الرجاء من الأخوة الاعضاء الدخول لوضع حل لمشكلتي الكل يدخل

[عمارطه2009]

أولا ازيكم يا أحلي أعضاء
مشكلتي هي اني نفسي أعلم خطيبتي تتعلم تقراء وتكتب نسيت أقولكم اني خطيبتي أميه لا تقرأ ولا تكتب ونفسي بجد أعلمها تقرأ وتكتب
المشكله اني هي مش مقتنعه بالتعليم وبتقول ان هي كبرت خلاص ومينفعش تتعلم رغم ان عمرها 18سنه
أقولها عادي الناس بتتعلم في أي وقت وفي أي سن وان العلم نور والجهل ظلام تقولي خلاص هتعلم علشان ترضيني لما تلاقيني زعلت وبعد شويه تقولي انا مش بحب التعليم
طبعا هتقولي سيبها وأتجوز واحدة غيرها اقولكم مش هينفع أسيبها لأني فيها كل الصفات اللي بيتمناها الرجل في شريكه حياته وهي بتحبني وانا كمان بحبها بس للاسف يظهر ان الحلو مش بيكمل
فطبعا المشكله دي تعباني أوي ومش عارف أعمل أيه وأحيانا كتير بأحزن في نفسي ومش برضي أوصلها زعلي علشان ما تحسش بالفرق بينا
وانا كنت عارف من البدايه اني هي مش متعلمه بس كان عندي أمل كبير أني أعلمها وأخليها أحسن واحدة
بس مش عارف أعمل أيه في عقلها هي ذكيه جدا وبتفهم أي حاجه بسرعه بس مشكلتها اني هي مش مقتنعه بالتعليم
وفي النهايه ملقتش حل غير أني أعلمها بنفسي وجبت ليها كتب محو الاميه وكم كشكول وأقلام وفي خلال أسبوعين قدرت اني أعلمها الحروف الابجديه وبعض الكلمات والاسماء وبقت دلوقتي بتكتب أي حاجه أكتبهلها بس لسه مش بتعرف تقرأ
مشكلتي أني أزاي أوصلها تقرأ مع العلم اني هي مش هتقبل حد غيري يعلمها وانا مش عارف أخليها تقرأ ازاي لاني مش من المتخصصين في التعليم
يا ريت بعد أذنكم لو حد عندة طريقه أعلمها تقرأ يقولي عليها
واسف جدا طولت عليكم ووجعت دماغكم
مستني الردود

[عمارطه2009]

فين الردود يا جماعه ولا أنتم شايفين انها مشكله تافهه
انا شايف اني المشكله دي هتأثر علي جدا في المستقبل وعلي أولادي كمان

[دره]

ازيك يا عمار
بص بقى مش معنى انها متعلمه انك تسيبها لا انت بس خليك صبور وحببها فى التعليم
ان دورتلك عالنت عن اسطوانه لتعلم القراءه وده الربط بتاعها

ftp://ftp.cdrom.com/pub/simtelnet/wi...g/abc4kids.exe

وعموما ربنا معاك يهديهالك يارب
ومتنساش اهم حاجه الصبر بس اوعى ساعه الفرح تنسانا
ربنا يباركلك ويخليهالك

[عمارطه2009]

شكرا بجد ليكي يا أسلامي
وطبعا أنتي هتنورينا في الفرح ان شاء الله

[دموع الاقمر]

بص مدام هى بدات معاك في الكتابة اكيد هتعرف تخاليها تقرا وتكون احسن من بنات الجامعة اهم حاجة انك تجيب الحروف حرف حرف كدة وتشبكهم مع بعض ومدام هى عرفت الحروف اكيد هتعرف تنطق اسمهم وبعدين تجيب اولا حرفين تشبكهم كدة مع بعض وبخط كبير وتخاليها تقرا حرف حرف وبعدين يتشبكوا ببعض وكدة ياعنى والله دة الي اعرفة وبعلم اخويا بية وربنا معاك ويوفقها وانشاء الله هتكون احسن ام واهم ام كمان قول انشالة وربنا يهنيك بيها

[عمارطه2009]

شكر جدا ليكي يا دموع القمر علي أهتمامك بالرد علي مشكلتي وانا فعلا عملت ذي ما قولتي وقولتها اني هي تشبك الحروف ببعضها وتجمع الحروف لحد ما تبقي كلمات بس الموضوع عايز شويه صبر شويه

[آيه محمد]

ربنا معاك ومعاها
أنا مع الاسف مش هأدر افيدك اللى يعرف دة المتخصصين
بس ياريت تعلمها بسرعة علشان ان شاء الله فى المستقبل الأطفال هيعتمدو عليهافى التعليم
وربنا يهنيكو مع بعض

[عمارطه2009]

ميرسي ليكي بجد يا أيه وكفايه ردك اللي نورني وشكرا ليكي مرة أخري

[اميره بلا وطن]

السلام عليكم
اولا حببها اوى فى التعليم
وكلمها عن المستقبل وعن اولادكم باذن الله اللى المفروض هيا تتابعهم وتهتم بيهم وتذاكرلهم وانت فى الشغل
وبعدين ابدأ معاها واحده واحده
علمها حتى الاول تقرأ حروف اسمها عشان لما تلاقى حروف شبهها فى اى كلمه تقدر تفتكر اسمها كان بيتنطق ايه وتنطق زيها تمام
كمان ياريت تعرفها انك انت نفسك واى حد مااتعلمش بسرعه كله بيجى بالراحه
ولما تقرأ اى حرف شجعها اوى
لما تحفظها اسماء الحروف هتقدر تنطقها بالتدريج فى الكلام المكتوب
بس لازم تحفظ اسم الحروف دى الاول وشكلها كمان
واكيد لازم تشرح بالامثله عشان تحفظ الحرف بالشبه
يعنى مثلا حرف ب
قولها الطبق اللى تحتيه نقطه ده يبقى به اول ماتنطقى كلمه بطه اولها ب طبق تحتيه نقطه
يعنى خليها تربط شكل الحرف بحاجه معينه تفتكر بيها
ياريت اكون قدرت افيدك
ربنا معاك
وبجد بجد ربنا هيكرمك اوى
ربنا يوفقكم ويسعدكم

[محمد أبراهيم]

اخى

استاذنك سيكون لى عوده

فللاسف وقتى ضيق جدا

وان شاء الله

ستجدنى قريبا