تخيل نفسك ورد عليا

[thesniper_12007]

الطبيعى ان اشكر الله فى كل ثانيه لكننى فى هذه الثانيه بالتحديد عايز اشكره لانه خلقنى فى صوره انسان كل يوم يمر اتعرف فيه على مخلوقات جديده فأكتشفت ان احسن حاجه حصلت لى انى ظهرت فى الحياه بشكل بنى ادم.. اصل تخيل معايا لو انت مخلوق تانى ممكن تتعرض لايه ؟



تخيل نفسك نحله :

مشكله النحل انك هتلاقى نفسك مشترك مع 8000 نحله زيك فى ام واحده بس والنحله الام (الملكه) عندها حاجه غريبه قوى (بعدها ما تتجوز على طول بتقتل جوزها) يعنى هتبقى مشارك العدد ده كله فى ام واحده وما عندكش اب .

تخيل نفسك نمله :

هتلاقى السنه عندك مقسومه نصفين (نصف سجن ونصف شغل) الاولانى 6 شهور بتوع الشتاء والثانى 6 شهور بتوع الصيف فى النصف الاولانى هتفضل محبوس فى بيت ضيق جدا مع 12000 نمله علشان البرد وفى النصف الثانى مش هتعمل حاجه غير انك تشتغل وتفضل تلم كميات من الاكل علشان تخزنها وتعيش عليها انت واهلك فى الفتره اللى انتو محبوسين فيها فى الشتاء

تخيل نفسك فراشه :

وانت صغير مش هيكون فيه مشكله بس بعد شويه هتبتدى تلاقى جسمك مليان الوان غريبه صحيح هيه الوان شكلها حلو بس هل هتقدر تعيش حياتك ماشى وسط الناس وانت شخص اصفر او بنفسجى او احمر منقط بخطوط سوداء ؟؟

تخيل نفسك دبانه :

مستحيل هتلاقى حد يحبك انت فى نظر الجميع شخص سخيف والناس كلها بتفكر طول الوقت ازاى تقضى عليك

تخيل نفسك خفاش :

طيب قول لى ازاى هتقدر تستحمل انك تقضى حياتك وانت بتنام رجليك لفوق وراسك لتحت ؟ سيبك من ان الناس هتعتبرك شخص مخيف انت كمان مش هتقدر تعيش فى النور لازم تفضل فى الضلمه طول الوقت انا شخصيا بخاف من الضلمه

تخيل نفسك زرافه :

ممكن تكون لعيب كره سله هايل بتقدر تحط الكره فى الباسكت ببقك لكن رقبتك الطويله هتخلى قفاك مغرى جداا وممكن تضرب عليه بسهوله فى اى وقت ولو فكرت تسوق عربيه فى اى يوم من الايام لازم تسوق وانت مطلع راسك من الشباك

تخيل نفسك قطه :

بغض النظر عن انك ممكن تقضى عمرك كله فى الشارع بين صناديق القمامه وبغض النظر عن ان 90% من القطط بتموت فى حوادث عربيات وبغض النظر عن انك مطالب دايما من الناس انك تاكل الفئرات المقرفه ... الاصعب انك مش هتستحمل حد يسميك اسم سخيف يفضل لازق فيك طول حياتك زى (بكلاويظ) مثلا ؟؟

تخيل نفسك بغبغان :

هل هتبقى انك تكون بنى ادم ما عندوش اى شخصيه وبيكرر الكلام اللى الناس بتقوله وعمره ما فكر يعتمد على نفسه ويقول كلام جديد ؟

تخيل نفسك سمكه :

طبعا حياه البحر جميله بس ايه اللى يضمن لى انى اول ما اكبر شويه ما الافيش حد طلعنى من البحر وحطنى على الشوايه ؟

تخيل نفسك فيل :

