كأنك مفيش ..رائعة جديد للشاعر أحمد فؤاد نجم

[هشام اللول1]

كأنك مفيش ..رائعة جديد للشاعر أحمد فؤاد نجم



برغم إن صورك فـ كل الدواير وكل المداخل وكل المحاور
ومليا الشوارع على كل حيط مطنش علينا وعامل عبيط
كأنك مفيش ..
***
يا فرحة قلوبنا رئيسنا ظريف فُكهي ابن نكته ودمه خفيف
فـ عهدك سيادتك فَرَشنا الرصيف وآخر مُنانا غُموس او رغيف
وكل أمَّا تُخنُق ندوَّر ..
مفيش !!
***
مسيِّب علينا عصابة حبايبك فضايح وسرقة ونهب بسبايبك
مابين حزب نجلك وهانم جلالتك وجيش الغوازي اللي داير يجاملك
وناملك وقاملك .. وحارسك وأمنك شبعنا مهانه .. شبعنا لطيش ..!
وأنت يا ريس كأنك مفيش ..
***
باعونا فـ حضورك ببركة عِبـيدك وغالي وسرورك
باعوا الأراضي وكل المصانع وباعوا البنوك ..
وقدَّام عِنيك صوتنا إتـنبح ننادي.. يا ريس ده باعوا الحديد !!
وأنت مطنش وفكرك بليد !!
كأنك مفيش !!
***
دوشتوا دماغنا " بجمال " طلعتك ومن يومها وإحنا عَبـيد حضرتك
ما تزعلش إني مواطن أبيح ورافض كلابك فـ شعبك تطيح
فسادهم يا ريِّس واضح صريح قوم بينا صلّح وفتَّش .. وثور
ح نكتب تاريخك ياريِّس بنور مش تبقى عايش
كأنـَّك مفيش !!
***
ورحمة أبوك مادام أنت قاعد عيب لمَّا عُصبة نَـوَر يسحبُوك
م تُقبض عليهم .. م تقطع إيديهم م تعمل عليهم يا ريِّس شاويش
بدل م انت ساكت
وقاعد مفيش
***
ياريس علىّ الطلاق تعبانين !! يا ريس علىّ الحرام كفرانين !!
صبرنا سنين سيادتك مسلطن وشعبك وناسك بتآكل مسرطن
وتشرب مجاري وميت سم هاري .. وهما غلابة ومش دريانين !!
ما تنهض يا ريس تلم الديابه ؟!! ده شعبك غلابة ومليان طيابه ..
وهوَّ الشفاعة ف يوم الحساب وهما البطانة الحثالة الكلاب
ما يملاش عنيهم غير التراب وليهم ضوافر وميت ألف ناب
وواقفين لشعبك ورا كل باب لإمتى ح تسكت وليه الغياب ؟
ده ياما ممالك طواها التراب حياتنا ياريس تعب فوق عذاب
***
يا ريس " شريفك " ماهوَّاش شريف !!
" نظيفك " يا ريس ماهوَّاش نظيف !!
وحتى " حبيبك " ماهواش حبـيب !!
وأنا غصب عني خلاص إستويت بـغـُلبي إنحنيت
وطلعان عنيا وصعبان عليا بحسبة بسيطة ومن غير خريطه ..
وكونك مفيش
.. لقيت متساويش ومش فارقه كوني اموت او أعيش ..
***
نويت أشتكيك للِّي فوقي وفوقك وأصلي الفرايض ..عسى يفـُك طُوقـك
قالولي إللي يسجد عدو النظام !!
حاولت أحكي حالي ..!!
قالولي الحكاوي نميمة وحرام !!
فكرت أكتب .. لقيتكم سيادتك منعتوا الكلام !!
فقررت أحلم .. هاحلم سيادتك وأفُك اللِّجام
ولو مش هيعجب سيادتك يا فندم وصِّي العساكر .. تاخُدني أمَّا انام !!
***
حلمت إني شعب ومصلوب بطولي على أرض سمرا
ودمي بينـزف ومليان جروح وفوق صدري جمرة
يميني مربّط على أرض طابا شمالي ممسمر فـ "أولاد علي"
ورجلي على جزع نخلة فـ "حلايب" ومرتاح براسي على حِجْر مصر
وشوفتك ياريس ...كأنك نبي ... فـ إيدك عصاية وليك معجزات
وشايل صليبي وبتفـُكني .. وانا فـ جنَّه خضره .. وتحتي جداول ..
ومن فوقي نور .. وريحة بخور ..
همست ف ودانك بآخر وصيّة
إنسى إللي فاتك .. هننسى الأسية .. !! أمانه عليك ..
حُط الوطن جُوَّه نِنِّي عينيك كرامة عيالنا أمانة ف إيديك
بحق إللي بينّا يا ريِّس وبـينك وحَق اليَمِين و" ألكتاب " فى يمينك
بحق الشهيد .. إللي رافع جبينك
وجيش إنتصارك فى يوم العبور وجيل حُر طالع .. وعدته بدور
لملم عيالك .. وجمَّع فـ مالك
وإسحب " جمالك " وسيبنا وغور

