السواقه .... أدب

[Hooba]

السواقه ......أدب

قواعد السواقه في مصر ..

*******************************************

شعارنا............ عش ودعهم يموتون......بوند ..........جيمس بوند

القاعدة الأولى:
لو عربيتك كبيرة أو قديمة، أستخدم المبدأ القانوني: اللي خايف على عربيته يوسع!!
ملحوظة: ابعد عن سكة العربيات المخرشمة ، بيسوقوا بنظرية ضربوا الأعور على عينه!!

القاعده الثانيه:
البوز بيز Booze Base : اللي يدخل ببوز عربيته الأول للتقاطع هو صاحب أولوية المرور!
احرص على أن تكون صاحب أول بوز.
ملحوظة: لا تطبق الـ Booze Base مع أي لوري أو أتوبيس، حرصاً على بوزك لا مؤاخذة.

القاعدة الثالثة:
الإشارات تكشف نواياك للأعداء، أياك أن تستخدمها !

القاعدة الرابعة:
لا تترك مسافة للأمان بينك و بين السياة التي أمامك فهذا له عدة مخاطر:
1. عربية ثانية حتملا الفراغ في ثواني و برضوه ما يبقاش فيه مسافة بينك و بين الي قدامك، كل الي كسبته انك اتأخرت لورا شوية.
2. حتدي فرصة للعيال يعملوا غرز قدامك .
3. كل المشاة حيغمضوا عينيهم و يعدوا من الحته دي.
4. الي وراك حيقعد يزمر - لو كان مؤدب - أو تسمع شوية أسامي حيوانات لو كان سواق تاكسي - مؤدب - ، أو حيخبطك من ورا لو كان سواق ميكروباص - و دول مفيش حد منهم مؤدب -.
الإشارات مش معمولة علشان تنظم المرور ، معمولة علشان شكل المدينة يبقى متحضر بس!
اعتمد على العساكر ( مع تحملك كامل المسؤلية لو واحد منهم شاورلك تعدي و بلدياته الناحية الثانية فتح السكة للوري ) أو يفضل أن تستعمل البوز بيز ( راجع القاعدة الثانية ).

القاعدة الخامسة:
اذا كنت مش واقف في الصف الأول في الاشارة اعمل حسابك تزمر بشكل متواصل و هستيري أول ما الأشارة تفتح، لأن الناس الي قدام بيبقوا واقفين في الاشارة من زمان و جايز جداً يكونوا ناموا!!

القاعدة السادسة:
معظم الحوادث تحدث في التقاطعات أول الأشارة ما تحمر، كل ما عديت الإشارة الحمراء أسرع كل ما قلت فرصة انك تتخبط!

القاعدة السابعة:
الشارع مكان مقرف، سوق بأسرع ما يمكن حتى تتخلص من هذا الهم بسرعة،
الناس الي ماشيين بالراحة مرضى نفسيين بيستمتعوا بالعذاب ، يستاهلوا الي يجرى لهم.

القاعدة الثامنة:
من حقوقك الدستورية أن تركن أمام باب المحل الذي تريد أن تشتري منه،
اذا سبقك واحد ابن ستين في سبعين و ركن قدام الباب،
فمن حقك أن تقفل عليه و تركن صف ثاني أو ثالث، و مش مهم لو الشارع اتقفل، ايه يعني أما الناس تتعطل عشر دقائق علشان تستمتع بحقوقك الدستورية؟ هيا يعني الدنيا طارت ولا كان وراهم الديوان؟

القاعدة التاسعة:
من حقك أيضاً أن تخرج من مكان انتظارك في أي لحظة تشاء، اكسر الدركسيون شمال و اطلع، أي حد ماشي في الشارع لازم يقف لك فوراً، راجع البند السابق .