عمرما حد هيسألك نفسك تشتغل ايه لما تكبر ؟ لان قدامك 3 اختيارات مالهمش رابع يا تشتغل موديل فى جنينه الحيواانات يا تشتغل فى السيرك يا اما تبقى وسيله مواصلات فى الهند

تخيل نفسك حصان :

حياتك كلها هتكون متوقفه على العيله بتاعتك يعنى لو انت من عيله مشهوره واصيله هتتدلع اخر دلع لكن لو عيلتك اى كلام هتفضل طول عمرك تجر حناطير

تخيل نفسك عنكبوت :

طيب ازاى هتقدر تواجه المجتمع وانت شخص ب 8 ارجل ؟ صحيح ان ال 8 ارجل دى هتنفعك لو انت لعيب كره هتقدر تشوط الكوره وتحط جون من اى زاويه بس هيبقى شكلك ايه مثلا وانت داخل تشترى جزمه ؟

تخيل نفسك ديناصور :

ابقى قابلنى لو لقيت حد يلعب معاك .



انا سعيد جدا لانى انسان طبيعى بعد ما فكرت فى كل الكائنات الموجوده فى الكوكب وكتشفت انى ما قدرش اكون غير بنى ادم الكائن الوحيد اللى ما تخيلتش نفسى فيه هو العفريت لانى ما اعرفش شكله بس اصلا انا فاكر انى سمعتهم بيقولوا مره انه ما عفريت الا بنى ادم .

[فاطيما]

فعلا ربنا كرم الانسان عن سائر المخلوقات
تقبل مروري

[thesniper_12007]

مرورك أسعدني تقبلي تحياتي ولك خالص ودي وتقديري واحترامي

[دره]

والله ما عارفه اقولك اه
موضوعك رائع
الحمد لله على كل حال
جزاك الله خير

[thesniper_12007]

والله ما عارفه اقولك اه
موضوعك رائع
الحمد لله على كل حال
جزاك الله خير

أشكرك على مرورك الكريم
اسعدني مرورك تقبلي تحياتي
لك خالص ودي وتقديري واحترامي

[ايسل]

اسئل النمله والنحله والفراشه والدبانه والخفاش والقطه والفيل والعنكبوت والحصان والزرافه والديناصور
هل تقبلون ان تكونوا شئ اخر مثلا تكونوا بنى ادمين واعرف رايهم صدقنى ربى يخلق كل شئ ويجعله يحمده على انه خلق هكذا شكرا لك وبداياتك موفقه بالتوفيق

[الحريه]

موضوع اكثر من رائع اكرام

مفيش حد فينا مش تخيل نفسه يكون حاجه تانيه غير انسان

بس نرجع نشكر ربنا ان احنا بنى ادمين وكل شىء على وجه الارض

ربنا مسخره لينا


اشكرك اكرام بارك الله فيك

[هبه اتش]

بجد اول مره افكر في الموضوع ده
بس انا تخيلت نفسي صرصار وكل شباشب العالم بتجري ورايا
هي صح حياة اكشن واحمد السقا بس بردوا (شباشب)؟
الحمد لله الذي خلقني انسان وابدع في خلقي
تقبل مروري ياأكرم وبجد توبيك مالوش حل

[aeme3100]

موضوعك الحمد لله الذى جعل لى عقل لاعبده

لونى بجد كنت اتمنى اكون اى واحد من دول بس مقفش احاسب امام الله
والله يا بختهم

[الــઇـنيد]

قال الله سبحانه وتعالى :

( وَلَقَدْ كَرَّمْنَا بَنِي آدَمَ وَحَمَلْنَاهُمْ فِي الْبَرِّ وَالْبَحْرِ وَرَزَقْنَاهُم مِّنَ الطَّيِّبَاتِ وَفَضَّلْنَاهُمْ عَلَى كَثِيرٍ مِّمَّنْ خَلَقْنَا تَفْضِيلاً )

الحمد لله على النعمة العظيمة

نعمة تكريم الله للانسان عن سائر المخلوقات


تسلم يمينك اخي الغالي