[عفريت أفندى]

[thesniper_12007]

رائعه يا هشام
إمتياز بنجوم الكون على القصيدة الجامدة دي
ايه دا دا انت لول بصحيح
تقبل تحياتي العطرة على قصيدة ولا اروع للشاعر الفذ أحمد فؤاد نجم تصور حال مصر خلال 30 سنه مضت وكأنه مافيش

[ايسل]

ورحمة أبوك مادام أنت قاعد عيب لمَّا عُصبة نَـوَر يسحبُوك
م تُقبض عليهم .. م تقطع إيديهم م تعمل عليهم يا ريِّس شاويش
بدل م انت ساكت
وقاعد مفيش

بتقول لمين الكلام ده يا نجم هو اللى مختارهم بعنايه فائقه وانت عارف ومتأكد انهم اختياره

شكرا هشام لما قدمت لنا من كلمات لشاعر الشعب الجميل كلمات ينطق بها كل مصرى

دمت متميز هشام

[هشام اللول1]

نورتنا ياحاج وليد


بارك الله فيك وحفظك ورعاك

[هشام اللول1]

رائعه يا هشام
إمتياز بنجوم الكون على القصيدة الجامدة دي
ايه دا دا انت لول بصحيح
تقبل تحياتي العطرة على قصيدة ولا اروع للشاعر الفذ أحمد فؤاد نجم تصور حال مصر خلال 30 سنه مضت وكأنه مافيش

احمد فؤاد نجم بجد عبقري
وكلماته بتمثل واقع كبير بنشاهده باستمرار

شكرا لمرورك الكريم اكرام
بارك الله فيك وحفظك ورعاك اكرام

[هشام اللول1]

بتقول لمين الكلام ده يا نجم هو اللى مختارهم بعنايه فائقه وانت عارف ومتأكد انهم اختياره

شكرا هشام لما قدمت لنا من كلمات لشاعر الشعب الجميل كلمات ينطق بها كل مصرى

دمت متميز هشام

فعلا مختارهم علي الفرازه
واختياره بيصيب والله يا ايسل
بيصيبوا هو
مش احنا الشعب

نورتي يا ايسل
بارك الله فيكي وحفظك ورعاكي
دمتي بخير وسعاده وصحه وراحه بال وود

[&!! Who's care&]

يا ريس " شريفك " ماهوَّاش شريف !!
" نظيفك " يا ريس ماهوَّاش نظيف !!
وحتى " حبيبك " ماهواش حبـيب !!


حُط الوطن جُوَّه نِنِّي عينيك كرامة عيالنا أمانة ف إيديك
بحق إللي بينّا يا ريِّس وبـينك وحَق اليَمِين و" ألكتاب " فى يمينك
بحق الشهيد .. إللي رافع جبينك
وجيش إنتصارك فى يوم العبور وجيل حُر طالع .. وعدته بدور
لملم عيالك .. وجمَّع فـ مالك
وإسحب " جمالك " وسيبنا وغور

شكرا ليك ياهشام
على هذه القصيدة الرائعة
للرائع احمد نجم
جزاك الله خيرا
دمت متميز

[هشام اللول1]

يا ريس " شريفك " ماهوَّاش شريف !!
" نظيفك " يا ريس ماهوَّاش نظيف !!
وحتى " حبيبك " ماهواش حبـيب !!


حُط الوطن جُوَّه نِنِّي عينيك كرامة عيالنا أمانة ف إيديك
بحق إللي بينّا يا ريِّس وبـينك وحَق اليَمِين و" ألكتاب " فى يمينك
بحق الشهيد .. إللي رافع جبينك
وجيش إنتصارك فى يوم العبور وجيل حُر طالع .. وعدته بدور
لملم عيالك .. وجمَّع فـ مالك
وإسحب " جمالك " وسيبنا وغور

شكرا ليك ياهشام
على هذه القصيدة الرائعة
للرائع احمد نجم
جزاك الله خيرا
دمت متميز

شكرا لمرورك الكريم منار
نورتي صفحتي المتواضعه بمرورك العطر
بارك الله فيكي وحفظك ورعاكي
دمتي بخير وسعاده وصحه

[هبه اتش]

بجد عبقري
انسان بجد فوق الرائع
تقبل مروري