القاعدة العاشرة:
إحترس من ثلاث أنواع من السائقيين بيسوقوا و كأنهم مش ممكن يموتوا:
1. العيال الروشين الي بيلعبوا Computer Games و فاكريين إن ممكن يكسبوا Life زيادة لو ساقوا أسرع.
2. موتوسيكلات توصيل الطلبات ( Home Delivery ).
3. سواقين الميكروباص.
ملحوظة: إوعى تحاول تثبت لحد منهم إن فكرته غلط. فاهمني!!!.

القاعدة الحادية عشر:
لما تشوف حادثة لازم تهدي و تتفرج - مش مهم تساعد - الحجات دي دمها أخف من الأخبار المملة بتاعة التلفيزيون، و بعدين لما الطريق وراك يقف تحمي المجتمع من حادثة تانية.

القاعدة الثانية عشر:
الكناسين لازم يحللوا اللقمة الي بياكلوها، حاول تنفعهم و ترمي أي حاجة من الشباك.

القاعدة الثالثة عشر:
لما تخلص سيجارة أوعى تحطها في الطفاية، ارميها من الشباك أول ما تشوف واحد بموتوسيكل معدي جنبك ( علشان يحرم يعمل غرز ).

القاعدة الرابعة عشر:
من حقك أن تعبر الشارع في أي وقت و من أي مكان.

القاعدة الخامسة عشر:
اذا كان هناك سيارة قادمة اعمل نفسك مش واخد بالك و عدي براحتك خالص،ما تخافش، هوا حيقف، هو اهبل يدوسك و يودي نفسه في داهية؟
القاعدة السادسة عشر:
اياك أن تنظر نحو السيارات القادمة، أعبر الطريق و ظهرك لها حتى لا يشك أحد قائدي السيارات أنك تراه و يحاول يخوفك علشان تقف انت.

القاعدة السابعة عشر:
حتى لو شفته أوعى تخاف - خصوصاً لو معاك مراتك - تبقى راجل ملو هدومك و تخاف من حته عربية؟
عرض قفاك و سيبه يتفلق.

القاعدة الثامنة عشر:
الرصيف ليس للمشاه، بل لركن السيارات و فرشات الباعة الجائليين و المحلات... الخ،
لذلك يحق للمشاة السير في وسط الشارع، لمزيد من الأمان، راجع القاعدة السابقة .

القاعدة التاسعة عشر:
إذا كان الماشي من فئة النقل الثقيل، فمن أبسط حقوقة إنه يمشي على أقل من مهله و يهتز براحته. واللي مش عاجبة الهز يدور على لوري يخبطة....

[Hooba]

طبعا السواقه أدب .... وهو حد قال غير كده ؟؟؟؟؟

[طيف عابر]

لا ده ادب وكتير كمان
واكيد نصائح طريقها القبر او السجن لا محاله
تسلم هوبا
مشكور جدا

[السيد النمرسى]

مشكوووووور ياغالى


تسلم ايدك

[×X× sHeKo0o0o ×X×]

هههههههههههه
فعلن السواقه ادب و مش هز دريكسيون
مشكوووووور هوبا على القواعد الجميله دى

[اسيرة الغربه]

ههههههههههه

والله فعلا ده اللي بيحصل انا بستغرب جداااااااااا

لما بنزل مصر من المهذله اللي بشوفها في السواقه

بس قواع رائعه جدااااااااااا

لازم نتبعها كلها عشان نبقي احسن دول العالم!!!!!!!!!!

[Hooba]

ههههههه .....هههههههه .... أحسن دول العالم ؟؟؟؟ ....
الكلام ده تقوليه في قسم الشرطه حضرتك
هههههههه هههههههه ههههههههه هههههههههه

[ساندرا]

يجزيك الخير اخى هوبا
شكرا على الموضوع الجميل

[Low Battery]

جااااااااااااامد ..
انا بقى هظيط بحقى الدستوري .. وانت المسئول يا هوبه
بس..

[خوخا]

ههههههههههههههههههههه
دى حرب مش سواقة
دا انت شرير اووووووووووى