ابو التفانين وابراهيم

[SCREEM]

ساعات تقول أنى أشعر بأن أيدً خفيه تعبث فى الظلام وده الي بيحصل دايما لما تأخذ زمبه أو مهموز يغير مسار حياتك ويقلبك زي فردة الشراب وفى قرارة نفسك عارف الفاعل الحقيقى ولكنك لا تستطيع أنك توجهله الأتهام أو حتى تعاتبه على فعلته.. وأبو التفانين الرايق لجأ المرادي إلى أسلوب جديد فى التخلص من معارضى الحكومه وبطريقة جديده أضرب المربوط يخاف السايب والحقيقة في العديد من الكتاب والصحفيين والنشطاء السياسيين متسيبيين ولكن بمزاج الحكومه طبعا أتفاق الخطوط المعروف ده خط أحمر وده أخضر وده (فحلقي) وجه الوقت لوقفهم وتلجيم ألسنتهم لفتره محدوده ولحد أنتهاء الأنتخابات وبعد كده يرجعو مرة تانيه لسيرك الصحافه وكان الضحية المرادي الصحفى والكاتب المشاغب أبراهيم عيسى رئيس تحرير الدستور وبدأت بالأستعانه بأبو التفانين الرايق وبعد ما ولع المحميتين وشد النفسين قال قولته الشهيره..


أللى ماتعرفش تسكته شدى الكرسى من تحتيه وأقلبه


فقاله مندوب الحكومه : حنرجع تانى لحكاية الكراسى مش كفاية شلنا الكرسى بتاع مصطفى بكرى
حفهمك ياحمار : البلد دى بتحكمها مجموعة من الكراسى وحكومتكم ماشاء الله ربنا يكتر من كراسيها اتوسعت قوى فى عمل الكراسى وكمان مصنع الكراسى عندكم شغال الله ينور بيعمل جميع المقاسات وجميع الموديلات حريمى ورجالى وأطفال
- مش دى كانت شورتك يا أبو التفانين أننا نتوسع فى مصنع الكراسى
- الكراسى الحكوميه ماشى ولكن فيه ناس ماعرفتش تحصل عليها فعملت كراسى عموله وأخذت صفة الشرعيه وبدون ترخيص من المصنع
- زى مين يا أبو التفانين
- زى كراسى الصحافه الأهليه والفضائيات وكراسى رجال الأعمال والأحزاب والتجار والفنانين كل ده ومش دريانين
- أزاى يا أبو التفانين ما هو أحنا أشترينا كراسى كتير من الصحافة وبعض الفاضائيات والقمر قمرنا وأللى مش عاجبه نلغيه أو نشوشر عليه ورجال الأعمال أنت أللى أشرت علينا ندخلهم فى الحكومه علشان ماحدش يلعب بديله ويساعد المعارضه والناس ماشيه زى الفل وأشترينا 3 أحزاب لحد دلوقتى
- لسه ياعمونا فيه كراسى كتير سايبه وبتعمل أللى هى عايزاه وده خطر عليكم فى الفتره أللى جايه .. قولى عايز أيه المره دى
- أبراهيم عيسى


- ماله سى أبراهيم ده كمان .. ماهو كان فى أديكم وكان ممكن ينطس 5 سنين زى أيمن نور وتخلصوا منه .. أديكم سيبتوه لحد ما أكتسب شعبيه على قفاكم أشربوا بقى
- يعنى أيه مش حتعرف تشيله من سكتنا بطريقتك ولا نتصرف أحنا ونصفيه قضاء وقدر ..
ابو التفانين - حنرجع تانى لشغل البلطجيه ماتنضفوا بقى .. جميع حركاتكم مفقوسه ولو عملتم كده حيتحول لشهيد وبطل قومى وقليل لو الشعب حط له تمثال فى ميدان التحرير.. أنا عندى خطه ماتخرش الميه
- قول يا أبو التفانين الجماعة مستعجلين
- ولع محميتين وأرمى بياضك وسيبنى أفكر وأرد عليك
- الخطه ياسيدى تشتروا الجريده أللى الأفندى ده بيكتب فيه
- نشتريها أزاى يعنى ونحولها جريده قوميه
- هى المدافن ناقصة ميتين ماكفاية الكام جريده والكام مجله أللى ماحدش بيقراهم
حتأجروا 3 أراجوزات من محاسيب الحكومه يتقدموا بعرض لشراء الجريده وتبقي ليهم الحرية المطلقه فى أختيار رئيس التحرير أللى على مزاجهم وقانون الصحافة فى صفهم وأللى مش عاجبه الباب يفوت جمل فى الحالة دى العمليه نظيفه ميه فى الميه وأنتم واقفين بعيد وبتتفرجوا وماحدش يقدر يجيب سيرتكم لا بالطيب ولا بالردى.. قولت أيه ولا نشوف حاجة تانيه
- لا خطة حلوة وأهو كمان نخلص بالمره من الشلة بتاعته أللى جوه الجريده
- وتبقوا قفلتم الجريده دى بالضبه والمفتاح وماحدش من الشعب حيبص فيها تانى
وخليه يقول حمراا تانى
- كان قصده أيه الجدع ده من كلمة حمراا
ناس عجيبه بتخترع اسامي عجيبه
ولع ولع




اقعدو بالعافيه

[الحريه]

اقعدو بالعافيهههههههههه

ايه الراجل ابو التفانين ده دا دهيه

الا هى دى صورتهشكله نضيف برده اخر شياكه

ربنا يبعدو عننا

اقعد بالعافيه يا سكريم ههههههه

[عفريت أفندى]

أبو التفانين المره دى مزاااااجه عالى جداااا

لعبها صح ابن اللعيبه

و انا شايف ان كل كلامه مظبوط ميه لميه

بدأت الحكومه تصفى معارضيها بعمليه نضيفه و بعيده عن اى شبهات

و بالفعل اللى هيحصل انها هتسيبهم يرجعوا بعد ما تعمل كل اللى نفسها فيه ف الانتخابات التشريعيه و الرئاسيه

يخربيت دماغك يا ابو التفانين

ماتشوف الصنف اللى بيولعه ابو التفانين ده بيجيبه منين يا كريم ؟

جايز نستعين بيه و نعمر الطاسه و نروق القنانى و الأشيه تبقى فله

ههههههه

موضوع متكلف يا ابو الدماااااااغ العاليه

تسلم الأيادى يا كبير

[ايسل]

الله يعافيك يا ابن اختى كلام جميل وخطه شيطانيه جهنميه بس هما بيتعبوا نفسهم بجد
كان هيعمل ايه ابراهيم عيسى ولا عمرو اديب هيعملو انقلاب يعنى ولا هما كانو
بكتابتهم وبرامجهم هيعملو التغير
والله ولا كانو هيعملو حاجه خلاص الشعب بقى مغيب عن الوجود ولا عارف ولا فاهم حاجه ومهما حد اتكلم الشعب خلاص مسلم
راح الملك جه الملك يعيش الملك
تسلم لموضوعك كاتبنا الساخر سكريم

[هشام اللول1]

دماغك عاليه يا ابو التفانين
بتعرف تلعبها صح
والدور اللي جاي علي مين ؟؟
اظن كده مفيش حد تاني

ربنا يستر عليكي يامصر من ابو التفانين والمحمتين بتاعتوا

تسلم الايادي ياحاج

بارك الله فيك وحفظك ورعاك سكريم