جيفارا ماااااااااااااااااااات(اح� �د فؤاد نجم)

[هبه اتش]

جيفارا مات

جيفارا مات

آخر خبر فِ الراديوهات

و فِ الكنايس

و الجوامع

و فِ الحواري

و الشوارع

و عَ القهاوي و َ البارات

جيفارا مات

جيفارا مات

و اتمد حبل الداردشة و التعليقات

********

مات المناضل المثال

يا ميت خسارة عَ الرجال

مات الجدع فوق مدفعه جوّه الغابات

جسّد نضاله بمصرعه

و من سُكات

لا طبالين يفرقعوا

و لا اعلانات



********

ما رأيكم دام عزكم

يا انتيكات

يا غرقانين

فِ المأكولات و الملبوسات

يا دفيانين

و مولعين الدفايات

يا محفلطين (1)

يا ملمّعين يا جيمسنات

يا بتوع نضال آخر زمن

ف العوامات

ما رأيكم دام عزّكم

جيفارا مات

لا طنطنة

و لا شنشنة

و لا إعلامات و استعلامات

عيني عليه ساعة القضا

من غير رفاقه تودّعه

يطلع أنينه للفضا

يزعق و لا مين يسمعه

يمكن صرخ من الألم

من لسعة النار فِ الحشا

يمكن ضحك

أو ابتسم

أو ارتعش

أو انتشى

يمكن لفظ آخر نفس كلمة وداع

لَجل الجياع (2)

يمكن وصية للي حاضنين القضية

بالصراع

صور كتير ملو الخيال

و ألف مليون إحتمال

لكن أكيد و لا جدال

جيفارا مات موتة رجال



*******

يا شغالين و محرومين

يا مسلسلين (3)

رجلين و راس

خلاص خلاص

مالكوش خلاص

غير البنادق و الرصاص

دا منطق العصر سعيد

عصر الزنوج و الامريكان

الكلمة للنار و الحديد

و العدل أخرس أو جبان

صرخة جيفارا يا عبيد

في أي موطن أو مكان

ما فيش بديل

ما فبش مناص

يا تجهّزو جيش الخلاص

يا تقولو عَ العالم

خلاص


1968

---------------------------------------

(1) محفلطين : متأنقين

(2) لجل : من أجل

(3) مسلسلين : مربوطين بالسلاسل


منقــــــــــــــــــــــــول
========================

[حرف مشتعل]

نقل موفق
ودى

[هبه اتش]

اي خدمه

[شراع الحب]

تسلم ايديك هبه وكل سنه وانت طيبة وعيدكم مبارك

[هبه اتش]

تسلم ايديك هبه وكل سنه وانت طيبة وعيدكم مبارك

ميرسي ياجميل
ربنا يخليك
وكل سنه وانت طيب

[احمد 2229]

يا سلام كل عام وانت بخير تانى يوم عيد الاضحى

[هبه اتش]

يا سلام كل عام وانت بخير تانى يوم عيد الاضحى

وانت بخير ثالث يوم العيد
ميرسي للمرور

[Ali Pharouq Najar]

لا حول ولا قوة إلا بالله
معاه حق الأستاذ أحمد فؤاد نجم
أنا كان عندى مداخلة لو تسمحى يا هبة
انا حاليا باشوف تى شيرتات و ساعات و حتى ناس
اسمهم جيفارا ... لا حول ولا قوة إلا بالله
وتلاقيهم ماشيين عادى جدا
بل بالعكس فرحانين بيه ....
اللهم ارفق بنا يا رب

[هبه اتش]

لا حول ولا قوة إلا بالله
معاه حق الأستاذ أحمد فؤاد نجم
أنا كان عندى مداخلة لو تسمحى يا هبة
انا حاليا باشوف تى شيرتات و ساعات و حتى ناس
اسمهم جيفارا ... لا حول ولا قوة إلا بالله
وتلاقيهم ماشيين عادى جدا
بل بالعكس فرحانين بيه ....
اللهم ارفق بنا يا رب

ميرسي كتير ياقمر على المداخله ويارب دايماً