بيعاملنى ياناس معاملة .... شوفوها انتوا بقى

[sasa_bose]

دى اول مشاركة ليا المنتدى كله معلش ان اول مشاركة ليا بمشكلة بس بجد انا محتاجة رأى اى حد يقرأ قصتى دى حتى لو قال رأيى هو شايف انه مش هيفيدنى بالعكس ممكن يفيدنى انا هبتدى ...

انا خلصت كلية واشتغلت فمكان كويس والحمد لله وكان فى باص شغل بركبة وكنت لسه جديدة قعدت اسبوع واسبوعين وفالاسبوع التالت قابلتة جة ركب معانا الباص كان واخد اجازة ولسة راجع منها ... اه نسيت اقلكم مين دة هو زميلى فالشغل بس فى لاب " معمل " تانى هقلكم مواصافته أولاً : من ناحية الشكل " ابيض - عينة واسعه وعسلى فاتح - شعرة اسود " تانى حاجة اللى عرفتها بعد كدة : اخلاقة : " أزهرى - بيتقى ربنا - لناس كلها بتشكر فأدبة وطريقتة " يعنى من الاخر مفيش بنت تسيبة اول لم شفته بصيت على ايدة ملقتش دبلة قلت الحمد لله ههههههه اول كلمة بينا قالى اتفضلى اطلعى انتى الاول وصوتة كان حلو اوووى وناعم ورقيق او معرفش يمكن كان تعبان سعتها من الشغل او بيثبتنى بصوتة هههههههههههه المهم ما علينا ... قعدنا يوم اتنين .. تلاته ولا سلام ولاكلام لحد ما لقيتة فيوم قعد جنبى فالعربية كنت هموت من الفرحة بجد ومبقتش مصدقة خصوصا لم كنت بغمض عينى شوية من التعب واقوم الاقية باصصلى وابتدينا نتكلم ونقرب من بعض وناس كتير لاحظوا طريقتوا معايا يشوفنى فمكان يجى ورايا , يقف مع صحبتى عشان يكلمنى وانا بصراحة ابتديت اتعلق بية اوى لحد فيوم نسيت موبيلى مع صحبتى اديتهولة يدهولى وهو بيدهولى قالى خدى رقمى خلية معاكى وهاتى رقمك واديتهولة "" كأنى مصدقت "" هههههههه وابتدى يكلمنى فاليوم اللى مش بيروح معانا او هيبات فالشغل يكلمنى يعرف وصلت و لا لاوالحياه كانت بمبى وحلوة وقالى بحبك وبموت فيكى طبعا مسج لانة بيتكسف جدااااااا ودى نسيبت اقلهالكم قلتلة وانا كمان وفجأة ..... وبدون اى مقدمات زعل منى واكلمة مش بيرد وجة مرة واحدة قالى احنا مش هينفع نبقى مع بعض قلتلة فى واحدة تانية قالى لالالا خالص بس انا ظروفى وحشة جدااا قلتلة انا مش هسيبك عشان ظروفك انا بحبك وانت بتحبنى انا عارفة وخلاص والموضوع عدى وفضل كل شوية على الكلام دة ونسيب بعض وانا ارفض لحد فيوم جة قالى انا هقلك حاجة بس مش عارف انتى هتعملى ايه قلتلة قول قالى انا كنت خاطب بنت خالى وامى رجعتنا لبعض انا كنت عارفة الموضوع دة بس عارفة انه سبها المهم سكت متكلمتش وقلتلة مبروك وقررت انساه سعتها بس نظراته ليا وطريقتة ومعاملته بتقولى انة لسة بيحبنى وخصوصا انة لحد دلوقتى مخطبهاش ومعرفتش اكرهه ولا انساه وفضلت اكلمة وحصلت مواقف كتييييرة جداااااااااا مش هقدر اقلها كلها لانها طويلة بس المهم انه فالاخر قلتلة انا مش هسيبك غير لم الاقيك متجوز يوم فرحك هنساك وتانى يوم هكون مخطوبة قالى انتى هتجننينى بضحك كدة ومسك ايدى ومشينا على طول يكلمنى ويطمن عليا حسيت انى قربت منه اكتر وهو قرب منى اوى وعارفه انه بيحبنى زى ما بحبة بس الانسان دة جة يوم وكنت معاه وحد يتصل بية ومش راضى يرد وقالى هتحصل مشكلة لو رديت عشان اللى هيكلمنى دة عايزنى اسافر برة وانا مش هينفع اسافر انا حاولت اكتير اقنعه يسافر يكون نفسة وهو رافض خالص ولم لاقانى زعلانة ومن كتر حنيتة عليا وانه مش بيحب يشوفنى زعلانة قالى انا عيان ومرضى يمنعنى من السفر خالص سعتها كنت هحضنى بس مسكت ايدة اوى عرفت ليه هو كان بيبعدنى عنه ولية قالى كدة عشان ميظلمنيش معاه خصوصا انى كل شوية حد بيتقدملى وبرفضة قالى انتى موقفة حياتك عليا " غبى مانا بحبة ومش هسيبة امال اوقفها على مين " المهم حصلت بردة مواقف حلوة ووحشة وخناقات ومصالحات وحب وزعل وفرح وعياط وكل حاجة بس اهتمامة بيا قل اكلمة مش بيرد ولم سألتة قالى كان عندى مشاكل فالبيت وحكالى عليها كلمتة من يومين قلتلة رصيدى هيخلص قالى طيب الحمد لله وفصل الموبيل عندى رصيد استنينة يكلمنى متصلش قلت يمكن مش معاه رصيد واديتة اعذار كتير لقييتة يوم بيكلم زميلنا فالعربية من الموبيل اتحرق دمى انه معاه رصيد ومش بيكلمنى وقلتلة انا كدة عرفت انت بتكرهنى اد ايه ومروحتش الشغل لمدة يومين ومتصلش خالص بيا فاليومين دو ل ولحد انهاردة شفنى ولا كأنة يعرفنى ولا كلمنى وانا رحت الشغل عشان عارفه انه اجازة انهاردة بس لقيتة فوشى مرة واحدة فرحت وحزنت انة مكلمنيش .

