السلام عليكم
يمكن اكون بقالي فترة طويلة مش بشارك في الكافيه
يمكن مخنوق من اللي بيحصل
يمكن مش عايز الصورة اللي في التوقيع تبان وانا مش ها اغيرها
بس انا قريت كل الردود
فيها ردود جامدة جدا سواء كانت مؤيدة او معارضة
كل الشعب مؤيد التغيير
كل الناس مش عايزة فساد
كل الشباب مش عايز توريث
بس اغلب الناس -ما يسميها البعض الاغلبية الصامتة- ماكنتش عايزة الرئيس مبارك يخرج بالطريقة دي
ممكن ترد عليا :ترضي ان اخوك ينضرب بالنار؟اقولك لأ
بس انت ترضي ان صورة واحد عنده 84 سنة تنداس.......مش ها اقول ابوك ولا جدك؟ بس واحد مصري
ليه مزايا وليه عيوب
بس يا جماعة فيه حديث بيقول"ليس منا من لم يوقر كبيرنا"
ربما يكون الحديث ضعيف
بس اعتبره امر اخلاقي
ثم ان حسني مبارك مش وحدوه اللي حارب في 73
مانا ليا عمي حارب
وعارف انه كان فيه اخطاء
وتجاوزات
ومجازر
وانا طبعاً واي حد محترم ها يرفض ده
بس اللي ها يتابع الموقف من الاول
يحس انه فيه حاجة مش متركبة صح
الرئيس جه عليه اليوم اللي فوض فيه النائب
امبارح الفريق احمد شفيق قدم استقالة بعد حديث تليفزيوني علي قناة O TVمع المحترم حمدي قنديل واللي اسمه علاء الاسواني
طب كان ماله احمد شفيق؟؟؟
قال القسم امام حسني مبارك؟؟؟
طب ما احمد زويل والبرادعي ونجيب محفوظ الريس السابق اداهم وشاح النيل وهو اعلي وسام في مصر
عمرو موسي جه عليه اليوم اللي ادي القسم ادام الريس
المشير طنطاوي ذات نفسه عمل كدة
طب وبعدين؟؟؟
ها نوصل لفين؟
ما انا ممكن اجيب عربيتين ميكروباص واطلع علي ميدان التحرير واعتصم مش ها امشي الا اما ييجي احمد شفيق تاني؟
يا جماعة ارجوكم اتقوا الله في مصر
ارحموا مصر وارحموا نفسكم وفي الاخر ارحمونا
كلاً يحب مصر بطريقته
واحد بيحب مصر والريس موجود
وواحد تاني بيحب مصر ومش عايز الريس
عليا النعمة انا لحد وقت قريب ما كنت فاهم يعني ايه حكومة تكنوقراط اللي بيقولها دي
سيبوا الناس تشوف شغلها
شوفوا الناس دي ها تعمل ايه؟
وبعدين حاسبوهم
زي ما حاسبتوا الرئيس مبارك بعد 30سنة
سيبوا حكومة عصام شرف 3شهور
وعلي فكرة عصام شرف ادي القسم امام الرئيس حسني مبارك 2004
الفريق احمد شفيق قال:احنا دلوقتي بناكل في لحمنا الحي
اللي بيفهم الكلمة دي ممكن يعيط
مش عايزين ناس تيجي بكرة في ميدان التحرير عايزين يمشوني من البيت علشان انا اخدت الليسانس في عهد حسني مبارك
حاكموا الرئيس مبارك
بس طالما ها تحاكموه ادخل علي جوجل واكتب انجازات مبارك وخطايا مبارك
اسف ممكن اكون طولت عليكم
والرد متاخر بس اعذروني
دمي محروق حبتين
رد مع اقتباس
