ندااء / لقينا حاجه بتنكسف فى بلدنا !!!!!!!!!!(حملة التهييس)

**The dealer** · 19 - 6 - 2010, 05:35 PM

يااااااااااااااااه بقالى زمان بدور على حاجه عندنا عدله
و كان بيجى عليا ايام بفكر هى البلد دى كلها كدا مفيش حاجه عدله فيها
لغايه ما قريت الخبر ده

زرافنا زراف بينكسف

بجد انا مبسوط اوى عشان لقيت حاجه بتنكسف على دمها عندنا فى البلد

طبعا محدش فاهم حاجه

تعالوا نبتدى الحكايه من الاول

فى يوم من الايام كالعاده كنت مخنوق من احوال البلد فقولت اعمل حاجه مش طبيعيه

و هى ايه الحاجه اللى مش طبيعيه

انى امسك جرنال و افر فى صفحاته

و انا مبحبش اعمل كدا عشان مش عاوز اتخنق اكتر

المهم مسكت الجرنال مسكت اول صفحه

لقيت الخبر دا فلان و فلان يتشاورون

يا ناس انا ماليش فى السياسه الحمضانه دى

تانى صفحه

الان يدعو فلان للافتتاح

يوووووووه هو مفيش غير فلان

طبعا انتوا عارفين مين فلان دا

ربنا يجعل كلامنا خفيف عليهم

المهم قولت فى نفسى انا لو مالقتش حاجه فى الجرنال دا تعجبنى هولع فيه

قومت فاتح الجرنال من النص كده

و فجأه عينى وقعت على الخبر دا

زرافنا زراف بينكسف

انا قعدت اضحك على العنوان اساس

ايه دا احنا عندنا فى البلد حاجه بتنكسف
و ايه زراف طب كويس

ندخل فى صبة الموضوع بقى

الخبر كان فى جريده فيما معناه
طبعا فى الاعياد تلاقى الناس هنا و هناك مالين البلد
و كل واحد بيدور على مكان يلف فيه شوي

اللى يروح المسرح و اللى يروح السيماB)
و اللى يروح الترب و اللى ....و اللى .... الخ
فى ناس بقى بتروح الجناين

يعنى مثلا تلاقى حديقه الحيوان بالجيزه مليانه فى الاعياد
و تلاقى العائلات كتيره و خصوصا الاطفال
ماما عايز اتفرج على الازد

بابا عايز اشوف الفيل ابو سلومه
عايز اروح للسرافه:
و عايز و عايز أطفال غلسه بقى

طب مانتوا بتشوفا قطط وكلاب فى الشوارع
و صراصير و فيران و حاجات حلوه كتير

خلاص حبكت تتفرج على الحاجات التانيه دى
المهم

نروح لموضوع الزرافه
لما الاولاد راحوا يشوفوا الزرافه لاقوا واحده بس
عمو عمو هو فين الزرافه التانيه
زرافه تانيه اه يابنى ماهى عندكم اهى
ياعمو لا بيبقى فى زرافه و زراف معاها
اه يابنى معلش الزراف مات بسبب وعكه صحيه
نجى نسأل المسئولين بقى على حكايه الزراف

الحوار دار بين الصحفيه و المسئول
- هو ليه مكنش فيه غير زرافتين
- قال لا في اتنين فى الجيزه و واحده فى اسكندريه
- يعنى مفيش غير 3 زرافات بس
- ما احنا فكرنا ان احنا نستبدل اسد بزرافه:
- ازاى؟ حضرتك تقصد ايه؟
- تبادل حيوانى
_ ممكن توضح لو سمحت:أخخخ:
-يعنى احنا مثلا عندنا الاسد ب 10 الاف جنيه
و الزرافه ب 40 الف
- ازاى الاسد اللى اسمه اسد يكون ارخص من الزرافه:أخخخ:
- هو كدا فاحنا فكرنا نبادل 4 اسود بزرافه
- طب و الله فكره كويسه بس ليه
هو مش برضه الزرافه بيتكاثر
- ايوه بيتكاثر اومال بيعمل ايه
- طب لما هو بيتكاثر فين الزراف الصغير
- لا ماهو الكلام دا حصل من 25 سنه
- ايه دا يعنى انت قصدك ان الزرافه دى عمرها 25 سنه
- ايوه دى تعتبر من الزراف المعمر فى العالم
و الزرافه دى ولدت زرافه صغيره قبل كدا
- ولدت مره واحده بس
- ايوه حظها كدا
- يعنى موسم التكاثر بتاع الزراف طول السنه
و من 25 سنه الزرافه دى مخلفتش غير مره واحده بس
- قدره ربنا بقى
- طب انتوا مش المفروض تفكروا فى حلول
- ما حانا فكرنا و جبنلها زراف بس محصلش نصيب بينهم اتكسفوا من بعض
- ايييييييه انكسفوا ؟؟؟:
- ايوه انكسفوا ايه حاجه غريبه

ومن هنا نحب نبشركم ان زرافنا زراف بينكسف
اخيرا لقينا حاجه عدله فى بلدنا