بنات آآخر زمن .. !!!

**Hooba** · 11 - 4 - 2008, 07:01 PM

الحب عند البنات .. يسير وفقا لسياسة الباب الموارب ..
بمعنى أصح .. لا بيرحموا ولا بيسيبوا رحمة ربنا تنزل!

انت الوحيد اللى قدر يفهمنى من أول مرة..
أنا لو فكرت أتجوز بعد الشر.. يعنى أكيد هأتجوزك ..
بس بجد احنا لسه أصحاب.
انا مش عارفه انا اتشديت لك بسرعه كده ازاي

الكام كلمة دول هما الكلمات الاكثر تداولاً لدى البنات وهما طريقهم وملخص لاسلوبهم فى التلاعب علينا يا ولاد يا مساكين قدام كيدهن العظيم ، تلاقى البنت من دول من أول مرة تشوفك فيها وأسلوب كلامها يتغير وتبدأ تقرب منك ولو اتشديت ليها أكيد انت كمان حتقرب لها وبمجرد ما تقرب انت منها تبدأ هى ترسم خط بينكم أو شعرة بتسيبها دايما بين انكم تكونوا أصحاب أو بتحبوا بعض هى بتكون خايفة انها تحبك وانت ما تحبهاش فعشان ما تطلعش ضعيفة أو يكون الحب من طرف واحد بتقوم تظهر وكأنها صديقتك وليست حبيبتك ، تبقوا مع بعض فى الجامعة وقاعدين بتتكلموا فى أى حاجة وفجأة تسييبك وتقعد تتكلم مع أى حد من أصحابها التانيين ولما تيجى تعاتبها ترد عليك بكل براءه :
فيه ايه .. انت بتغير عليا ؟!"
وكأنها لا تسأل بل تتعجب وكأنها تقول " فوق يا أحمد احنا أصحاب " وتبدأ انت بالتعامل مع الموقف على هذا الاساس وتنحى مشاعر الحب جانبا وتبدأ تتعامل معها على أنها صاحبتك لغاية ما تفوق تحبك ولو حصل وشافتك واقف مع بنت بتتكلم معاها فترة طويلة أو اتخانقت مع ولد عشان بنت تانية تقوم تقولك وهى بتزعق
" انت سايبنى واقفة هنا وعمال تتخانق وتتسرمح مع البنات؟ "
تقوم ترد انت عليها في خبث
" ايه . انت بتغيرى عليا ولا ايه؟! "
ويعود الشد والجذب ولما تحس ان الشعرة اللى بينكم بدأت تكبر تقوم ترفعها وتقرب تقطعها وتقولك لو سمحت ما تكلمش فلانة أصلى مش بأستريح لها خالص ولا فلانة عشان مسهوكة زيادة عن اللزوم ولا فلانة ولا فلانة ولا فلانة ولو كلمت فلانة الفلانية دى بقى يبقى تنسى إنك عرفتنى خالص ..
لتطول مقصلتها رقاب كل البنات اللى على موبايلك لتعود وتسألها " ايه انت بتغيرى ؟"
وكرد فعل لهذه الخية المفاجئة منها والغيرة المفاجئة برضه تبدأ انت تحن وتقرب منها أكثر.. وتخفف كلامك مع الناس اللى هى بتكرههم
وبعدين يا أخى فجأة وبدون سابق انذار تيجى تقولك " على فكرة يا أحمد أنا كنت عاوزة أقولك على حاجة مهمة أنا فى واحد حبيته وبما اننا أصحاب كان لازم أنت اول واحد يعرف" تمالك أعصابك وما تسبلهاش عنيك إمسك نفسك يا لوح, عادى هى دى البنات وأكثر من كده ،
والمفروض انك تقولها " بصراحة أنا ما كنتش مصدق اننا متوافقين بالشكل الغريب ده.. أنا كمان فيه واحدة بأحبها وكان لازم تكونى أول واحدة تعرف" _ نصيحة _اختار احدى الفلانات التى اشتكت منهن ولتكن أول فلانة فى قائمة الممنوعات وعلى ضمانتى ستقطع الشعرة وتحرقها.