تفتكروا بيعمل كدة ليه طيب , انا غلط لم قلتلة انت بتكرهنى اوى كدة ومش عايز تكلمنى , ولا حاسس بعجزة ولا ايه ؟؟؟؟

ملحوظة "" هو كان بيستحملنى كتييييييييييير جداااااااااا ,,,, بس لم كنت بزعله كنت بروح لحد عندة واصالحة بس هو معملش كدة ولا كلمنى حتى "" ... اعمل ايه انا دلوقتى مش بكلمة خالص ؟

وبعدين تفتكروا دة زعل يويمن وهيعدى ولا هينسانى خلاص ومش عايزنى ؟؟

معلش تقلت عليكم بس أفيدونى ونبى ههههه

وبعدين هو عندة 27 سنة يعنى لو كان خاطب بجد كان زمانه اتجوزها خصوصا انها قريبتة وكان ساب الشغل دة عشان فلوسة قليلة وراح اى شركة كويسة لانة شاطر واتعرض عليه حاجات كتير صح ولا ايه عايزاكم تفكروا معايا احسن هتلاقونى لسعت وماشية اكلم نفسى

[اميره بلا وطن]

السلام عليكم
بصى ياقمر
يمكن رايى مايعجبكيش لكن بجد الواحد ملما بيفكر يتجوز مش بيحب الا اللى تحيره اللى مايقدرش يوصلها بسهوله
انما موضوع التهرب ده يمكن فعلا عنده مشاكل لانها اكتر حاجه بتعقد الناس ويمكن يكون بيلعب على الحبلين ومعاكى ومع غيرك كده ويمكن اصلا لما بيقرب لموضوع الجواز والمسئوليه بيخاف وبيرجع ويتهرب
انا لو مكانك هنساه ولو بيحبنى بجد هو اللى هيدور عليا وهيتعب كمان عشان يوصلى والطريق الوحيد لده هيكون بالخطوبه والجواز
دا رأى
تقبلى مرورى

