تعالوا نوفر في الكهرباء

[avatar22]

اولا ازيكم وانا اسف اني بقالي فنره كبيره ما بدخلش علي الكافيه وما بسجلش مواضيع بس انا رجعت معاكم انهارده بموضوع جديد عايز اخد رايكم فيه .....
الموضوع هو بخصوص توفير وترشيد استهلاك الكهرباء ....
الحكومه قالت انه اتخذت خطوات جريئه وجديه لترشيد الطاقه الكهربيه في البلد اولها خفض نسبه الاضاءه في الشوارع بصراحه هيا خطوه كويسه ومفيش منها ضرر
بس المشكله هنا في ايه ... هو ان ازاي هتقلل اضاءه الشوارع اللي مفيهاش اضاءه اصلا دي حاجه ؛ والحاجه التانيه بخصوص اللمبات الموفره ثبت اخيرا انها تسبب امراض تؤدي الي الموت احيانا وخصوصا ان الشعب المصري معندوش درايه كامله بكيقيه استخدامها فلنفرض مثلا ان اي حد في البيت عنده لمبه موفره واتكسرت ايه اللي ممكن يعمله هيلمها بايده وهنا بقي الخطر لان الماده اللي جوه اللمبه مليانه امراض وسموم ده بجد الخطر اللي عايزن نلاقيله حل
تالت حاجه بجد القرار اللي مطروح علي مجلس الوزراء بخصوص غلق المحلات التجاريه ليلا حفاظا علي الطاقه الكهربيه وترشيدها هل من الممكن ان ده يحصل فعلا
وهل احنا كشعب هنقدر نستغني عن عمل المحلات التجاريه ليلا . بجد ياجماعه يمكن اكون ما اقدرتش اوصل اللي انا عايز اعبر عنه بطريقه كويسه لكن كل اللي يهمني هل فعلا حد عنده حل للازمه دي رغم انها ممكن ما تكونش ازمه .
اسف للاطاله وتقبلوا مروري

[دره]

حلوه اسف للاطاله وتقبلوا مروري دى دانت صاحب الموضوع
عموما
انا بقى مش بقتنع كلام الحكومه اصلا
عندك مثلا النهارده الكهربا قطعت اربع مرات فى اوقات محرجه بالمره
يعنى وقت الظهر والعصر والمغرب وبعد العشا
دا توفير بقى ولا بيادبو الناس
حسبى الله ونعم الوكيل فيهم
وفكره موضوعك حلوه اوى

[مونه]

هو لسه حد بسمع كلامهم ومقتنع بيه
والله عندكى حق ياأسماء
بارك الله فيك
وجزاك الله خيراً

[معا لنصرة ديننا]

للأسف الشوراع عندنا طافين ناحية من الشارع بطول المنطقة والناحية التانية والعة
دا كان يوم أنا قلت في بالي أكيد بكرة هيطفوا الناحية اللي كانت والعه ويولعوا اللي كانت طافية العكس يعني
لقيتهم طافين كله أنا بصراحة ماشي بضحك بجد حاجة تضحك
والغريبة انك تمشوا بالنهار تلاقوا عواميد الانارة بالشوارع والعة !!!!!!!!!

[هشام اللول1]

هو موضوع جميل جدا
بس انا عاوز اعرف

في مصلحه مين ترشيد الكهرباء ...؟؟؟؟
وخلاص ازمه نهر النيل اطبقت فعلا واصبح السد العالي لا يولد طاقه كهربائيه مثل قبل الازمه ..؟؟؟
وازاي احنا فتحنا خط تصدير طاقه كهربائيه للسعوديه وطالبين ترشيد مننا ...؟؟؟
وهل الترشيد ده مطبق علي المسئولين برده ولا عامه الشعب فقط ...؟؟؟

كلها تساؤلات نفسي بجد اعرف اجوابته


شكرا لطرح الجميل
وبارك الله فيك وحفظك ورعاك

[ايسل]

اولا حمدلله بالسلامه
ثانيا انا دخلت موضوعك اشوفك كاتب ايه عن التوفير راح والله العظيم النور قطع ساعتين وامتى بقى الساعه 3 يعنى موتنا من الحر المهم عايزه اقولك ان هما بيوفروا متقلقش عليهم
بس عايزه اقولك ان اللى بيحصل ده الفشل بعينه
مصر بحالها بقى عندها ازمة كهربا
ده فشل ذريع فى ادارة البلد هما مش فاضين غير فى النهب بس هيعملوا ليه مشاريع علشان يعوضوا الكثافه السكانيه والتغير المناخى اللى خلى الحراره مرتفعه هما مش فاضين غير للخراب
لا حول الله ربنا يصبرنا
شكرا لموضوعك

[عفريت أفندى]

من الآخر

كله كلام ف كلام

و لو حصل و نفذوا كلامهم و فعلا وفروا ف الكهربا

هينهبوا اللى وفروه بأى شكل من الأشكال

يعنى خربانه خربانه

و الشعب المسكين اللى هيشيل الليله كلها

يعنى هيعيش فى ضلمه و مش هيستفيد من التوفير

فلوس التوفير هتلاقيها بحححححححححح

معلشى نظرة متشائمه انا عارف لكن موضوعيه بالنسبه لتجاربنا مع حكومة الفشل

يجعل يومك منور على طوووووووول

[avatar22]

اولا اشكر كل من قام بالرد وكلامك جميل جدا وكنت اتوقع ده منكم لاني واثق انكم متفهمين الموقف بس في سؤال عايز اسالو
هو احنا لغايه امتي هنفضل نتسرق
شكرا لاهتمامكم

[king of sadness]

يعنى نطلع من مشكلة رغيف العيش ندخل فى مشكلة المية وبعدين ندخل فى مشكلة الكهرباء ... هى الحكومة عاوزة مننا إيه ؟؟؟
ممكن يكونوا عاوزين يبيعوا الباقى من مصر والناس الى عاوزين يشتروها عاوزينها فاضيه مفيهاش سكان علشان كدة عاوزين يطفشوفنا من البلد ؟؟؟
وعلى رائ المطرب الكبير تامر عاشور ... دة حلال دة ولا حرام ولا أعمل إيه ياسوزان دة ما حسنى حيجننى ويموت السكان