ممكن حد يحس بيا ويفهمنى ويساعدنى

[دموع الاقمر]

بسم الله الرحمن الرحيم
السلام عليكم اجمعين


ممكن حد يفهمنى ويحس بيا ويقولى اعمل اية ممكن

انا دلوقتى مش عارفة اعمل اية انا هحكى الموضوع من اولة خالص بس ياريت محدش يمل منى اوك
اولا انا حبيت شخص صدفة وهو مش من بلدى من بلد تانية
وحبيتة اوى وهو كان معايا زى الملاك مبيحبش يزعلنى خالص كان بيخاف انة يزعلنى وبعد فترة انا بعدت عنة بس قولتلة ان مينفعش اننا نكمل عشان متقدملي عريس وكدة هو كان اول انسان في حياتى بس انا متخطبتش لانى مرضتش بية ومقدرتش انسى الي بحبة وحولت ارجعلة بس هو مكنش يعرف اننا سبت الي كنت هتخطبلة واتهمنى انى انانية ولقيت ان العريس جاهز فوفقت بية وسبتة عشان ظروفة المادية وحشة شواية واتهمنى انى خاينة ومقدرتش اصارحة اننا متخطبتش وبعدنا سنتين وبعد السنتين اكلمنا وعرف الحقيقة وقربنا لبعض بس هو رجع انسان احيانا غريب واحيانا زى العادة انة بيزعل بسرعة انة مخنوق علي طول بس انا عارفة ان دة بسبب انة ظروفة المادية صعبة وهو مضايق عشان كدة وعايز يتقدملي بس مافيش فلوس تكبرة قدام اهلي كدة ياعنى وبعد فترة هو بعد عنى ومن غير ميقولى لية ولما كنت بكلمة كان صحابة يردوا عليا ويقلولى انة خطب او مش عايز يكلمنى خالة حد من صحابة يكلمنى معاكسة ياعنى
وبعد كدة انا حولت انساة وابعد عنة بس مقدرتش كان قلبي دايما يقولى انة لسة بيحبنى انة حبنى ومش ممكن يعمل فيا كدة وحولت انسى بس مقدرتش وقبلت انسان بيحبنى اوى وبيموت فيا حولت انسي حبيبي بية بس مقدرتش ومش قادرة انسى حبيبي وبعذب نفسي لما بكون مع الي بيحبنى وخايفة اسيبة لانة بيقولى لو سبتنى يبقي الموت اهون وكدة وانا بعذب نفسي دايما وانا معاة وبظلم نفسي كدة والمشكلة الاكبر ان الي بحبة لما روحت بلدة من اسبوع وشوفتة نسيت اى زعل وهو كلمنى وكلمنا وقالي انى وحشتة اوى بس كان باين علية انة تعبان الموضوع دة من يومين كدة ولسة مكلمناش في الي حصل انا مش عارفة اعمل اية ومش قادرة انسي الي بحبة وحاسة انة زى لانة حلف علي المصحف انة بيحبنى وهيفضل جامبى والي بحبة شوفت معاة كل حاجة حلوة وهو كل حياتى انا بجد مش عارفة اعمل اية خايفة باردة ارجع للى بحبة يبعد تانى وخايفة ابعد عنة قلبي عمرة مهيسامحنى ومش هقدر اعيش من غيرة ارجوكوا حد يساعدنى ويقولى اعمل اية مستنية الردود

[دموع الاقمر]

اية يا جماعة مافيش حد فهمنى خالص ولا حس بيا مرسي ليكم يا جماعة

[آيه محمد]

ايه يا قمر مزعله نفسك ليه انا لسه شايفه الموضوع دلوقتى

بس انا يمكن مش هعرف افيدك لأنى مش مع الحب اللى من النوع ده انا اللى يحبنى يدخل من الباب حتى ولو قالك ظروفى صعبه

يتقدم ويشرح ظروفه لأهلك وهما هيقدروه ويحترموه ....مش عايز يحب شويه ويهرب شويه!!

وانتى يا حبيبه قلبى متأمنيش لحد مهما ان كان حتى ولو كنتى واصقه فيه دا مش فى الزمن ده

علشان خاطرى فكرى فى كلامى شويه ومتزعليش منى انا تهمنى مصلحتك خدى اللى بيحبك لو شاريكى ودخل من الباب

عتعيشى مبسوطه معاه طول عمرك والحب هيجى بعدين بالعشره وانسى اللى بيقول بيحبك ومعملش خطوه واحده ايجابيه

وياريت تصلى صلاة استخاره واتمنى لكى التوفيق

[ملكه البحور]

انا كمان مع ايه محمد اني مش مع الحب اللي من النوع ده وعلي فكرة لو كان بيحبك صحيح كان اتقدملك حتي لو مش معاه يتجوز دلوقتي ....ومن كلامك هو بيشتغلك ومش بيحبك خااالص هو بس بيسلي وقته وخاااصه انه ساب صحابه يكلموكي وان كان رجعلك فده عشان هو في اجازه وبيشغل وقته كمان طريقه المعرفه اللي حصلت بنكم انك عرفتيه بالصدفه خطأ وبالتأكيد انتي مش تعرفي ولا اصله ولا فصله وهو بيضحك عليكي
(انا والله حاسه بيكي وبنصحك بالصح واللي المفروض تمشي عليه يعني غيري رقمك ومتتكلميش مع حد تاني بالطريقه دي)

[دموع الاقمر]

المشكلة يا اية انة متاكد انهم هيرفضوة وانا متاكدة انهم هيرفضوة انا قولت لماما قالتلي مش هنقبل بكدة ازاى ياعنى يجى طب هيقول اية دة تفكير ماما وبابا اكيد كدة وبعدين الي انا بحبة مافيش اطيب منة دموعى بتعذبة اكتر منى بس الي بيحبنى دة مش بحس من نحيتة باي حاجة انتى فهمانى

[دموع الاقمر]

يا ملكة البحور بصي انا ممكن اكون خطا بس معرفش انا حاسة انة بيحبنى وهو خلانى اكلم اختة ومعرفنى كل حاجة عنة وعن اهلة

[دموع الاقمر]

ياريت تفهمونى انا حاسة انكم مش فهمنى

[ايسل]

لا فهمينك وفهمينك كويس انتى بعتيه الاول وهو باعك فى التانى عادى متعادلين انتى بتديلوا مبرر ليه عايزانا نقولك حاولى تانى اه ده فعلا يمكن بيحبك لالالالا
اسمعينى مفروض كنتى خدتى بالك لما رجعتى انه اتغير وانتى حسيتى بتغيره واضح قوى انه ارتبط بس لما رجعتى كلمك زى طبع الرجاله كلهم بيكلمو وهما بيحبوا عادى زيادة الخير خيران بصى بقى خليكى جامده شويه وقويه مفيش حد يستاهل نحزن عليه ولا نضحى علشانه اجمدى وانسى واوعى تكلميه تانى كرامتك اهم من حبك فهمانى
وصدقينى كل حاجه صعبه فى اولها بس هتسهل وهتنسيه فى ثوانى هو ده كبيرهم ثوانى وربنا هيبعتلك نصيبك لحد باب بيتك
ربنا يوفقك ويسعدك يارب

[دموع الاقمر]

مرسي ليكي ايسل بجد فوقتينى مرسي ليكى اية وانتىملكة البحور انا هعمل زى مقولتولى اصلا انا حاسة اننا بموت نفسي اكتر وانا معاة ربنا يسامحة بقي علي عملة وهو انا فعلا حاسة انة بيتسالي بيا