[omaro]

بصى يا ستى
انا شاب وعندى 27 سنة وكمان ازهرى بس مش ابيض ولا عنيا عسلى
ومن خلال كلامك انا طبعاى فيها تشابه كبير معاه
على فكره كل الحكاية انه خايف من موضوع الارتباط
فكرة المسؤليه بترعب اى شاب
بيفضل يفكر
انا دلوقت لوحدى اطلع ادخل انام اقوم براحتى معايا النهارده عادى مش معايا برضه عادى
انما تكون فيه انسانه مسؤله منى
دى مسألة ترعب بصراحه
نصيحة منى
طنشيه هيجرى وراكى بالمشوار
وبكرا تقولى عمر قال

[sasa_bose]

يعنى دة رأيكم طيب خلاص انا هعملة وشكرا ليكم جدا جدا جدا

بس سؤال معلش يعنى لم اطنشة مش ممكن يفتكر انى نسيتة خلاص ومش عايزاه ؟؟؟؟؟

[قطقوطة]

اولا ازيكنورتى المنتدى ياقمراية
ثانيا يابنتى دا التقل صنعة بنات اخر زمن صحيح ........
بس الصراحة عندنا حق بردو ماهو اصل الرجالة شحو اليومين دول ياخوفي نقوم في يوم مانلاقيش رجالة نلاقيهم خلصو ...
هزرنا كتير ندخل في الجد بقا
بصي انا حاسة انه فيلم هندى بجد شوية تعبان وشوية كان خاطب وعاوزين يرجعوله خطيبته وهو مش عاوز
وشوية ظروفه مش كويسة ايه الجو دا .؟
انا مع الناس اللى قالت تتقلي وتجربي تبعدى انتى عنه لان بجد اى راجل او شاب لما بيحس انه امتلك البنت اللى معاه وانها ماتقدرش تستغنى عنه بتبقي حاجة عادية بالنسبة له
عارفة ..........؟ الطريقة اللى دايما تخليه متعلق بيكى ونفسه يقرب اكتر واكتر هو انه يحس ان فيكى لغز او غموض او انه يحس انه لسة مادخلش قلبك اوى خليه دايما في حيرة اوعى تخليه يبقي على يقين انك ليه وانه كل حاجة في حياتك حبيه ياستى زى ماانتى عايزة وقوليله كلام حلو زى ماتحبي وكمان لما يزعل منك صالحيه براحتك اوى بس لما هو يقول هبعد قوليله بردو ابعد خليه يعرف قيمتك خليه لما ياخد قرار ينفذه وماتتحاوليش انتى ترجعيه سيبيه يتحمل نتيجة قراره

[sasa_bose]

شكرا يا قطقوطة لرأيك بس انا عايزة معاه فالشغل يعنى قدامة على طول مش هعرف ابعد عنه " انه مش يشوفنى يعنى " وبعدين انا لو تقلت مش ممكن يحس انى نسيتة ومش عايزاة وانى سيبته ؟؟؟؟

[thesniper_12007]

السلام عليكم
بصى ياقمر
يمكن رايى مايعجبكيش لكن بجد الواحد ملما بيفكر يتجوز مش بيحب الا اللى تحيره اللى مايقدرش يوصلها بسهوله
انما موضوع التهرب ده يمكن فعلا عنده مشاكل لانها اكتر حاجه بتعقد الناس ويمكن يكون بيلعب على الحبلين ومعاكى ومع غيرك كده ويمكن اصلا لما بيقرب لموضوع الجواز والمسئوليه بيخاف وبيرجع ويتهرب
انا لو مكانك هنساه ولو بيحبنى بجد هو اللى هيدور عليا وهيتعب كمان عشان يوصلى والطريق الوحيد لده هيكون بالخطوبه والجواز
دا رأى
تقبلى مرورى

