##...الشعب المصري الأكثر رفاهية على مستوى العالم ...!!

[m&m2009]

السلام عليكم ورحمة الله وبركاته

أخواني في مصراوي كافية ..

تقول دراسة أمريكية أن الشعب المصري في عهد الرئيس حسني مبارك ..!!

أصبح من أكثر شعوب العالم رفاهية حيث أن دخل الفرد الواحد يصل إلى مليون ومائتي الف باوند ( جنيه يعني ) ...........!!

وأيضاً تقول الدراسة الامريكية بأن الشعب المصري يعيش في أزهى عصور الحرية على مر تاريخ مصر بدءاً من العصر الفرعوني حتى العصر المبارك ..!!

طيب يا جماعة خلينا نشوف الأمريكان جابوا الكلام ده اللي في الدراسة بتاعتهم مينين ..!!

هما بيقولوا أننا نعيش في رفاهية ودخل الفرد الواحد يقدر بمليون وميتين الف جنية ..!!

فعلاً ده كلام صحيح 100% عارفين ليه علشان الرقم ده هو راتب الوزير عندنا في الشهر ..!!

أقصد هنا الوزير محمد ابراهيم سليمان وزير الاسكان السابق طبعاً الكلام ده أتقال في برنامج عمرو الليثي في برنامج واحد من الناس ..!!

مسكين والله الوزير بياخد مليون وميتين الف بس في الشهر ياترى بيكفوه ولا بيجي في نص الشهر يستلف لحد مايقبض اخر الشهر ...!!

هههههه ههههه

وهما بقى الامريكان لما عرفوا ان الوزير عندنا بياخد الرقم ده في الشهر قالو اكيد المواطنين بيخدوا رواتب أكتر من المواطنين في امريكا ..!!

سبحان الله الوزراء عندنا بياخده ارقام خيالية لو حسبنا راتب الوزير اللي هو مليون وميتين الف في الشهر.. ياترى لو قسمنا الرقم ده كراواتب على عدد من الموظفين الغلابة كام ياخد كل واحد فيهم ...!!

طبعاً الرقم ده بالنسبة للوزير ميأكلش عيش حاف علشان كده تلقيه ياحول الله بيشتغل أوفر تايم ( مع كل امضة بياخد ..؟؟ ) علشان يحسن دخلة ..!!

أنتم عارفين الامريكان جابوا الكلام ده منين ..!!

من اغنية مدحت صالح ققالوا ياسلام ياريت حسني مبارك هو اللي كان بيحكمنا في امريكا كنا زمنا زي المصريين عايشين في رفاهية بلا حدود .!!

هي دي الأغنية بتاعة مدحت صالح :
::::::::::::::::::::::::::::::::::::::::

لهي باظت ولا خربت دي عيشة ظريفة جداً ..!!
عايشين في حرية زمن القيود اختفى ..!!
أتحدى لو واحد يوم انضرب على القفا ..!!
والناس بتختشي ولا حد بيرتشي ..!!
الله على الحياة بقى لونها شفتشي ..!!
داحنا لا صوتنا اتنبح ولا في مالطة بندن ..!!

متأمنين من الفقر الدنق ..!!
تعليم علاج وحساب في البنك ..!!
شقق مرمية والشغل في كل حته ..!!
واللحمة بسبعة جنية وساعات نلقيها بسته ..!!
والكل منتعش والكل مرتشي ..!!
الله على الحياة بقى لونها شفتشي ..!!
داحنا لا صوتنا اتنبح ولا في مالطة بندن ..!!

:::::::::::::::::::::::::::::::::::::::::::::::::: ::::::::::::::

عاش الرئيس حسني مبارك وعاش الاربعين حرامي ..!!

على فكرة هما مش اربعين بس دول كتيررررررررررر اوي ..!!

...............................................

.................................................. ...

[عمر خورشيد]

متأمنين من الفقر الدنق ..!!
تعليم علاج وحساب في البنك ..!!
شقق مرمية والشغل في كل حته ..!!
واللحمة بسبعة جنية وساعات نلقيها بسته ..!!
والكل منتعش والكل مرتشي ..!!
.............................................

