*** شعر ولا ذقن *** ؟؟؟

[Hooba]

منقووووووووووووووول

واحده صحبتى طبت علىَّ وطلبت منى أروح معاها "عيادة التجميل" وجوزها مش فاضى يروح معاها. أنا بقي بترعب من الدكاتره ومن العيادات وريحتها وممكن لو شفت أى حد عيان أو حتى بيكح أنا كمان أعيا بـ"الإيحاء" أو بالوهم. بس هى اقنعتنى ان دى عيادة "تجميل" يعنى معظمها دلع وأهى تجربه جديده.

فعلاً روحت معاها وبمجرد ما دخلت حسيت فعلاً إنى مش فى عياده خااالص، حاجه كدا نضيفه وريحتها حلوه وبوسترات الجميلات فى كل مكان، لأ وإيه...مرايه كبييييره واخده نص الحيطه ومزوقينها بفيونكات كمان. إيه الحلاوه دى بس، صحيح حاجه تخبل إنك كل ما تبص فى حته تشوف نفسك؛ بس جو لذيذ بردو.

حسيت إن ستات وبنات البلد كلها قاعدين فى الـ Beauty Center ده؛ بس الفرق بقا إن معظمهن كان زارع "قطن وشاش" فى أماكن مختلفه من وشه. ولازم تكون اعصابك جامده علشان ما تضحكش. حظى وقعنى جنب واحده عسوله خالص

أول ما قعدت سألتنى " شكل ولا شعر؟؟!!" – " نعم ؟! أنا اسمعهم بيسألوا فى الأفلام (شعر ولا دقن) جديده حكاية الشكل دى!!" –" يا بنتى قصدى اسألك، جايه تغيرى حاجه فى شكلك ولا تزرعى شعر؟ ما هىالعمليات هنا كلها كدا زرع وقلع ونفخ وشفط"، ما قدرتش امسك نفسى انى انفجر فى الضحك بأعلى صوت وبكلام غير مفهوم وضحت لها انى جايه مع صحبتى ومليش فى المشوار ده خالص.

وكأن الست ماصدقت تلاقى حد تتكلم معاه إلا واستلمتنى وحكتلى عن كل الموجودات وكل واحده جايه تعمل إيه، وتعليقها فى الآخر " ستات بتدلع مش عارفه ليه ميردوش بخلقة ربنا؟؟!! بس عارفه –الكلام ليا انا- لو توسعى عينك وتعدلى سنانك إللى راكبه على بعض دى وتنفخى تحت الحواجب هتبقى قمر، ويا سلام لو وسعتى المنطقه فوق عينك كمان".

-"لااااا، ربنا يخليكى، ألف شكر، أنا كدا عجبانى أوى ومتكيفه مع نفسى، دا إحنا مع بعض من زمااان وبيتهيألى لو صحيت مره لقيت حاجه فىَّ متغيره هبلغ البوليس عن الغريبه دى إللى بتبصلى فى المرايه، وبعدين حضرتك لسه بتؤولى الواحد يرضى بخلقة ربنا ولا إيه؟؟ انما حضرتك جايه ليه؟؟"

-" جايه اتفرج" وتانى رجعت اضحك لحد أما قلت على طريقة المصريين لما يفرحوا وزياده وعنيهم تدمع " خير اللهم اجعله خير".

وعلى الحال ده طول فترة الإنتظار، حاسه انى فى فيلم كوميدى، وكل واحده ييجى عليها الدور تتكلم شوى عن حالتها والتغييرات المطلوبه وتدى نصايح لغيرها.

