هو الامن والامان كتر علينا

[براكودا]

بسم الله الرحمن الرحيم

السلام عليكم ورحمة الله وبركاته

شىء من المحزن ان اول خبر امعه في اول يوم من ايام السنة الجديدة انه تم القيام بعملية ارهابية بكنيسة بالاسكندرية ، بالاضافة الى عدد القتلى والمصابين.
وانا على يقين تماما ان هذا العمل عمل ارهابي من قبل منظمة دولية وليس له ايه صله بأطراف داخلية او فتنة طائفية .

وسؤالي ليه مستكترين على مصر الامن اللي هى فيه

[هشام اللول1]

وسؤالي ليه مستكترين على مصر الامن اللي هى فيه

طب ممكن اسالك سؤال يابركودا
هو فين الامن اللي في مصر ده ؟؟؟
الامن اصبح لليهود في ابو حصيره
الامن اصبح للسياحه والسائحين
الامن اصبح للحزب الوطني ورجال البلد الكبار

المواطن العادي للاسف لا يتمتع بأي نوع من انواع الامن في مصر
يعني ممكن تكون ماشي في الشارع يطلع عليك حد يثبتك
او عربيه طؤاري وفيه اتنين امناء شرطه عاوزين يقفلوا المحاضر عندهم او رشوه
والامثال كتير جدا يابركودا

تسلم ياحاج بركودا
وحمدا علي السلامه
بارك الله فيك وحفظك ورعاك

[jewel_lowis]

اكيد مستكترين علينا الامان
والواحد بيحمد ربنا انه نجاه بجد من الإهاربيين دول
ربنا يعافينا جميعا ويصبر أهالى الضحايا
شكرا للطرح الهام

[عفريت أفندى]

وسؤالي ليه مستكترين على مصر الامن اللي هى فيه

الأمن كلمه مفهومها واسع و كبير اوى

يعنى مثلا امن المواطن معناه إنه يأمن على حياته و يأمن على ممتلكاته و يأمن على وظيفته و عمله و يأمن على قوته و قوت أولاده

هل الدوله موفره كل ده للمواطن ؟؟

البطاله منتشره بصوره رهيبه بين الشباب

الواسطه و المحسوبيه و الفساد الإدارى فى كل وظيفه

الإجرام و السرقه مالهاش حصر سواء للأفراد أو الشركات

يبقى ايه اللى مصر فيه و هما مستكترينه عليا ؟؟

أعتقد حاجه واحده بس اللى الدوله موفراها زى ما قال هشام

أمن النظام و كبار المسئولين فى الدوله و أمن السياح فقط لا غير

تسلم يا براكودا على الطرح

و حمدا لله على السلامه

و ربنا يحفظ لمصر و شعبها أمنها من كل فاسد سواء داخل البلد او خارجها

[white_rock]

الامن
كلمة مفهومها حاليا في مصر (الامن السياسي) فقط
طز في الشعب
دا اللي الناس كلها شايفاه والدليل 1200 مصري راحوا في عبارة ولم يتم ملاحقة الجاني
600 رجل اعمال سرقوا اموال البنوك وهربوا ومحدش دور عليهم
بيع غاز مصر لاسرائيل ببلاش تقريبا
تخصيص كل المصانع (سياسة الخصخصة )
باختصار البلد راحت لليهود على طبق من فضة من غير نقطة دم واحدة بفلوسهم
وللاسف هو دا نتيجة سكوت الناس
والامن لا يتحرك سوى لكبت حرية الناس
يعني لو ليكم حقوق الامن هيوقفها
اما لو انتم مسجلين خطر وبلطجية محدش هيجرؤ يعترض طريقكم من الامن لانهم بيخافوا من الناس دول ولعل قصة المطلوب الاشهر في سيناء (لافا) اكبر دليل على كده

[ايسل]

وسؤالي ليه مستكترين على مصر الامن اللي هى فيه

ربنا يحفظ مصر
ويحفظ شعبها الغلبان اللى كل حاجه على دماغه
وياخد كل متأمر ومتخاذل ومستهتر بحياة الشعب ومهمل فى ارواحنا
شكرا براكودا

[براكودا]

شكرا لاهتمامك ومرورك جميعا
وآرائكم اللي انا احترمها جميعا

لكن اللعب على وتر الطائفية اصعب بكتير من اي شيء آخر

دمتوا بود واحترام