحد تانى يفنن لكم وأنا أقطع دراعى مش حتعدى عليكم السنه وتكونوا متعلقين من رجليكم من أول الطويل قوى لحد القصير قوى

- قول ياخويا من غير قلة أدب .. طب ولع كمان محميتين .. ولعنا

- شوف ياسيدى بلغ البيه الكبير وقوله أخوك أبو التفانين بيقولك تطلع قانون ينظم الدوائر الأنتخابيه دلوفتى حالا والدايره أللى عامله قلق يلغيها أو يدخلها مع دايره تانيه يكون أيديكم طايله فيها .. وقوله يتعمل القانون ده فى السر ويتوافق عليه بكره الصبح وأنتوا عندكم ترزية القوانين أيديهم تتلف فى حرير عندك الأسطى سرور والأسطى شهاب أمنتك أمانه أنك تسلم لى عليهم .. قول بس للأسطى سرور اللى بقولك عليه هو الوحيد أللى حيفهم يلعبها أزاى

( يحضر مندوب الحكومه بعدها بيومين لأبو التفانين وهو منزعج )

- فيه أيه تانى ..- عملنا زى ماقولت بس النائب عامل أعتصام فى مجلس الشعب وأضراب عن الطعام

- وأيه يعنى أنتم بيهمكم الكلام ده .. حييجى أيه فى المئات أللى نايمين على رصيف المجلس ومضربين عن الطعام .. سيبوه يتعذب شويه علشان تعرفوا تروضوه وفى الأخر أوعدوه بدخول المجلس فى الدوره الجايه .. وعد حكومى من أياه .. فى الكليتش

وسلم لى على زعيم الأغلبيه .. وقوله أبو التفانين مستنيك قريب حتجيله حتجيله

- يا أبن الأيه يا أبو التفانين الحكومه المفروض تعملك تمثال أو تعينك فى منصب كبير

- قوم ياض ضيعت الحجرين من دماغى تتك البلا ء ثم البلا .. منصب وتمثال أيه يا أهبل أنت عايزنى أتعلق من رجليا زيكم

- تسلم دماغك المتكلفه .. بقولك أيه يا ابو التفانين يا خويا تفتكر الجدع أللى أسمه البرادعى وأللى معاه حيقدر يرشح نفسه لرئاسة الجمهورية

- مش بقولك أنك مخك ضلم.. ده لو شاف حلمة ودنه يا حبيبى هو ولا غيره .. خطة أبو التفانين عندكم من زمان متظبطه ومتسنتره على الأستاذ وماحدش يقدر يقول تلت التلاته كام سواء بره أو جوه .. أنت بتسأل ليه فى الموضوع ده

- قلبى بيكالنى وخايف كلام البرادعى يتحقق ونروح كلنا فى شربة ميه يا أبو التفانين

- برادعى مين وبتاع مين العمليه أنا محزمها كويس عمرك شوفت فقرة فى أى دستور فى الدنيا تتكتب فى صفحة ونص .. العبد لله أللى عملها وأتطلعت فى الدستور أبو مين أللى يعرف يغيرها .. ألا إذا .. ألا إذا

- ألا إذا ايه قول وقعت قلبى ..- طب هات ودنك لما أقولك .. الحيطان لها ودان

- ياعم تف من بؤك .. فال الله ولا فالك يبقى ده قدر ربنا بقى مالوش دخل بالتفانين

[دره]

يا عم دول ناس مخهم اكبر من كده مش محتاجين تفانين
دول اللى بدعو الفن نفسف فما بالك بالتفنين
والله انت اللى محتاجلك تفنينه علشان تكتب عن الناس الشريفه تانى

[SCREEM]

يا عم دول ناس مخهم اكبر من كده مش محتاجين تفانين
دول اللى بدعو الفن نفسف فما بالك بالتفنين
والله انت اللى محتاجلك تفنينه علشان تكتب عن الناس الشريفه تانى

ولا مخهم اكبر من كده ولا حاجه انا بس حبيت اوريكي الناس الشريفه بيعملو فيها ايه وبعدين منا بكتب عن الناس الشريفه هو مصطفي بكري ده مش شريف ولا ايه