وفجأه قلبت بغم، فى عز الضحك ده ألاقى ميييين؟؟؟... راجل، يا نهار متلون بألوان غامقه!! دا طلع منين ده؟؟!! إيه إللى جابه فى قعدة حريم. يادى الكسوف، يا أرض انشقى وإبلعينى ويا سقف اتهد علىَّ ودارينى. وجريت استخبى ورا بارافان كبييير فى أخر الصاله، وألاقى وراه إيه؟؟؟ ألوان اغمق من إللى قبلها. بقا أنا بهرب ومحرجه من راجل واحد ألاقى أؤودامى كل دول؟؟؟ كان باقى لى شوى وهعيط من الكسوف ووطيت راسى وانا بقول " انا اسفه، اصلى لسه داخله حالاً وكنت بجرى من قطه واقفه ع السلم". تبرير ساذج لعملية الاقتحام ومحاوله انى أتبرى من القعده المهببه ، يعنى هو الباب بيفتح على آخر الصاله؟؟!.

رجعت مكانى وانا راسى قربت تلمس الأرض من كتر ما وطيتها ومكسوفه ارفعها وحاسه اننا بقينا فى عز الحر. وصحبتى بتضحك علىَّ، الضحك إللى ضحكته دفعت تمنه. المهم ندهت على الممرضه نسألها عن حكاية الرجاله دول وجايين ليه.

-" هم الرجاله دول بيعملوا إيه فى عيادة تجميل؟؟ مستنيين مراتاتهم؟؟!"

–" لأ...دول هم كمان ليهم كشوف وعمليات"

-" نعم؟؟ رجاله بيعملوا عمليات تجميل؟؟""

– " آه والله، دا اكتر من تلت زبايننا رجاله؛ إللى مناخيره مش عجباه وإللى جاى يطول رقبته وأكترهم جايين يزرعوا شعر."

-" ما شاء الله، ويا ترى بقي أخدتو ترخيص من وزارعة الزراعه وإستصلاح الأراضى علشان عمليات الزرع دى؟؟ إنتِ بتهرجى يا بنتى!! راجل إيه ده إللى جاى يدور على تجميل شكله وزرع شعره؟؟!!

-"آه والله، دا رجاله كتير أوى بييجوا يزرعو، والشعرات بالعدد كمان وعلى حسب نوعها وطولها ولونها بيتحدد سعرها إللى بيبدأ من 4 جنيه للشعرايه".

وبعد طول كلام وحوار بيخرجنى من ذهول على إذبهلال سبت البنت تروح تشوف شغلها وقعدت ساكته افكر فى الحكايه الغريبه دى.

دا مكنش عاجبنا ان البنت تحط مكياج وتجمل نفسها، والمفروض يعنى ان البنات هم إللى عقلهم صغير وبيحبوا الحاجات دى؛ طب الراجل عاوز يبقي "حلو" ليه؟؟

مش مكفيه صفات الرجوله إللى عنده وطمعان كمان فى صفات الأنوثه؟؟ الأكتر من كدا ان فى تقرير بيقول ان حوالى 17% من جراحات التجميل بتكون للرجاله وبيسافرولها مخصوص دبى وبيروت. أنا قلت قبل كدا ان الجمال مطلوب سواء فى البنت او الراجل. بس الست تصرف على جمالها مقبول لكن الراجل لأ طبعاً. دا أنا كنت بتخنق لما اشوف واحد واخد باله من نفسه زياده ومسبسب شعره ودالق جردل برفان على نفسه. يهتم بنفسه مفيش مانع بس فى المعقول.

هو الراجل يبآ راجل إلا وهو خشن كدا وجامد وتحس انك ممكن تعتمد عليه!!، طب قولوا الحق، بذمتكم ودينكم مين احسن ممثلين زمان الرجاله ولا بتوع دلوأت المفسفسين الكوشى إللى مش على بعضهم. ذكى رستم وسراج منير ومحمود المليجى ولا الأطفال بتوع اليومين دول.

الست غالباً مش بتبص لشكل الراجل ولا بتهتم بيه قد ما بتهتم بشخصيته ونضوجه وفكره واخلاقه وثقافته ومدى تحمله المسؤليه. عاوزه حيطه صلبه مش جدار مطاط تيجى تركن عليه يرروح واقع بيها.