الواحد مش عارف يضحك ولا يبكي على حال مصر لما يكون وزير بياخد راتب شهري مليون مائتين الف جنية .. ياه الرقم كبير اوي داحنا لو قسمنهم رواتب على عدد من الناس مثلا الف جنية راتب لكل واحد يعني 1200 موظف ..؟

حسبنا الله ونعم الوكيل فيكي يا حكومة ..

...........

[thesniper_12007]

تسمحلي أعبر بالقصدة الجميلة دي لأشرف توفيق
كلــه قابـــض
اللى مات فى البحر قابض
واللى فاز فى الماتش قابض
واللى بيسمُّوه معارض
برضُه قابض
واللى عَمََّال بسّ يدفع
إحنا مِ القلب اللى نابض
اللى مات فى البحر
مش من حَقـُّه ياخد لو جِنيه
هُوَّه مين كان ذنبـُه إيه؟
السفينه؟؟.. حلوه خالص
والعَدَد والحِمْل؟؟ .. ناقص
واللى قاعدين للطوارئ؟؟
كلهم وفْ صفّ واحد قاموا
بسّ البرْد قارِصْ
ثم إنّ الذنب مش ذنب المِلاحَه
اللى غلطان اللى مَيـِّت
المدارس كلها مكتوب عليها
(عَلّمُوا ولادكو السباحه)
واحنا بنقولها بصراحه
اللى ميـّت ذنبه عقلـُه
والغلََط مش عَ اللى ناقلـُه
الجريح جَابُه الشَبكْ
واللى مَات رِزق السَمَكْ
ثم إنّه مات شهيد
قبَّضوا الميت فى إيده الدايبه كام ألف اعتذار
(ميـِّت شَهيد)
واللى جايب جُون بيقبَض ألف ألف وفى احتفال
أصلـُه شاط الكوره جامِد مِن بعيدْ
واحنا ياللى رضِينا ناكل عِيشنا حَافْ
حَطـُّوا جُوَّه العيش حَديدْ
اللى بيمُوت فى البلد دى
لـُه مكافئة موت كبيره
واللى عايش بَرضُه مَيـِّت
بس مِتسَاق فى المَسيرَه
ياحبيبتى حبىِّ غيرى مش هجيلـِك
اللى عَمَّال بس يدفع
مش هينفع يشتريلـِك
مش هيركب يوم سفينه
أصْلـُه راكباه الهمومْ
وان رِكِبت فْ مرَّه صُدفه
برضُه مش هاغرق واقبض
علـّمونى ازاى اعوم
علـّمونا كتير
عشان نطلع نوابغْ
وامَّا فتـَّحنا اكتشفنا الدنيا .. ماشيه لدنيا تانيه
للى دَاهِن واللى صَابِغْ
كلّ يوم الصّبح ادوَّر عَ الوظيفَه
رِجلى دابِتْ
مش هينفع ابقَى لَعِّيب حتَّى واقبض
اللى ممكن بسّ يقبض
اللى يغرَق
واللى يلعبْ
اللى يلعب فى الملاعب
واللى يلعب فى الأرانب
واللى يهرب بالأرانب
واحنا أجبَن من أرانب
بس لينا شُغـْله حلـْوه
كلـّنا بندفع ضرايب
يا حبيبتى اللى حاصِل شيء يخللى التلج دايبْ
يبقَى بسّ ازّاى هنفضَل يوم حَبايبْ؟
اللى يخلـِصْ
مُش هيخلـَصْ
ابعدى عن حضن قلبى
بس قبل البـُعد
حَاسْبى
اوعِى مَرَّه تحِبّى واحِد
مِ اللى عَمَّال بسّ يدفَع أو يناهِضْ
:اسمَعِى كِلمِة حبيبِك
حِبّى واحِد
مِ اللى قابِضْ
ـــــــــــــــــــــــــ ــــــــــــ
أشرف توفيق

تقبلمروري

[الحريه]

مليون ومتين الف بس

اشكرك على الموضوع بارك الله فيك

[zawb3a.in.cup]

