أنا لسه مفركشه ....!!!!

[Hooba]

خلاص بقا...إهدىِ وإمسحى دموعك دى؛وبطلى نهنهه...صدعتينى.

-أصلى بحبه أوى

- حَبِك بُرص، حب إيه دا يا بنتى؟! دا كان مجرد "خطيبك" يعنى مشروع جواز ومفيش نصيب،، فشل قبل ما يبتدى.

- كل دا وماكنش إبتدا؟؟! بعد سنتين؟!

- عادى يعنى..ممكن بعد 5 سنين كمان، مش صعب، مادام مفيش نصيب يبقا خلاص ..إنسى الموضوع؛ بيبقوا متجوزين وبيتطلقوا.

- أنا إتعلقت بيه أوى وحبيته خالص، حاسه إنى مش هأدر أعيش من غيره، ومن غير كلامه وابتسامته وصوته ع التليفون.

- جينا للكلام الفارغ..إنتِ عاوزه السَّكْ على دماغك علشان تفوئى، راسك هى مصدر الخطأ فلو إنضربتى عليها الأمور هترجع لطبيعتها؛؛ إنتِ هبله يا بنتى؟ مفيش حد بيموت علشان حد سابه،دى أعمار، ولو كنتى إتعلقتى بيه فدى غلطتك؛ كان لازم تِحّكِمى عقلك وتخليه يسيطر على عواطفك شويه.

- يعنى مكنتش أحبه؟؟ طب إزاى دى إذا كان المفروض إنه هيبآ جوزى!!

- هو إيه إللى "مفروض"؟؟ إنتِ بتأكديلى إنك فعلاً هبله وتستاهلى إللى يجرالك. عارفه يعنى إيه "خطوبه"؟؟ يعنى واحد بيجى يتعرف على واحده "محترمه وبنت ناس" فى وسط أهلها يزورهم ويتكلم معاها فى وجود حد من أهلها ،كل واحد بيقول إللى عنده ويتعرفوا على ظروف بعض من كل النواحى ويا نفعت الحكايه ووصلت للمأذون يا إما ما نفعت و"تتفركش" وكل واحد يدور على طريق جديد ويشوف نصيبه فى حته تانيه. يعنى مش دايماً ( الخطوبه = الجواز) ولا حتى فى الأفلام العربى.

- إنتِ إنسانه جافه ومش حاسه بىَّ ، أنا كنت رتبت حياتى عليه وإعتبرته جوزى فعلاً.

- إيه؟؟!..سنتك....ونهارك ما يعلم بيه إلا ربنا، يعنى إيه دا بقا إعتبرتيه "جوزك"..هنستهبل؟؟

- لا لا، والله مش قصدى، قصدى يعنى إنى كنت برسم المستقبل وأفكر فيه دايماً وهو معايا وإحنا مع بعض وعايشين سوا.

- آه..بحسب . بصى يا هانم يا بنت الناس، بالنسبه لكلمتك إنى مش حاسه بيكى فإنتِ غلطانه ؛لأنك صديقتى الوحيده من أول ما اتولدنا ودا محسسنى ان انا إنتِ وانتِ أنا وأظنك متأكده من ده، أما حكاية إنى "جافه" دى فبردو إنت عارفانى كويس، ممكن تقولى عقلانيه أو منطقيه. ربنا خلق لنا العواطف علشان نحب..ماشى، بس بردو خلق لنا العقل علشان نتحكم فى الحب ده و"نمنطقه"؛يعنى نحزمه أو نعمل له لجام علشام ميخدش حريته أوى ويدوس إللى أودامه. فاهمه؟