وبعدين فى فرق كبيييييييييييييييييييييير جداً بين "الجمال والجاذبيه"، الجمال ممكن نصنعه ونشتريه، لكن الجاذبيه ربانى، ممكن تقعد تتكلم مع حد يوم كامل من غير ما تزهق ولا تفكر تدقق فى ملامحه من حلاوة كلامه إللى بيشدك فى حين ممكن تسرح وانت بتكلم واحد تانى وتتملى فى ملامحه علشان تلهيك عن سخافته وتقل دمه. وعلى رأى المثل " قرد يسليك ولا غزاله تغمك". والمثل ده ينطبق على الأزواج والزوجات.

عمرى ما تصورت ان ممكن "الجمال" يكون من صفات الرجوله. ولقيت نفسى بردد اغنية فايزه احمد " يا حلاوتك يا جمالك خليت للحلوين ايه" ووسعت ابتسامتى لما افتكرت انها بتغنيها لإسماعيل ياسين، تخيلوا؟؟!! صحيح...مراية الحب عميا.

فوقت من افكارى على صوت صحبتى جاى من ورا الغيوم وهى بتؤول :" أنا بفكر أزرع لجوزى".

-" هتزرعى له إيه؟؟ انتوا اشتريتوا أرض؟؟!"

–" لأ يا بنتى، يزرع "صلعته" دى متعبه جداً، يوم ما بيروح يتصور تلاقى الصوره كلها بتلمع، النظاره مع الصلعان بيعكسوا الإضاءه، لكن لو زرع هيخفف حدتهم شوى".

-"ودى بآ هتزرعيها مساطر ولا مصاطب على طريقة الفينيقيين؟؟! وراس جوزك دى هتكفيها كام شعرايه؟مش اقل من 10.000 واحده يعنى ب40.000جنيه. مش هؤولك ان فعلاً جوزك إنسان رائع وجذاب، بس هؤولك حرام عليكم الفلوس، اعملوا بيها حاجه نافعه احسن". وزياده فى اقناعها خوفتها وقلت:" بدل ما جوزك يلاقى نفسه إحلو زياده ويروح يتجوز عليكى "

قعدت اقنعها لحد ما جه دورها ودخلنا وخرجنا كل واحده على بيتها. بالليل لقيتها بتكلمنى وبتؤوللى ان جوزها اقتنع "بزرع الشعر" وهى لما لقيته مستعد يدفع الفلوس دى كلها قلقت منه، وتوصلوا لحل وسط، انها تاخد الفلوس دى تشترى بيها حاجه نافعه او تستثمرها وهى راضيه بيه وبصلعته زى ما هم من غير اعتراض. شفت الستات الذكيات؟؟!! صحبتى ...متوقعين تكون بتفكر إزاى؟ لازم تستغل الموقف طبعاً.

[ميشو مصريه]

طبعا الانسان مش بشكله لكن باخلاقه والتزامه بدينه وبعدين ازاي الانسان يعدل في خلقه
ربنا
تسلم ايدك ياهوبا علي التوبك

[اسيرة الغربه]

بجد انا مش عارفه اضحك ولا اعيط؟؟؟؟؟؟؟؟

قصه روعه جدااااااااااا يا هوبا بجد تسلم

بس فعلا ايه اللي بيحصل في الدنيا فعلا في الرجاله وفين الرجوله

بجد الوضع بقي لا يحتمل فعلا هو ده الواقع اللي احنا عايشين فيه

كل مدي الامة في اضمحلال مش عارفه هنفظل كده لحد امتي

فعلا كما قال الرسول الكريم صلي الله عليه وسلم الحديث فيما معناه

((ان ليس كل ما يولد رجل انما كل ما يولد ذكر))

[Hooba]

أشكركم يا أجمل الجميلات ... سلمت يمناكم..