اقــــــرار واعــــــــــتراف

[SCREEM]

السلام عليكم ورحمه الله وبركاته

بسم الله الرحمن الرحيم




اوﻻ وقبل اي كلمه تحيه لارواح الشهداءالذين ضحوا بحياتهم من اجلنا من ومن اجل كل من اراد الحياه واراد ان يكسر القيد ولان هذه الثوره فتحت الباب للمصارحه وعدم التلون

لذلك علي ان اعترف انني وطوال هذه الثوره كنت سلبيا ولم استطع المشاركه او حتي علي اﻻقل من خلال النت والمشاركه ولو بالراي كنت سابقا اكتب مواضيعا ساخره ضد الحكومه وكان من اﻻولي ان اشارك في هذه الفرصه




لذلك اعتذر عن عدم دخولي الفتره السابقه ولهذا فقد قررت ترك مهام اﻻشراف لمن يستحقها واشكر كل من رشحني للاشراف في الفتره التي قضيتها بالمنتدي وساشارك كعضو عادي بالمنتدي


كريم

[لبنى مصر]

ليه كده يا كريم على فكره انا فرحت جدا انك رجعت اصلهم كانو بيدوروا عليك هنا وكانوا قلقانين ليكون جرالك حاجه لاقدر الله وقلقونا معاهم كمان بس الحمد لله انك رجعت بالسلامه اهلا بيك من تانى
اسمحلى بقى اقول رايى فى اقرارك واعترافك مش معنى انك مشاركتش فى فعاليات الثورة تبقى قصرت لا بالعكس يعنى انا مشاركتش فى الثوره لان بلدنا كانت هاديه بس دخلت المنتدى واتكلمت وفرحت فانت متزعلش على اللى فاتك وتندم عليه فكر فى اللى جى هتعمل ايه هتكتب ايه هتغير مصر ازاى بس مينفعش تنسحب لانك لو كنت فاكر ان صمتك وعدم مشاركتك سلبيه يبقى انسحابك وتركك للاشراف قمة السلبيه مع احترامى ليك
المنتدى عايزك انا اول مره ارد على موضوعاتك وانا سعيده جدا بانك رجعت بس انا عرفتك من كلام الاعضاء ومن موضوعاتك الايجابيه يعنى انت مفضلتش طول عمرى سلبى انت كنت ايجابى بردو لما كنت بتعبر عن رايك قبل كده
ده رايى المتواضع ياريت تفكر فى قرارك وتفكر فى كلامى وربنا يوفقك ولو عايز تكتب قرار تشيل ده وتكتب انا قررت ابدا فى المنتدى من جديد وهقول رايى بجراءه اكتر من الاول عشان بقينا فى زمن الحريه وقررت ان اشارك فى تغيير مصر
ننتظرك متالق كالعاده لك وافر تحياتى وتقديرى
تقبل مرورى
اختك لبنى

[~DREAM~]

منوووووووووووووور أ/كريم
بصراحة انا مع لبنى فى كل كلمة قالتها مش معنى ان حضرتك ماشركت فى الثورة تبقى سلبى
و بعدين تقرر ترك الاشراف
صدقنى وجودك فى مصر ذات نفسة مشاركة
لانك استحملت الظلم فى عهد الريس السابق مبارك
صدقنى احنا محتاجينك فى مصراوى كافية
وانا معرفش حضرتك لانى بعتبر جديدة بس اسمع ان حضرتك فى منتهى الاحترام وتستاهل كل الاحترام والتقدير
اتمنى لحضرتك النجاح والتوفيق ومن تقدم لتقدم با ذن الله
تحياتى وكل تقديرى لشخصك الطيب
DREAM

[SCREEM]

الف شكر ليكم ولكلامكم وروحكم الجميله بس كده احسن والمنتدي في ناس تستحق اكتر ربنا يوفق الجميع ان شاء الله

[~DREAM~]