- يعنى كنت أقول لقلبى ميحبهوش؟؟

- أنا مقلتش كدا..حبيه، بس ف "العادى يعنى"، على أساس إنه حاجه مش مؤكده ،لما يبقا جوزك تبقى حبيه براحتك ع الآخر ومن غير حدود، إعدمى المنطق والعقل وحبيه بجنون، والله ماحد هيؤولك أى حاجه وقتها لأنه من حقك وحقه. لكن فى الخطوبه الأمر مختلف، مهما كان الشخص كويس "البنت أو الولد" أكيد بتكون فى مشاكل، ساعات ممكن الحب ده يخلينا نتجاهل المشاكل دى رغم أهميتها بس بنندم بعدين، لعلمك..أنا بحترم إللى كان خطيبك ده أوى ،لأنه كان واضح وعرف إنه مينفعش تكملوا دلوقت أحسن من بعدين وفركشة الخطوبه أرحم بكتييييييير من الطلاق وكان ممكن يكون فى أولاد يعنى ضحايا وكمان جرحك وجرحه كان هيبقا أكبر وأعمق. خدى إللى حصل دا ببساطه وإنه رحمه من ربنا؛ ياما ناس كانوا كاتبين كتاب واتطلقوا قبل الفرح بكام يوم، إنتِ أهون بكتير.

- بس أنا كان نفسى أحب وأتحب، لا عمرنا كلمنا ولاد ولا مشينا معاهم، كنت مستنيه الخطوبه دى علشان أعيش حياتى بقا وأفرح بيها شويه.

- يا خبر أبيض على هيافة البنات!! ناقص تقوليلى إنك كنتى عاوزه تتجوزى علشان تلبسى فستان الفرح وتقعدى فى الكوشه وترقصى مع العريس!! إكبرى بقا شوى واعرفى ان كل شئ بأوان إن مكنش دلوأت هيبقا بعدين بس المهم من غير تسرع ، أهو إحنا بقا إللى بينطبق علينا المثل:" إتجوز بسرعه وإندم على مهل" والله ان شاء الله هتاخدى نصيبك وتعيشى حياتك زى ما ربنا مقدّر ،بس انسى اللى فات ده وخلاص ،بكره يبقا ذكرى.

- بس بردو "حبيته"،حسيت بحاجات كتيره وجديده معاه كلها حلوه.

- دا طبيعى ؛أولاً لأنك مؤدبه ودا أول حد فى حياتك، يعنى "أَمّلّه" جديده عليكى، ثانياً فترات الخطوبه معظمها لونها وردى ،لسه مفيش مسؤليات والمشاكل بنسمع عنها نظرى وكلام كتير حلو ، وما تنسى المقوله بتاعة "كل خاطب كاذب" ، وأرجع أقولك إنه مع كدل ده بردو خطيبك اسمه "راجل غريب" يعنى علاقتك العاطفيه بيه من بعيد لبعيد ولا حتى تخرجوا سوا لوحدكوا، ولا يمسك إيدك ، خليكى زى "فوزيه" فى مسرحية "سُك على بناتك" بنت جدعه بصحيح. متضحكيش ... والله بتكلم جد، خللى لحبك حدود إلزمى نفسك بيها وإجبريه هو كمان إنه يحترمها وما يتخطاها. حبيه...بس دايماً خللى فى ركن شغال فى مخك مش متخدر وبيفكر بطريقة "الله أعلم..جايز مش نصيبى" علشان لو لا قدر الله حصل "فركشه" متبقاش الصدمه كبيره كده لا ليكى ولا له. الركن الشغال ده هيظبط توازنك كله وما يخليكى تتهورى أو تندمى بعدين.

-إنتِ جايبه العقل دا منين؟؟ هو إحنا مش صحاب؟ والغريبه إنى متأكده إن قلبك رقيق وينجرح من الهوا. بس يمكن كلامك ده علشان لسه مجربتيش وزى ما بيقولوا :" إللى على البر عوام"؟؟!

-جايز علشان لسه ع البر، بس الأكيد إن علشان "قلبى بينجرح من الهوا" فلازم احميه واحصنه كويس ...سوا بقا بستاره حرير او جدار خرسانه من الدين والتقاليد بتاعتنا...المهم انه يكون فى أمان. ولما يبقا دورى ييجى يا ستى ولقيتينى بتهور ومديه عقلى أجازه تبقى فوقينى وفكرينى بكلامى. أومال إيه لزوم الأصدقاء ؟ جرس إنذار وقت اللزوم وضوت الضمير عند الضروره وإيد تضربك بالقلم لو لزم الأمر.

-إن شاء الله..بس تعرفى؟ أنا هاخد شوية وقت علشان أنساه، كل شوى هفتكر حاجه قالها أو عملها وابتسم لها واسرح معاها وبعدين أعيط عليه.

