أيزيس للشاعر هشام م الجخ (قصيدة جميله )

[thesniper_12007]

نفسي أنام فينك؟

يا ام الرموش عنقريب
(العنقريب سرير يصنعه اهل النوبة من الجريد)
ماتدمّعيش عينك
الفرح جاي عن قريب

إيزيس

إزاي بتتحمّل؟؟
أنساها .. وتجيني ..
أسقي بنات الدنيا إلاّها
ولما العطش يكويني أقاها
هي اللي تسقيني
تهديني يوم وردة
أدِّيها لفلانة
تجري على حضني احكيلها عن نانا

إزاي بتتحمّل؟
غمز البنات واوعر من غمزهم ردِّي
جاياني ملهوفة ما تلاقي غير صدِّي
أحزن في أحضانها وافرح هناك وحدي
يا ام القليب اتخلق معرفش غير يِدِّي

يا ام الفؤاد ولاّد
معرفش غير يعشق
الصبر عدّى وزاد
يا قلبها المتقاد
ما عرِفت يوم تزهق
كانت بتلبس لي اجمل فساتينها
ترمي ف صحاريا أفتن بساتينها
تِدْمع رياحينها
ولا قلبي يوم يشفق

وإزاي بتتحمل ؟؟؟
كُتر الكلام عني بحكاوي وانا غايب
الليلة كان سهران
الليلة كان سكران
الليله كان عاشق
والليله كان دايب
ام الرموش طايشة وام العيون لامّة
حضنك ما حيسعنيش انا بَلْوِتي طامّة
اربع سنين يا هوا مِلْكِيّتي عامّة

كل البنات اتلبّنوا بيا وتفُّوني
ورسموني خروف معلوف وسمعوا قصايد وابتسموا
وصحيم بدري يوم العيد ودبحوني
بقالي ييجي اربع سنين مسمار في غيط شواكيش
دَقُّوا على راسي لكن مثبتونيش
يوم التقي مرسى وسنين ياخدني الطيش

كل الالم فيّا ومش قادر اتألم
وبتصعبي عليا ومش بقدر اتكلم
انا نفسي بس افهم
كل البلاوي ديا ازاي مابعّدوكيش

سامحيني لما اغلط
وانا تاني رايح اغلط لجلٍ تسامحيني
احلى ما في التوهان اول ما باجي اوصل
واحلى ما في الاحزان انك تضميني

يا مسكناني ضلوع
جواكي راح وبراح
ما بينلهاشي رجوع
شكلي حاموت سواح

كان نفسي فيكي زمان
أياميها كان لي قلب
كانت الحياة خضرا
النخلة والبقرة
والقلب طين ابيض بينام على القرآن
وبيصحى وقت الحَلْب
اياميها كان لي قلب
ايه اللي قلب النور ضلمة وليل راسي؟
واشمعنى فوق راسي يحلا العذاب والقلب؟
واشمعنى سابوا الناس بقلوب خضار وعمار ؟
وف قلبي نِزْلوا سَلْب ؟
انا اول اللي اتصلب بس التاريخ كداب مفهمش معنى الصلب
ركعوا البنات ليا واتّنّوا قدامي
وفي حفل اعدامي
ضحكوا وقالوا كلب

انتي اللي دمّعتي
جمّعتي جسماني من مملكة ايزوريس
ويا ريت ما جمّعتي
طب كنتي سبتيني
ادخل هنا غزوة واعمل هنا هُدْنة
وما دمت انا ميت ايه تِفْرِق الدفنة؟
ما البحر راح يسبق لو مهما جدّفنا
انتي اللي بتعاندي عشمانة في الجنة
والجنة مش ليا

إزاي بتتحمل لوم الصحاب فيا؟؟
على ايه غرامك بيه؟
ده التبن من تحتيه
باقي الماعون مية
تضحك على قولهم وتبص في الساعة وتقول زمانه صِحِي
زيدي كمان نورك يا ام الجبين الضَّحِي
جَنّنِي صوت حزنك إياكي يوم تفرحي
لا الفرحة تسرقنا

لا انا حِمل مهرك ودهبك ولا جاي معاي عاجِك
ولا حمل توب من حريرك ولا ماسة من تاجك
ده انا بالكتير حاجج من وسط حجاجك
جيت لك في شهر حرام فمتهدريش دمي
ماتقربيش مني مانتيش كِفَا همي
وَلِّي لحجاجك يا ام الجبين عرفات
حبك كما الصلوات والقِبلة مش يَمِّي

يا معلماني الهوا ومسَكِّنة التباريح
حبك نخيل طارح ميهزهوش الريح
أرمي الحجر جارح تنزِل رطب مجاريح
إزاي بتتكسر اشواكي جواكي
ابكي على صدرك القى البكا تفاريح

إزاي بتتغير دنيايا جوايا اول ما اكون جنبك
وإزاي يجيلك صبر تنشفي بكايا والذنب مش ذنبك
انا الاعمى
جفاني الحب ونسيته على ايدين اللي تتسمى ما تتسمى
قطع راسي على خوانة ولا كَبَّر ولا سمّى
ولا سابني اموت مستور ولمّ عليا ميت لمّة
وذنبك ايه بقية السكة تقضيها بعجوز اعمى؟

