رسالة إلى مصر المحروقة!! عن ثقافة التوليع نتحدث

[drmido119]

السلام عليكم ورحمة الله

برشا برشا يا تونس الخضرا برشا يا بهية يللي على البلا صابرة لم يتوحد الشعب حول فكرة أو جماعة أو مؤسسة بل توحد الشعب حول لقمة العيش وأساسيات الحياة التي تنادي بها شمس الآدمية كل يوم وطبعا هذه الأساسيات موجودة لدينا بدليل تصريحات الحكومة المصرية التي تصدعنا بها ليلا أو نهارا في كل الصحف والمجلات المستقلة منها والمستعمرة بل ولأن الحكومة هي الشمعة التي تحترق من أجل توليع المصريين خاصة مع موجة البرد الموجودة حاليا لكن للأسف المطر طفى الشمعة ورجع الشعب يبرد تاني.




تنفس الوطنيون الصعداء بعد انتهاء فترة "حضانة" أحداث تونس لضمان عدم انتشار عدوى الحرية فقد اطمأن الوطنيون بفشل التجربة المصرية للحرق واتخذت إجراءات سريعة للحد من موجة الحرائق التي تنهش أجساد المصريين فقامت بسحب بنزين 80 من السوق ووضع ضريبة على الكبريت بل وتواصلت الإجراءات لتهدئة الشعب المصري حيث قام كلا من د.صفوت الشريف زكريا عزمي بتوجيه لوم شديد جدا نحو الحكومة لكن للأسف اللوم جه في العارضة وطلع أوت وتم إيقاف حامل الراية لتعاونه مع المعارضة بالإشارة إلى تسبب وزير المالية في سقوط البورصة التونسية لأنه كان واقف في مسار التجارة بين الدول العربية واتحسبت الكورة أوفسايد.




والحقيقة أن تصريحات الحكومة الأخيرة بتوافر 12 مليون وظيفة وأن مخزون القمح يكفي لمدة خمسة أيام كاملة والأمن مستتب وكل الناس مبسوطة خاصة بعد فوز منتخب مصر ببطولة الحوض يعني النيل هيتسلك ومش هيقفلوا الحنفية بس اللي في القلب في القلب وشكلنا مش هنطلع من النيل غير بالكأس بتاعة الدورة والغريب أن التصريحات لم تظهر إلا الآن فعلا اللي ما يعرفش يقول تونس بل أصبح الشعب يتأكد قبل نومه يوميا بإغلاق الحنفيات والبلاعات لكي لا يتسرب منها تصريح يأكل حد من العيال وإن كانوا بيفكروني بواحد صحي من النوم على صوت زعيق وخناقات فسأل الجيران هو فيه إيه؟؟؟ قالوا له الحق المياه فيها سم قاتل فعندما رجع لبيته سألته زوجته هو فيه إيه؟ قال لها مفيش حاجة بيقولوا المية هتقطع اشربي ونامي.




الغريب أنا لم نسمع كلمة بل همسة من شيوخنا وقساوسنا الذين يظهرون فقط في أيام الفتنة الطائفية ولم تظهر كلماتهم الرنانة لإظهار سماحة الديانات فأين هم من المحروقين من الشعب المصري فهل لم تصلهم أخبار الانتحارات أم انشغلوا بفتاوى إهدار دماء كل من يقول لا عالعموم اللي ليه بابا ما ينضربش على كرامته وإن كنت سمعت أن أحد شيوخ القناة الأولى قد أفتى بحرمانية الانتحار بالبنزين 80 اللي عاوز ينتحر ينتحر ببنزين 90 عشان الغلابة تعرف تولع في نفسها وأن من يقدم على الانتحار ويموت لن يدفن إلا في مدافن التونسي.




ولم يفوت الواد سعيد أسعد مسعود الفرصة لمشاركة الشعب المصري والتونسي الفرصة في الثورة على الأوضاع فأخذ كل ما في البيت من جاز وزيت وسكر لأنه من ال63 مليونا الذي قال عنهم وزير التعليم أنهم يستفيدون من الدعم الفني لإصلاح الأحوال المدنية في وزارة الثقافة وطبعا لن ينقطع الدعم ما دام فيهم قلب ينبض وطول ما هم على كراسيهم قبل ما يروحوا السعودية قادر يا كريم فقام الواد بأخذ كل المؤن التي تساعد على الاشتعال مضافا إليها مقالات أحمد عز في الأهرام وذهب أمام مجمع التحرير وأمسك الولاعة اللي أخذها هدية من وزير الداخلية وو
و
و
و
و
و
و
و
و
و

أشعل النار في علم تونس



كلمات أخيرة للمتألق "حامد موسى" في نشيد مصر



حلم كبير محتاج لضمير
حلمنا إصلاح حلمنا تغيير
.::.



مصر مش محتاجة حد
مصر محتاجة لولادها
محتاجانة نقف بجد
نشيل ايدين الظلم عنها
مصر محتاجة لضمير




.::.
مش بقولك احنا احسن
مش بقول عايزنها لينا
كل املي تبقى احسن
من وبإيدين بتخاف علينا
حد عنده يا ناس ضمير




.::.
مصر مش محتاجة حد
مصر محتاجة لولادها
محتاجانا نقف بجد
نشيل ايدين الظلم عنها
مصر محتاجة لضمير



.::.
حد نفسه يموت عشانها
حد يحفظها في مكانها
حد يحميها لولادها
عنده عدل وعنده دين
حد عنده يا ناس ضمير



.::.
مصر مش محتاجة حد
مصر محتاجة لولادها
محتاجانة نقف بجد
نشيل ايدين الظلم عنها
مصر محتاجة لضمير

[ايسل]

مصر مش محتاجة حد
مصر محتاجة لولادها
محتاجانة نقف بجد
نشيل ايدين الظلم عنها
مصر محتاجة لضمير

فعلا مصر مش محتاجه حد محتاجه الموجعين يتكلمو يصرخو يخرجو اللى فى قلوبهم يقولو كفايه ظلم كفايه جبروت كفايه سرقه فى اموالنا
كفايه وكفايه وكفايه
مصر محتاجه ولادها فعلا شكرا دكتور لما كتبت
دامت مواضيعك مميزه

[الحريه]

احنا محتاجين نتحرك مصر مش محتاجه
كلام محتاجه فعل
والكلام كتر اوى ولازم نحدد مصيرنا دلوقتى

شكرا ع الموضوع

[عفريت أفندى]

مصر محتاجه لضمير

الضمير مربط الفرس

يا رب يظهر حد عنده ضمير

و كلنا هنكون معاه بنسانده و ندعمه و نأيده

و لحد ما يظهر لازم كلنا نتعامل فى كل حاجه بضمير

تسلم يا دكتور على الطرح الرائع

دمت بود

[هشام اللول1]

حلم كبير محتاج لضمير
حلمنا إصلاح حلمنا تغيير

مصر فعلا عاوزه ضمير حي
لازم فعلا كل الشعب يبقي عندها ضمير
في كل حاجه

شكرا علي المقال دكتور
بارك الله فيك وحفظك ورعاك

[حرف مشتعل]

فعلا كل ما نحتاجه الضمير
كفاية كلام
مقال رائع
سلمت اليمين