انتوا شكلكوا ناويين تودونا النهاردة في داهية والله


بس اسمحلي انا ليا رأي مختلف عن معظم الناس

انا شايفة انه الحكومة مش وحشة ولا غلطانة ولا أي حاجة

احنا السبب في كل دة

فقد قيل قديما:
لا تنشغلوا بالدعاء على حكامكم ... فمن اعمالكم سلط عليكم


ويحكى ان رجلا هب الى سيدنا علي رضي الله عنه يشتيكيه ويقارن بينه وبين ابو بكر والفاروق وفساد حاله رضي الله عنه
فجاء رد علي عليه: كان الحال هكذا عندما كان ابو بكر وعمر امراء على مثلي ... واصبح هكذا عندما اصبحت اميرا على امثالكم

حكامنا مننا
ووزرائنا مننا
بص لكل واحد فينا في شغله يا ترى احنا بنتقي الله في شغلنا؟؟؟
طب احنا مش بنتقي الله ... هما هيتقوا الله ليه؟؟؟
وبعدين احنا رايحين جايين نبارز ربنا بالمعصية ليل نهار ... ربنا هيكافئنا مثلا بحاكم زي الفاروق ولا الرشيد؟؟؟

بص لما احنا ننصلح الاول ... الحال هينصلح صدقني
بص على عهد الخلفاء الراشدين
ايام الزهو دة كان بسبب انه المحكومين اصلا كويسين فخرج منهم حكام كويسين
وايام الرشيد وصلاح الدين و و و و
كان المحكومين مين؟؟؟
االلي فتحو بلاد فارس واللي رجعوا بيت المقدس واللي خرجوا لينا البخاري ومسلم و و و

انما ايام محبي تمورة وعمورة وهيفا ونانسي واليسا
عايز الحاكم يطلع يعمل ايه ولا يقول ايه؟؟؟
اكيد هيطلع يصرف على شهواته و انا لله وانا اليه راجعون

الحل بأيدينا احنا
وربنا يلطف بينا

شكرا على موضوعك
واتمنى اني تتقبل رأيي

[ايسل]

موضوعك رائع بس انا عايزه اقول لو كان رب البيت بالدف ضارب فشيمت اهل البيت .....................
طول عمر الانسان بيتعلم وبيقولك فى الامثال يعيش المعلم ولا يتعلم
اولا بنتعلم من اهلنا ثم مدرسينا ثم الكبار فى السن ثم التجارب احنا شوفنا الكبار بتوعنا كده هنعمل ايه (لو خرب بيت ابوك خودلك منه قالب)
ده شعار المصريين اللى معندهمش ضمير مش كلهم صدقنى لو كان نظامنا عادل كان الشعب عاش بمبادءه واخلاقه دلوقتى من كتر الفساد بقى حتى اللى عنده ضمير بيقول وانا مالى ما البلد كلها كده
واحنا فعلا بلد عايش فى رفاهيه هقولك ليه
فى حد بيشوف فساد ويسكت
فى خد بيشوف ظلم ويسكت
فى حد بيشوف استبداد ويسكت
احنا بقى امريكا صنفتنا كده اننا شعب مرفه علشان بنسكت اسمنا دلوقتى شعب مصر الساكت
شكرا لموضوعك

[عفريت أفندى]

ياااااااااااااااه

بئه أنا عايش فى رفاهيه و انا ولا على بالى !

كويس يا شيخ إن أمريكا فتحت عينيا

ده الواحد كان نااااااااااااااااااايم ف العسل

تسلم يا كبير ع الموضوع اللى كله رفاهيه و نعيم

[هشام اللول1]

عارفين انا حاسس بايه
انا حاسس انه احنا عايشين في عصر قارون وفرعون وهامان
يعني دلوقتي الموظفين والمواطنين واصحاب المشاريع البسيطه واصحاب المهن الحره
كلهم بيشتغلوا علشان الحاكم واعوانه

بس وبعدين يعني
فرعون وهامان بلعهم البحر
وقارون ربنا خسف بيه الارض

ربنا يبعت لمبارك اي حاجه نستريح منها

ربنا كبير

تسلم ياحاج علي الموضوع الجميل ده

[m&m2009]

أشكركم جميعاً أخواني وأخواتي على مروركم العطر ..

تقبلوا خالص تحياتي لكم ..


......................

[ELBRNSISA ESRAA]

ههههههههههههههه والله عندك حق ميرسى على التوبك