انا اللي الناس بتخشاني هوا ومنظر
هموم الدنيا خاشاني وبتمنظر
وعايش عيشة خشّاني وبتغندر
وبتلكلك في حضن الليل سُكّيتي
عواصفي فوق حدود وصفي
وبابك صعب يتحمل عواصف مهما سَكّيتي

انا المدبوح ولما تقول لي حبيتك بحس دماغي واكلاني
اردّ بايه على بنيّة في كل كيانها شايلاني
انا المجرم وانا القاسي وانا اللي نسيتها ميت مرة ما نسيتني
ومشيتها في دروب مرة ما ملّتني
وداست ع الطريق حافية وسلّتني
وصحيت بدري وقت الفجر صلّتني

ارد بايه؟
وقلبها سابها في متاهة
قليل الاصل غَيَّاها
وقلبي التاني قسّاني وقلّ باصله ويّاها

غرامك يا ام طيف مخمل بيتجمّل
ويفرش صدري بالعنبر وبالمحمل
انا المعشوق يا كل العاشقين غيروا
تحبوا شيء جميل طبعا لكن تتحبوا ده الاجمل
حبيبتي احلى من شعري واحلى م الحروف كُمَّل
ولا بتهجر ولا بتغدر ولا بظلمها تتململ
لكني في حيرتي بستغرب
انا ازاي مش بغني لها ؟
وهي ازاي بتتحمل؟؟؟؟

[اميره بلا وطن]

بتسأل ليه بتتحمّل؟
وليه بتحب وتخاطر
وفى عيونك ورغم الليل بتتأمّل
وراضيه معاك اهى تكمّل
وانت القاسى والناسى
وترضيها تقول اهلى تقول ناسى
وتجرحها مصممه برده تكمّل
ماتسأل ليه وتتاكد
وروحك عندها اجابه خلاص اسأل ماتتردد
ورغم انك عرفت كتير
بنات تكذب وتتجمّل
وترميك لما تتسلى
تقولك من هنا يلا
وهى اصيله ومسامحه
ومجروحه ومش جارحه
وبرضو مصممه تكمّل

بصراحه يااكرام قصيده اكثر من رائعه لشاعر اكثر من رااااائع

[thesniper_12007]

والله بصراحه لما تسمعيها أجمل بكثير وتعليقك جميل بس انا عايز اعرف اشمعنى بعد شهر ونص عايز افهم اعتبريها فضول
اشكرك على مرورك الطيب الكريم
تقبل تحياتي
لك خالص ودي وتقدير واحترامي

[thesniper_12007]

فين الردود

[حرف مشتعل]

كلام فيه من الالم والاه ما يجعل سراب السنين العجاف
تقف عند محطه وصول واحده
ليتكون غديرا يرتوى فيه كل من به وله
اثرت ان تخرج على هيئه حروف مهاجره
لا تعترف بشواطىء الراحه
كلمات موجعه حد السيف اكرام
صدق هذه هى ايزيس...
سلمت لنا الروح واليمين

[thesniper_12007]

كلام فيه من الالم والاه ما يجعل سراب السنين العجاف
تقف عند محطه وصول واحده
ليتكون غديرا يرتوى فيه كل من به وله
اثرت ان تخرج على هيئه حروف مهاجره
لا تعترف بشواطىء الراحه
كلمات موجعه حد السيف اكرام
صدق هذه هى ايزيس...
سلمت لنا الروح واليمين

نعم هذه هي ايزيس (الشيماء) احسها في نبضك وأشتمها في قلبك اللاهث خلف الأماني المزركشة والأمل القريب البعيد
أختي حرف كلمات هذه القصيدة أحسها أنت وكأن الشاعر هشام الجخ استوحى فكرة القصيدة من حرف مشتعل
أراح الله قلبك أختي الحبيبه
دمت بود ودام لنا قلمك وإبداعك
وافر تحياتي وجل احترامي

[العاشقة المجروحة]

يا معلماني الهوا ومسَكِّنة التباريح
حبك نخيل طارح ميهزهوش الريح
أرمي الحجر جارح تنزِل رطب مجاريح
إزاي بتتكسر اشواكي جواكي
ابكي على صدرك القى البكا تفاريح

إزاي بتتغير دنيايا جوايا اول ما اكون جنبك
وإزاي يجيلك صبر تنشفي بكايا والذنب مش ذنبك

بصراحة القصيدة كلها تحفة
ومعانيها جميلة
وواقعية جدا
يسلم اختيارك يا اكرام
دمت بكل الود والتقدير

[thesniper_12007]

يا معلماني الهوا ومسَكِّنة التباريح
حبك نخيل طارح ميهزهوش الريح
أرمي الحجر جارح تنزِل رطب مجاريح
إزاي بتتكسر اشواكي جواكي
ابكي على صدرك القى البكا تفاريح

إزاي بتتغير دنيايا جوايا اول ما اكون جنبك
وإزاي يجيلك صبر تنشفي بكايا والذنب مش ذنبك

بصراحة القصيدة كلها تحفة
ومعانيها جميلة
وواقعية جدا
يسلم اختيارك يا اكرام
دمت بكل الود والتقدير

شوفي يا سماح احساسك بكلماتها أد أيه وكمان يا سلام لما تسمعيها حاجه خرافه لأن تعابير وجهه بتقول كلام القصيدة هتلاقي الحاجات دي على اليوتيوب
أشكرك على مرورك الطيب الكريم
وافر تحياتي وجل احترامي