تحب تبقى رئيس أمريكا ولا محافظ بورسعيد ؟

[jewel_lowis]

واضح انه اجابة السؤال واضحة وصريحة شيء مش محير على الاطلاق طبعا رئيس أمريكا ياباشا
بورسعيد ايه موقعها على الخريطة يا معلم ؟ وبعدين طبعا الاخوة اللي بيحبوا بورسعيد حيقولولي لا طبعاً دي حاجة كبيرة جدا . ماشي يا شباب حاجة كبيرة طبعا على عيني وعلى راسي

المهم أمريكا طبعا أكبر قوة اقتصادية وعسكرية في العالم يعني ولا كلمة
طيب يا شباب بعيد عن المناظر والمنظرة والكلام الفارغ نحسبها بالورقة والقلم لو سيادتك رئيس أمريكا حتاخد كام في السنة ؟ تخيل 650 ألف دولار في السنة

اي والله العظيم هما دول بس

طيب سيادتك مفيش بدل سفر بدل حضور جلسات بدل تمثيل على اعتبار ان رئيس أمريكا أكبر ممثل
لا ياباشا مفيش حاجة من دي خالص . يعني سعادة جناب رئيس أمريكا بعد 8 سنين حرق في أعصابه لإدارة أكبر دولة في العالم ومع جبر الكسور لصالحه يعني نحسبله السنة بمليون دولار يكون إجمالي دخله مليون دولار 8

عموما مش وحش برده لأن أكيد لما حابقى رئيس أمريكا حيدوني الجنسية ومش حاضطر إني أركب مركب واغرق بيها في ايطاليا مثلا
طيب سيادة محافظ بورسعيد بياخد كام ؟؟؟
مش حنتكلم على الموضوع ده كتير لأن حكاية بياخد كام دي متفرعة جداً
احنا حنتلكك للباشا على أحد تصريحاته اللي قالها وهو مش واخد باله يا عيني
فسيادته صرح لجريدة الأهرام في نهاية العام الماضي ان بورسعيد عملت دخل لمصر يقدر ب 4 مليار جنيه وهو حصيلة بيع أراضي في مناطق مختلفة تابعة لبورسعيد.
جميل ربنا يخلي بورسعيد لمصر دايما . لكن اللي يهمنا ان سيادة المحافظ له نسبة قانونية في هذه المبالغ 3% طبعا نسبة بسيطة تعالوا نحسبها 3% من 4 مليار يعني 120 مليون جنيه طيب نحولهم دولار على اعتبار ان الدولار ب 6 جنيه يطلعوا 20 مليون دولار

اي والله العظيم محافظنا الهمام كسب 20 مليون دولار في 7 سنين ورئيس أمريكا كسب 8 مليون دولار في 8 سنين يعني محافظ بورسعيد كسب مرة ونصف ضعف رئيس أمريكا في فترة زمنية أقل بعام كامل

تخيل سيادتك في دولة قال سيادة وزير التخطيط محمد عثمان أن 40% من سكانها يستحقون الدعم . في دولة يقوم الناس فيها بالاضراب لزيادة مرتباتهم 200 جنيه يعني 35 دولار بس في دولة أتخن موظف فيها مرتبه يبلغ 300 دولار يكسب محافظها 20 مليون دولار
احنا بنتكلم عن محافظ مش وزير محافظ مش رئيس وزراء محافظ مش رئيس جمهورية

مش عارف اقول ايه
انا عموما حجزت على مركب رايحة ايطاليا بكره
خلي بالك من العيال يا باتعة

[الحريه]

اي والله العظيم محافظنا الهمام كسب 20 مليون دولار في 7 سنين ورئيس أمريكا كسب 8 مليون دولار في 8 سنين يعني محافظ بورسعيد كسب مرة ونصف ضعف رئيس أمريكا في فترة زمنية أقل بعام كامل

ياعينى عليه
صعبان عليا رئيس امريكا اوى
تعالى عندنا يا معلم وانت تتهنى
شوف
الملايين هتنزل عليك زى المطرة
ال رئيس ال

لك الله يا شعب مصر المظلوم

شكرا حبيتى على الموضوع

[عفريت أفندى]

فى الحاله دى يا انجى

تغور رئاسة امريكا

و يا مرحب ببورسعيد

يا مرح بالملايين

و ال ايه بنشتكى م الفقر

رحمتك يا رب

الطف بينا يا كريم

تسلمى يا انجى ع الموضوع الجونان ده

[هشام اللول1]

الفساد اصبح الي الاعناق
في مصر
واصبح الموظف الصغير ينظر الي الموظف والاداري الكبير
اللي هو المفروض القدوة له
علشان كده مصر عاوز تغيير اداري شامل

علشان كده الفرق بين دوله مصر واي دوله سواء امريكا او زيمبابوي

وعلي رأي المثل
اذا دخل الفساد من الباب
هرب التقدم والتنميه من الشباك


تسلمي انجي علي الموضوع الجميل
بارك الله فيكي وحفظك ورعاكي

[jewel_lowis]

جزاكم الله خيرا على الردود الأكثر من رائعة