السلام عليكم
اخبار حضرتك استاذ كريم ان شاء الله تمام
بعد اذن حضرتك انا عندى راى مخالف لوجه نظرك
استاذ كريم الحياة محطات لا بتكون كلها كاحلة السواد ولا بتكون كلها نور
لازم بنمر فى حياتنا بمحطات كاحلة السواد يمكن من كثرة ظلمتها بتخلينا
نتخبط فى جوانب الحياة الى بتكون فى الغالب مريرة وزى السهوم المسمومة
وكاننا بس عايشين علشان نتعذب او نتوجع
وكل فرد وعذابه سواء الاحساس بعدم القيمة او الجرح او تانيب الضمير او فقدان حد عزيز
بس ما بيكون فيه حد هو اتعس واحد فى الدنيا ولا بيكون فى حد اسعد واحد بالعالم
السعادة والتعاسة بنسب
فصدقنى مهما كنت تعيس اعرف ان فى ناس اتعس بكتير
وزى ما قولت لحضرتك ان الحياة محطات
ليه حضرتك قررت تستسلم بسهولة للمحطات المظلمة
مش ممكن فى جانب مشرق حضرتك مش شايفه
اذا سمحت بلاش تاخد قرار وانت حزين او يائس لانه غالبا ما بتكون صحيحة
ومش حينفع ان حد يطلع لانه حاسس ان فى حد احق بمكانة
احنا كل واحد بمكانة الى هو راضيه وعاجبه
كلا يفيد ويستفيد بمكانة
يمكن الى يختلف هنا عن اى منتدى تانى انه مش مجرد كافيه او منتدى
لا بجد عيلة وكل عضو فيه عضو فى العيلة دى
الى مستحيل نسمح لحد منهم انه يطلع ويسيب عيلتنا
يعنى مثلا مش حينفع اقول اننا فى بيت وان الابن يستحق مقام اعلى من مقامه
فاشيل الاب او الام او حتى الاخ او الاخت علشان الابن ياخد مقامه
لان كل واحد فيهم عمود من عواميد العيلة دى
زى ما حضرتك عمود من عواميد عيلة مصراوى كافيه بعيدا عن المجاملة
اعذرنى ان كنت طولت على حضرتك
بس بجد احنا فى الاول والاخر عيلة
ومش من مصلحة اى حد فينا ان فرد من العيلة دى يمشى
تحياتى

[هشام اللول1]

ايه ياحاج كريم الكلام الكبير ده
صلي علي النبي ياحاج
(( عليه الصلاه والسلام ))

طبعا انت مواضيعك اللي قبل الثورة
عرفتني انت قد ايه انسان
بتحب البلد دي وبتكره الفساد
وعرفتني انت قد ايه انسان
محترم ومثقف وواعي وذكي

ام بالنسبه لعدم مشاركتك الثوره
مقدرش اتكلم لانه الله اعلم بالظروف اللي بعدتك عن الثورة

وانا والله وربنا اللي يعلم قد ايه كنت متألم
اني مشاركتش بايدي في الثورة دي

والبلد الفتره اللي جايه دي محتاجنا كلنا
علشان البلد الفتره دي
في مرحله تأسيس
وعاوزه كل شاب مصري يقف معاها
بقلبه وايده وعقله

واحنا داخلين علي مرحله
تعديل دستوري
وانتخابات رئاسيه
وانتخابات برلمانيه

ان شاء الله نشوف مواضيعك من جديد ياحاج

بارك الله فيك وحفظك ورعاك

[ايسل]

الاخ العزيز كريم شكلى متأخره فى الرد الاول اقولك الحمد لله اننا اطمنا عليك بقى كده ياراجل ده انا كل ما الاقى واحد بيقف قدام خراطيم الميه والقنابل ويدخل يضرب فى العساكر اقول يالهوى ليكون كريم انت ايه اللى بتقوله ده يا ابن اختى علشان 18 يوم مشاركتش فيهم تقول الكلام ده ونسيت حاجه مهمه اننا بقالنا سنه بنعافر ونكتب مواضيع نفهم بيها الناس كل اللى بيحصل ونظهر ليهم عيوب النظام كل ده نسيته لا يا كريم

انت اللى تعبت لحد ما وصلنا للثوره اوعى تحسب ان الثوره جت على غفله الثوره جت بعد تعبنا كلنا هنا ومنتديات تانيه وعلى الفيس صدقنى يا كريم انت تعبت انت كمان
بس عارف اللى غايظنى انى انا اللى اتعميت لواحدى من القنابل بس ملحوقه ياحاج الثوره الجايه بأذن الله ويلا بقى خلينا نشوف مواضيعك الساخره الجميله سلام يا ابن اختى

[SCREEM]

الف شكر للجميع وانا مبسوط اني موجود ف مكان ف ناس محترمه بالشكل ده اتعلمت ع ايديهم ولسه بتعلم وهفضل اتعلم ومش هعرف اوفي كل واحد حقه من كلام

بشكركم جميعا وبالتوفيق ليكم ف حياتكم جميعا وفي خدمه مصر