صح كلام أختنا أمية بلاوطن
ودي قصيدة للشاعرة تغريد سامي بتعبر عن الموقف
مش هاســــألك

مش هاسألك ايه غيرك
انا عايزه منى أحررك
الحزن قلبى يدونه
دمى ..مداد بيلونه
مين اللى قال ان الغرام
حبة كلام
لقا والسلام
وقلوب بتسرح بالهيام
وان حالنا مال
القول ما يقدر يعدله
والدمع بعد ماكان حجر
ينبوع ألم
بلمسه القسوة انفجر
وخطاوى فرح اتشردت
م التوهة ماتت عا السكك
م القهر طيرى بينتحر
ويلح جوايا السؤال
ليه العتاب؟
والفكرة مش فكرة حساب
ياسؤال وعطشان للجواب
وكأنها كلمة قدر
قلبك غدر,
بس افتكر
انا قلبى ياما كتير غفر
انك بظلمك تهمله
مستنى توهبله الحياه
وانت اللى قادر تقتله
تظلم وظلمك منتهاه
تقدر تمللى تعلله
راح فين حبيبى بتاع زمان؟
فيضان حنان.
وضى حبك
ياما مدلى
جسور..
منورها الامان
تملا معانيها المكان
تحكى اللى كان.
مش هاسألك:
إيه غيرك؟
إيه ماعرفوش بيحيرك
ولا خلاص ..الوقت ضاع
مقدرتش حتى افكرك
ولا حتى أقول أنك مُدان
ولا حبى مر عليك
وهان
أنسى خلاص كل اللى راح
وان اللى جاى ..
مابقاش مباح
مهما المعانى اتفسرت
مش هاسألك ايه غيرك
أنا عايزه منى أحررك


تقبلي تحياتي
إكرام مجاور

[sasa_bose]

ميرسى كتير على القصيدة دى

بس ونبى انا نقصلى سنة صغيرة واتخنق خلاص هههههههههههه

عايزة تفاؤل ونبى مش تشاؤم

وبعدين انا عايزة حد يرد عليا تفتكروا دى مشكلة صغيرة ويرجع تانى ولا خلاص هو كدة قفل الموضوع خالص , وبعدين لم اشوفة فالشغل اعمل ايه ولو كلمنى عادى قدام الناس ارد ولا لا , وبعدين انا خايفة ليفتكر انى نسيتة ميفهمش انى بتقل عليه ؟؟

[thesniper_12007]

أختي الفاضلة ضعفك مرخصك عنده والواحد ما يحبش الا البنت اللي هو يدوخ وراها مش اللي تدوخ وراه يعني لازم يحفى عليكي هو ده اللي عايزك بجد وهو ده اللي يحققلك السعادة اللي بتحلمي بيها لكن اللي انتي تحبيه وتجري وراه وتكوني ضعيفه قدامه لو كنتي ملاك من السما ح يسيبك ويدور على غيرك لو كانت قرده في الشكل وغبية في التصرفات
انا مش باقولك الكلام ده عشان تتخنقي انا عايزك تفكري بعقلك وعادي لما يقابلك في الشغل ما تتهربيش منه وخليكي عادية جدا واتحكمي في مشاعرك واتعاملي معاه عادي جدا وكأن شيئاً لم يكن اتعاملي معاه زماله فقط لو عايزك ح يدوخ عشان يكلمك ولو هو بيتهرب عشان ما يكلمكيش فلو بوستي على أيده مش ح يرجعلك
أختي الفاضلة
أنا لا أريدك أن تبكي
ولا أريد عيناك تصافحان أمامي البكاء
فأنا وإن مات فيك الهوى
لا أريد أن يموت فيك الكبرياء

أظن فهمتيني
تقبلي مروري
إكرام مجاور

[sasa_bose]

ميرسى لكل ردودكم وادعولى