صباح الخير ياشـــرقية....

[رضا محمود]

وحشتيني يابلدي......من غربتي وحنيني وشوقي ....عاوزأقولك...


صباح الخير ياشرقية
ياأرض الخضرة والمية
تفوت النسمة...تتمرجح
تمس القطن ..بيفتح
يطل عليكي ويصبح
بهمسة شوق وحنية
صباح الخير ياشرقية
صباح النرجس النادي
يقولها الطير علي الأغصان
ياست الحسن يابلادي
أنا العاشق بقالي زمان
هويتك والهوى غية
صباح الخير ياشرقية
أنا الفلاح باغنيلك
وانا باروي غيطان القمح
أنا الشاعر وبهديلك
قصايد حب تشفي الجرح
ياأجمل صورة في عينية
بحبك موووت ياشرقية


بقلم (رضا محمود)

[نور الحرف]

الأخ / رضا محمود
مش تقول إنك بلدياتنا من الشرقية
أجدع ناس وكلهم إحساس
الكرم طبعهم والخفة فى دمهم
تقبل تحياتى
نور العيون

[رضا محمود]

الأخ / رضا محمود
مش تقول إنك بلدياتنا من الشرقية
أجدع ناس وكلهم إحساس
الكرم طبعهم والخفة فى دمهم
تقبل تحياتى
نور العيون

ياربي ....وانا باقول انا شوفتك فين قبل كدة....هههههههههههه
أحلي مسا علي عيونك يانور....وطمنيني البلد عاملة ايه ...وحشتني أوي والله يانور ووحشني كل شيئ فيها..وعلي فكرة أنا من ابو حماد ..أكيد تعرفيها...

[نور الحرف]

أخى / رضا محمود
إحنا من منيا القمح
لكن عايشين فى القاهرة العامرة
وبنسافر البلد تبع الظروف يعنى كل مناسبة
بسبب ظروف الدراسة للاولاد
لك تحياتى
وشكراً
نور العيون

[رضا محمود]

تشرفنا يانور.....ومنيا القمح بلد حلوة أوي انا زورتها كتير وليا اصحاب فيها كتير أوي...
وكمان هنا في السعودية ليا أصحاب من منيا القمح...

عاوز بقى أفكرك بكلمات الاستاذ مرسي جميل عزيز الشرقاوي الأصيل لما قال...

يابو رمش بيجرح ويداوي...
وعيون يحكيها مغناوي...
وسألت عليك...جاوبتني عينيك...
انا م الزقازيق...انا شرقاوي...

تقبلي تحياتي يانور.....وياريت نكون أصدقاء لو مفيش مضايقة بالنسبالك..

[thesniper_12007]

ياابن الشرقيه اهلا بيك اهلا بقلمك الرائع في التعبير عن موطن رأسك
وحمد الله على السلامه يا ماما نور
احترت معاكي من سوهاج ولا الشرقية ولا القاهرة العامرة انا ياعم الحاج من بني سويف
وافر تحياتي وجل احترامي لأهل الشرقية كلهم من مشتول للحسينية وكفر صقر واولاد صقر والابراهيميه وبلبيس اللي ضحكو على ابليس وههيا ومنيا القمح وابو حماد والزقازيق وكل واحد في الشرقية خوفا من الغلط والنسيان

[نور الحرف]

إيه ياعم / إكرام
الداخلة الجامدة دى
أنا من الشرقية بلد زوجى دى مش محتاجة زكاء ومن سوهاج بلد والدى
ومن زواجى وانا بلدى بلد زوجى ولا إيه ؟
إتكلم بقى علشان نتضرب
لكم كل الود شراقوة وصعايدة
نور العيون

[thesniper_12007]

إيه ياعم / إكرام
الداخلة الجامدة دى
أنا من الشرقية بلد زوجى دى مش محتاجة زكاء ومن سوهاج بلد والدى
ومن زواجى وانا بلدى بلد زوجى ولا إيه ؟
إتكلم بقى علشان نتضرب
لكم كل الود شراقوة وصعايدة
نور العيون

لا غلبتيني يا ماما ديما الماما تعرف اكتر من البابا
هههههههههههههههههههه
وافر تحياتي للشرقيه والصعيد وبني سويف