الخوف ......؟؟؟ !!!

[هشام اللول1]

((( الخوف )))


ذلك الكائن الطبيعي الرابض داخل أعماق كل واحد فينا من يوم ما بيتولد وبتزداد حدته يوم بعد يوم لحد ما بيوصل انه يكون المتحكم الرئيسي في الحياة اليومية.

الخوف من بكرة.


الخوف من الفقر والمرض.

الخوف من فرض ضرايب جديدة علي السادة المواطنين معدومي الدخل.

الخوف من تطبيق قانون جديد للثانوية العامة.

الخوف من الأسعار.

الخوف من خصخصة اللي فاضل من مصر المكروبة - وعلي فكرة اللي فاضل مش كتير .

الخوف من تعدد الأحزاب الخاوية علي عروشها واللي مايصحش تتسمي حزب سياسي اكتر منه قهوة بلدي يتجمع فيها أصحاب المعاشات للعب الدومنة والطاولة عادة ومحبوسة.

الخوف من توريث الحكم للسيد الوريث الشرعي للبلد وتوريثها لنجل نجله من بعده وهكذا.

الخوف من بطش عساكر الأمن المركزي علي شباب الجامعات وصفوة المثقفين ف البلد لمجرد الانضمام في اعتصام أو مظاهرة سلمية.

الخوف من الزمالك مايخدش الدوري الموسم الجديد.

الخوف من اقرار قانون ف مجلس- موافقة - يبيح للحكومة بيع أو استبدال المواطن المصري بأي سلعة أخري من أي دولة ف العالم - وطبعا هتكون دولة من دول العالم التالت -


الخوف من وصول قطار الفقر لآخر محطاته وبيع الحديدة اللي راكن عليها المواطن البسيط من تلاتين سنة ومستني الفرج.


الخوف من عدم تطبيق كادر الأطباء الجديد إلا بعد الاطلاع علي كارنيه الحزب الوطني.

الخوف من تلوث جديد يصيب البيئة بعد تلوث المياه - حيوانات نافقة ومخلفات مصانع - وتلوث الهواء -سحابة سودة- وتلوث الفواكه والمحاصيل الزراعية - مبيدات مسرطنة - وتلوث الضماير والذمم البشرية-فساد إداري وواسطة ورشاوي-

الخوف من وصول مياه النيل لإسرائيل من دول المنبع وبمباركة مصر بكل سهولة ويسر.

الخوف من خروج منتخب مصر لكرة القدم من تصفيات كأس عالم قادمة علي يد منتخب جزر القمر.

الخوف من تعديل الصورة الموجودة حاليا علي علب السجاير واستبدالها بصورة أخري بعد ما اتعودنا علي الصورة دي ومبقتش تفرق معانا.

الخوف من النزول بسن المعاش المبكر إلي سن 35 سنة أي قبل وصول جواب القوي العاملة لخريج الجامعة بسنتين علي اقل تقدير.

الخوف من انتخابات حرة ونزيهة بعد خمسين سنة تزوير وتغيير لإرادة الشعب داخل صناديق الانتخاب.

الخوف من تكريم رئيس وزراء إسرائيل باعتباره راعي السلام ف المنطقة.


الخوف من تكرار عرض فيلم شيء من الخوف علي شاشة تليفزيون الحكومة كل اسبوع وترهيب الناس للبعد عن الهويس.

[فتى الإسلام]

دي حياتنا كلها خووووووووووووووف
اللهم انا نسألك الآمان في كل أوقاتنا
موضوع رائع
بارك الله فيك

[Ali Pharouq Najar]

ههههههههه
جميل جدا التوبيك يا اتش ...لو تسمحلى ...

[هشام اللول1]

دي حياتنا كلها خووووووووووووووف
اللهم انا نسألك الآمان في كل أوقاتنا
موضوع رائع
بارك الله فيك

يعني مفيش امان خلاص
عصر الامان انتهي
اصبح كل شئ خوف
ربنا يستر
نورتني فتي الاسلام
بارك الله فيك وحفظك ورعاك

[هشام اللول1]

ههههههههه
جميل جدا التوبيك يا اتش ...لو تسمحلى ...