-يييييييه...خنقتينى، ارحمينى يرحمك ربنا، بصى...اشغلى نفسك، روحى اعملى حاجه مفيده وبلاش الفراغ ده ، دا الرسول عليه الصلاة والسلام كان بيستعيذ من وقت الفراغ. لو شغلتى نفسك بحاجه مفيده هتنسى بسرعه.

-طيب..حاضر..هحاااااااااول. بس والله كانت أيام حلوه.

-بصى يا بيضه..هؤولك حكمة العدد..الدنيا يا بنتى عامله زى النهر وأيامها هى الميه بتاعته، بتجرى وما بتقف، النقطه إللى عدت عليكى النهارده عدت على غيرك إمبارح وهتعدى على غيرك بكره ،وفى الآخر هتنزل المصب وتتوه فى البحر وما حدا يعرف يجيبها تانى. يعنى اليوم اللى بيفوت مش راااااجع تانى. خلاص سوا حلو او مر أهو عدا. مينفعش بقا نفضل عايشين على ذكراه ونعذب نفسنا يا ترى هيرجع ولا لأ؟؟ متخليش الماضى يضيَّع عليكى الحاضر والمستقبل. إحتسبى وأبشرى وإن شاء الله ربنا هيعوض عليكى وعلى خطيبك السابق كمان.

-أمرى لله.........الله يمسيه بالخير، كان عسوله أوى.

-مش بقولك لازم تنضربى على راسك مصدر الخطأ دى يمكن تتعدل وتفوقى وإحتمال بعدها يطلعلك فيها مخ.








هاااا ؟؟ إنتو بقي
رأيكم ايه؟؟

Hooba

[kokototy]

انا رأيى فعلا زى صحبتها ان هى دى فتره وهتعدى واكيد مكنش ليهم الخير فى بعض لان ربنا بيقول "قل لو علمتم الغيب لخترتم الواقع"
بس قلب البنات رهيف خاصه فى اول حب فى حياتها بتتسرع وتبنى كل املها وطموحاتها اللى كانت كتماها سنين لحد ما يجى الانسان المناسب
اكيد لازم الواحد يعمل اعاده اتزان نفسى لما يحصل معاه اى موقف زى كده من خلال استعداده دايما بمقوله "ما شاء الله كان وما لم يشىء لم يكن " واكيد ربنا شايل الاحسن ليها وليه
مواضيعك دايما جذابه
تسلم يا هوبه

[Young DeviL]

والله البت دي جدعه وتستاهل كل خير ربنا يرزقني بصديقه زيها يارب هيا فعلا لازم تسمع كلامها

[ملكة الاحزان]

فعلا لازم الانسان يحكم عقلة فى الحاجات ديه وفعلا نعم الصديقة الى تقف جنب صحبتها بهذا القدر من الصبر
تسلم ايديك ياهوبا على الحوار الجميل ده

[menna]

فعلا هى فترة بس مش هتعدى بسهولة ابدا دة بردو حب يا جماعة ولازم تزعل وتتجرح اكيد بس هتنسى فى يوم من الايام يعنى بس مش بسرعة

[طيف عابر]

موضوع رائع وبصراحة انا من رأي الصديقه كمان

ليوم اللى بيفوت مش راااااجع تانى. خلاص سوا حلو او مر أهو عدا. مينفعش بقا نفضل عايشين على ذكراه ونعذب نفسنا يا ترى هيرجع ولا لأ؟؟ متخليش الماضى يضيَّع عليكى الحاضر والمستقبل. إحتسبى وأبشرى وإن شاء الله ربنا هيعوض عليكى وعلى خطيبك السابق كمان.

[Hooba]

يا سلام عليكم يا اصحابي ... آرائكم في منتهي العقل والرزانه .. والبعد عن قشور الكلام في ردكم .. برافو برافو عليكم .. منتهي العقل واللهي ...
بجد تسلم ايديكم علي مشاركتكم ..

[ميشو مصريه]

اه طبعا الانسان لازم يحكم عقله ومش يتسرع بس الانسان في الغالب لما بيحب بيمشي حسب عواطفه واحساسه وقلبه

[Hooba]

برافو .. آدي الكلام ولا بلاش

[طيف عابر]

موضوع فائز في المرتبة الثانيه
في مسابقة ركن حواء استفتاء الاسبوع الثاني