الف شكر لمرورك

[ايسل]

يالهوىىىىىىىىى

واحنا دايخين على الحشيش وبنقول اختفى اتارى ابو التفانين من كتر البلاوى اللى رمياها عليه الحكومه جامع الحشيش اللى فى البلد والبلاد المجاوره علشان يفنن فى الخراب والنصايب
بتاعتهم اسمع سكريم خلاص مفيش فايده الاول كانوا بيشتغلوا فى الخباثه ومن غير ما يبانوا دلوقتى بقوا بجحين علشان عرفوا اخرنا ايه ولا حاجه غير اننا نقعد نستنى الدخان اللى خارج من ابو التفانين علشان نشموا
شكرا ياحاج على الموضوع

[SCREEM]

يالهوىىىىىىىىى

واحنا دايخين على الحشيش وبنقول اختفى اتارى ابو التفانين من كتر البلاوى اللى رمياها عليه الحكومه جامع الحشيش اللى فى البلد والبلاد المجاوره علشان يفنن فى الخراب والنصايب
بتاعتهم اسمع سكريم خلاص مفيش فايده الاول كانوا بيشتغلوا فى الخباثه ومن غير ما يبانوا دلوقتى بقوا بجحين علشان عرفوا اخرنا ايه ولا حاجه غير اننا نقعد نستنى الدخان اللى خارج من ابو التفانين علشان نشموا
شكرا ياحاج على الموضوع

مش لازم الراجل يعدل دماغه امال يفنن اذاي

والله بصي ف الخباثه او علي العلن مش هتفرق بس الواحد مينكرش ان في ناس كتير زي ابو التفانين وغيره كلاب الحكومه وكل شغلتهم زي ابو التفانين ربنا يتوب علينا ويستر


منوره ياخالتي

[هشام اللول1]

ابو التفانين ده راجل كفاءه ياحاج
ويتعمل ليه تمثال وينزله بيها جنب الاهرامات
يبقي حسني مبارك بناء الهرم الرابع ...... ياجدعان

بس ابو التفانين ده مش ليه الا في الخراب
مش ليه سكه تانيه ؟؟

تسلم ياحاج
ولنا لقاء اخر في مصيبه اخره من مصائب ابو التفانين

بارك الله فيك وحفظك

[عفريت أفندى]

ابو التفانين شعاره

إدينى ف الهايف و أنا أحبك يا فننس

و ربنا ياخد أبو التفانين و ياخد فى سكته ترزية القوانين قااااااااادر يا كريم

تسلم يا سكريم

و يجعلوا عاااااااااااااامر

[SCREEM]

ابو التفانين ده راجل كفاءه ياحاج
ويتعمل ليه تمثال وينزله بيها جنب الاهرامات
يبقي حسني مبارك بناء الهرم الرابع ...... ياجدعان

بس ابو التفانين ده مش ليه الا في الخراب
مش ليه سكه تانيه ؟؟

تسلم ياحاج
ولنا لقاء اخر في مصيبه اخره من مصائب ابو التفانين

بارك الله فيك وحفظك

لالا هو راجل ناصح تماثيل ايه وبتاع ايه هو حسبها صح لو اتعرف والناس عرفته هيجيلو يوم ويتعلق خليه كده ف الخباثه



الف شكر ياحج علي مرورك

[SCREEM]

ابو التفانين شعاره

إدينى ف الهايف و أنا أحبك يا فننس

و ربنا ياخد أبو التفانين و ياخد فى سكته ترزية القوانين قااااااااادر يا كريم

تسلم يا سكريم

و يجعلوا عاااااااااااااامر

يسمع من بقك ياربنا ياحج ويجعلوا عاااامر

الف شكر علي مرورك ياحج

[الحريه]

ده اسطوره الراجل ابو التفانين ده

تعرفو لو ابو التفانين ده يشتغل لصالح الشعب ويسيبه من الحكومه

والله هنبئه اروش شعب ونخليها رئيسنا القادم كمان

اشكرك سكريم

وربنا ياخد ابو التفانين