أنا محجّبـة ليـه؟

[sheren19]

أنا محجبة -بعد إيماني بأمر ربنا إن الحجاب فرض على كل مسلمة


علشان الأسباب التاليه

*******




علشان انا حرة.. مش من حق حد يشوف مني اللي مش عاوزاه يشوفه إلا بإرادتي.. ومن حقي اختار مين اللي يشوف مني أجمل ما عندي.. واللي علشان يشوف ده ويبقى حقه وحلاله بلاله عن طيب خاطر.. لازم هو كمان يديني مشاعره واللي باقي من عمره عن طيب خاطر

*******

2





علشان أنا غالية.. مينفعش أقلل من قيمة نفسي واخليها عرضة لكل العيون.. ويبقى خروجي مكشوفة ضوء أخضر لكل من هب ودب يسرق مني ولو نظرة لأي جزء مش متغطي مني.. حتى لو مكنش ده قصدي.. بس مش حقدر امنعه.. كامل اعتذاري لغير المحجبات.. ولكن ده اللي حيوصل منك لضعيفي النفوس حتى لو مكنش ده قصدك.. وده اللي علشانه ربنا فرض الحجاب . علشان ميطمعش الذي في قلبه مرض.. مع الأخذ في الاعتبار انه “كل من هب ودب ده” مش بس الشباب اللي بيعاكس البنات في الشارع.. ده يتضمن حتي الزبال اللي بيسوق عربية الزبالة في الشارع.. كل دول بقى من الممكن انهم يبصوا لي.. لأ ده كمان يمكن ماعجبهمش ويدوروا وشهم إعراضاً

*******







3 -

علشان أنا باحترم نفسي.. وشايفة نفسي كبيرة قدام نفسي.. ومينفعش أنزل سوق المنافسة في الأنوثة علشان أفوز في الآخر بنظرة شهوانية أو كلمة غزل رخيصة أو عرض صحوبية

*******





4 -

علشان انا جمالي مش خارجي وبس.. ومن حقي ان اللي ييجي يتجوزني.. واللي حاديله الباقي من عمري.. واللي حديله كل مشاعري.. واللي حاقاسمه أحلامي وأفكاري.. واللي حخلف منه ولادي.. وح اربيهم معاه.. مايختارنيش على مقاييس شكلية وبس.. أو تبقى هي دي العامل الأساسي في أختياره ليا.. علشان كدة مش ضروري يشوفني في كامل زينتي وجمالي قبل ما ي! تجوزني.. الأهم انه يحب روحي ويعجب بشخصيتي.. ويرتاح معايا نفسياً.. أصل في بنات بتأجل الحجاب لحد ما تتجوز.. على أساسا انها تكون شنكلت واحد وضمنته.. مع إن مفيش حاجة مضمونة في الزمن ده.. واللي اختارها علشان جمالها.. ممكن قوي يتجوز عليها واحدة أجمل منها.. لأنه أكيد في الأجمل منها يعني

*******




5 -

علشان أنا باخاف على أخويا في الله اللي بيشوفني في الشغل أو في الكلية أو في المواصلات أو في الشارع.. ويمكن يكون عاوز يقرب من ربنا.. وبيجاهد نفسه علشان يغض بصره.. فمرضاش لنفسي اني اكون سبب في اني افتنه

*******



6 -
علشان أنا باشيل هم أخويا في الله اللي نفسه يتجوز ومش قادر لضعف إمكانياته المادية.. فمش ضروري يعني ازود عليه همومه.. وأخيِلُه في الرايحة والجاية






7 -
ده غير حاجة مهمة كمان.. الكفن بتاع النساء.. فيه حجاب.. فاللي مش ح تلبسه وهي حية بإرادتها طاعة الله.. ح تلبسه كدة كدة وهي رايحة قبرها.. وطالما ربنا بيقول اننا نتستر حتى واحنا رايحين قبورنا وخلاص انتهى التكليف.. ومحدش حيشوفنا تاني ولا حد حيطمع فينا.. يبقى مفيش معنى اننا نمشي مكشوفين لكل العيون واحنا أحياء نرزق.. يبقى الأولى اطيع ربنا بإرادتي وأقابله وهو راضي عني واخد أجري كامل.. ولاّ اني ملبسوش غير وانا جثة واقابل ربنا وهو غضبان عليا؟


*******







الأسباب اللي فوق دي.. هي اللي فهمتني ليه ربنا فرض الحجاب على البنات.. مش تعسير ولا تضييق.. الحجاب فعلا عزة وكرامة.. ميعرفهاش غير اللي داق طعم الستر


ربنا يهدينا ويهدي بنات وشباب المسلمين


أرجو الدعاء لي ولكم ولوالدي بصالح الأعمال


وياريت اللى لي رأيى تانى احب اسمعه

[ED GIEN]

اقسم بالله مش حقدر اقولك حاجه يا شيرين غير ان موضوعك

جمييييييييييييييييييييل جدا جدا جدا

وبجد فعلا هو ده معنى الحجاب ان البنت تصون نفسها بيه

انا والله شفت مره راجل ماشى هو ومراته

مراته محجبه ولابسه جيب مش طويل اوى تحت الركبه بشويه

!!!!!!!!!!!!!!!!!!!!!!!!!!!!!!!!

اكيد لا تعليق على هذا المنظر

لكن انا بشوف بنات محجبه ولابسين لبس غريب ....

مش بس ضيق ...... لا ده ممكن جيب فوق الركبه وبوت طويل وجزء من رجليها باين برضه

والاسم محجبه ....... يلا بقا الدنيا بايظه خالص

مشكوره على موضوعك الجميل اوى

تقبلى مرورى

[البنت الجديده 1]

الكلام كله صح
بس انا عايزه اقولك ان فيه بنات دلوقتي بتلبس الحجاب وتسئ لينا كمحجبات واحيانا بيعتبروه موضه وهتاخد وقتها وتنتهي ويرجعوا تاني للتبرج والعايذ بالله
ربنا يهدي جميع المسلمين ويرزقنا الجنه
ولكي كل الاحترام والتقدير علي موضوعك الجميل اوي

[مونه]

بجد شيرين جميل جداً جداً جداً
وفعلاً أنا محجبه علشان كل اللى قولتيه
بارك الله فيك قمرايه
وجزاكى الله كل الخير