السلام عليكم ورحمه الله وبركاته
انهارده هاتكلم علي نقطه غلاء الاسعار في رمضان وعلي موقف الشعب منها واللي بيحصل في البلد بسببها ..
شوفنا انهارده علي قنوات التليفزيون الاعتصمات اللي خرجت بيها قله من الناس احتجاجا علي غلاء الاسعار للسلع الغذائيه في رمضان وشفنا ازاي عبروا عن احتجاجهم وعن المجاعه اللي عايشين فيها بانهم رفعوا اطباق طعام فارغه تلميحا للحكومه علي غلاء الاسعار ... لكن السؤال اللي بيطرح نفسه دايما في المواقف اللي زي دي ايه موقف الحكومه وازاي هتتصرف ؟
النقطه التانيه مين السبب في غلاء الاسعار هل الحكومه ولا المستورد ولا التاجر ولا مين بالظبط .....
بس المشكله مش في كل دول ؟؟؟
المشكله مين هيحس بالمواطن الغلبان اللي ممكن يجي عليه رمضان وما يدوقش طعم اللحمه فيه وممكن كمان يفضل طول شهر رمضان محروم من كل حاجه حلوه في رمضان ... انا ما بقولش كده علشان حد يفتكر اني بقول ان رمضان اكل وشرب وبس لا طبعا بس الفقير عمره ما هيفكر في اي حاجه في الوقت اللي هو صايم فيه طول النهار غير في فطار كويس يسد بيه جوعه ....
رمضان معروف انه شهر الخير وشهر كل حاجه حلوه بس اللي بيحصل الايام دي بيخلي كل حاجه حلوه فيه بتروح
وما بيبقاش غير دعوات الناس الفقيره علي الحكومه وعلي كل واحد مسؤال عن اللي هما فيه
يا جماعه انا بجد مش عارف احنا هنستقبل رمضان ازاي واحنا في وسط كل الهموم والقرف ده عمرنا ما هنعرف نقف بين ايدين ربنا واحنا بنصلي ودماغنا عماله تفكر في البيت والعيال ومصاريفهم وهناكلهم ونشربهم ازاي في رمضان
كل ده هنضيع بيه اجر العمل بتاعنا ونبقي كاننا ما استفدناش من رمضان غير بالاكل والشرب ......
بصراحه انا مش عارف ايه الحل ...
سامحوني لو كنت اكثرت عليكم في الحديث بس كانوا كلمتين في قلبي ولازم اطلعهم