نورتيني ياعلي بالتاكيد
بس انت بتضحك
شكلك مش خايف من حاجه من الحاجات دي

بارك الله فيك وحفظك ورعاك

[محمود سمير]

الخوف لا بجد موضوع هايل بس ده الخوف من وجهة نظرك بجد ياهشام برافو برافو برافو بتعرف تهيا كل موضوع وكل مشكلة وتلبسها فى فستان عارف مين الفستان هقولك الدوله يعنى الرئيس يعنى الحكومة يعنى بوجهة نظرك ال 40 حرامى بجد هايل بس الخوف مش كده الخوف عامل زى روتين العادة والتوجس من الخطوة المقبلة وانك بتكون قلقان على حياتك وده ممكن يكون نتيجه لذكريات في اللاوعي لإخفاقات وإحباطات سابقة انت تكون مريت بيها بس ماعلينا اه على فكرة حلوة قوى التوقيع بتاعك بجد بتعرف تحترم الحزب الوطنى وانصاره ومحبيه يعنى لما يكون شعار الحزب الوطنى مصلحة الشعب المفروض انا مصدهوش واصدق شعارات ال....... وبعدين اصدق كلامك انه سرقه وتوريث وكوسة وواسطة وجهل والكلام الخايب ده مش كده انا يكفينى فخرا انى انتمى للحزب الوطنى واكون جاهل تقدر تقول كده زى مبيقولوا وشهد شاهد من اهلها .ارحمنا برحمتك يارب

[هشام اللول1]

الخوف لا بجد موضوع هايل بس ده الخوف من وجهة نظرك بجد ياهشام برافو برافو برافو بتعرف تهيا كل موضوع وكل مشكلة وتلبسها فى فستان عارف مين الفستان هقولك الدوله يعنى الرئيس يعنى الحكومة يعنى بوجهة نظرك ال 40 حرامى بجد هايل بس الخوف مش كده الخوف عامل زى روتين العادة والتوجس من الخطوة المقبلة وانك بتكون قلقان على حياتك وده ممكن يكون نتيجه لذكريات في اللاوعي لإخفاقات وإحباطات سابقة انت تكون مريت بيها بس ماعلينا اه على فكرة حلوة قوى التوقيع بتاعك بجد بتعرف تحترم الحزب الوطنى وانصاره ومحبيه يعنى لما يكون شعار الحزب الوطنى مصلحة الشعب المفروض انا مصدهوش واصدق شعارات ال....... وبعدين اصدق كلامك انه سرقه وتوريث وكوسة وواسطة وجهل والكلام الخايب ده مش كده انا يكفينى فخرا انى انتمى للحزب الوطنى واكون جاهل تقدر تقول كده زى مبيقولوا وشهد شاهد من اهلها .ارحمنا برحمتك يارب

محمود باشا انا مش واقف في محل ملابس علشان البس واقلع

وانا الحمد الله لو تضررت ابقي تضررت زي اي مواطن مصري من حزبك ده
بس مش خايف الا من الضرر الجماعي اللي علي الشعب كله

وانا بحترم الناس اللي تحترمنا اما اللي يهينوا كرامتنا نقف له بالمرصاد
وبالقلم وباليد وبالسلاح اذا تطاول او لزم الامر
وافهمه براحتك

ولو كلامي خايب وتواقيعي خايبة
ياريت ما تمر ليه علي موضوع

بارك الله فيك وحفظك

[عفريت أفندى]

الخوف احساس طبيعى مفيش انسان ف الدنيا ما جربهوش

لكن هنا هنتكلم عن الخوف من الناحيه السياسيه

تقدر تقول خوف المواطن على بلده

او على لقمة عيشه و قوت اولاده

و بالتالى هناك خيارين لا ثالث لهما

إما ان المواطن يواجه ( و هتبقى سنته طين )

أو يطاطى ( و ممكن النظام يصهين و يطنش )

و صراحه الواحد حاسس

حاسس ايه بس؟

الواحد متأكد إن الخيار التانى هو المطبق منذ عقود

ربنا يستر و الناس تصحى و تفوق و كفايه مطاطيه بئه

فضلنا نطاطى لحد ما بقينا تحت الأرض

فاضل ايه تانى بنستناه عشان نواجه؟

تسلم يا اتش

و بارك الله فيك

[الحريه]

الخوف هو احنا فعلا خايفين من حاجات كتير اوى

منها اللى انت ذكرته ومنها اللى مش اذكر

واحنا لو هنفضل خايفين كده مش هنكون حاجه والخوف بيقلب

بجبن والجبان يقعد فى بيته احسن

انا مش عارفه انا بقول ايه

هو الشعب فعلا بئه جبان ؟؟؟؟؟؟؟؟؟؟؟؟؟؟؟؟


اشكرك على الموضوع

[دره]

الخوف
جيت عالجرح والله يا هشام
اولا شعب جبان وبيخاف
وحكومه زكيه وبتخوف فعلا بدليل بسيط لو اتكلمت مع حد فى السياسه يقولك يعم اسكت انت عايزتودينا ورا الشمس ودا نابع من ثقافه اتربو عليها واتزرعت فيهم من تربيه بقى او من حجات كتير معروفه ياعم دا الناس بقت تخاف تتنفس
والله ليموتو مخنوقين
والله يا هشام العيب فى الناس اللى استقبلت التربيه اللى الحكومه ربيتهم عليها زى " من خاف سلم"
لك احترامى وخير الكلام السلام