الشبيه ..

[((مهند))]

3- صمتت السيارة قليلا ثم قالت : لحظة هاحسب كمية الغضب إلي غضبته لما الشباب دول هزقوني ... وكمية الطاقة إلي طلعت مني ....و سرعتي بعد الدفعة ... .... مممممم .......... يبقى إحنا كده في كوكب ..... كوكب .... آه .... إحنا في كوكب الشبيه .

الشبيه ! .... شبيه إيه ؟ .... إحنا طلعنا من كوكب الارض إزاي ؟

حاولت السيارة تهدئة الجميع فقد إنتابهم حالة من الذهول بعد ان عرفو بأنهم خارج نطاق الكرة الارضية : يا جماعة حاولو تهدو شوية ... الامر ابسط مما تخيلو ... الكون ده فيه حاجات عمر ما البني آدم كان يتخيلها ... وإذا كنتو فاكرين إن كوكب الارض هو الوحيد إلي فيه مخلوقات يبقى إنتو غلطانين .... فيه حاجات كتيييير اوي غايبة عن اذهانكو وأكبر بكتير من قدراتكو المحدودة ...

الدكتور فخري : طب وإيه الكوكب ده بقى يا فيلسوفة عصرك واوانك ؟

السيارة وقد أخذت نفسا عميقا متقمصة دور أحد علماء التاريخ : كوكب الشبيه .... إتسمى بالإسم ده لأنه شبيه بكوكب الارض .. مش شبيه من حيث الشكل الخارجي بس ... لا ده كل مكان في الارض ليه شبيه هنا على الكوكب .... يعني الطريق إلي إحنا ماشيين عليه ده يشبه كتير الطريق إلي كنا ماشيين عليه عالارض ...

إسترجع الدكتور فخري شكل الطريق الذي كان يسير عليه قبل الحادث وأخذ ينظر بتمعن في الطريق الذى امامه وأخذ يردد في تعجب : فعلا عندك حق ... الطريق ده شبه الطريق إلي كنا ماشيين عليه ... مع الإختلافات البسيطة ... وكمان تحس إن الطريق ده انضف .

السيارة مكملة : فعلا بالرغم من التشابه الكبير بينه وبين الارض إلا إن هنا فيه بعض الإختلافات البسيطة .... مهو برضه إلي بيقلد لازم يضيف حته كده من عنده ..... آه صحيح نسيت أقولوكو على حاجة هتعجبكو أوي ..

ورد الجميع في فضول : حاجة إيه ؟ ...

السيارة : مش إنتو كنتو رايحيين الساحل الشمالي على الارض ... إيه رأيكو ... تروحو الساحل الشمالي إلي هنا ؟!

وكان إقتراح مثير للجميع وخاصة ان الجو هنا الطف بكثير من جو الارض ....
في الطريق إلى هناك كان احمد ومها في إنبهار كبير مما يشاهدونه على الطريق ... فمع التشابه الكبير بينه وبين الطريق الاصلي كانت هناك بعض اللمسات الرائعة التي جعلت شكل الطريق أكثر إبهارا .


أمام بوابة احد قرى الساحل الشمالي كان يقف كائن له شكل غريب ويشبه كثيرا الكائنات الفضائية التي تظهر في الافلام ... إستوقف السيارة ونظر في دهشة لمن بداخلها وقال بلهجة حادة : إنتو مين وإلي جايبكو هنا .... ممنوع دخول الغرباء هنا ...

السيارة : يا عم دول تبعي ... دول جايين من كوكب الارض .

الكائن وقد تغيرت لهجته الحادة إلى لهجة اكثر لطفا : كوكب الارض ..... يا ستميت ألف مرحبة على كوكب الارض وعلى السكان بتوعه ... يا الف نهار ابيض .... إتفضلو يا بشوات إتفضلو , ده الكوكب نور ... انا لو اعرف أزغرط كنت سمعتكو زغروطة من بتوع كوكبنا ....... ولا يا نعناعه .. إنت ياض .. إوصل مع البشوات ونقيلهم احسن شاليه عندنا .

ومع الدهشة الكبيرة التي إعتلت وجوه الجميع أخذت السيارة توضح لهم : كل إلي في الكوكب هنا بيحبو كوكب الارض وكل سكانه عشان كده لما عرفو إنكو من الارض فرحو بيكو اوي ... ده انتو مثل اعلى ليهم .

وبعد إستلام الشاليه ... نادت السيارة على العائلة : ده مش كل حاجة على فكرة .... عندي ليكو مفاجئة تانية ....


يتبع ..

[قطره ندي]

استمر في الكتابه
واحنا متابعيين

[ELBRNSISA ESRAA]

حلوة اوى ومستنيه الباقى

[العاشقة المجروحة]

حلوة اوى حتى فى الكواكب التانية فى كوسة هههههههههههه عشان من كوكب الارض هيدخلهم
وياستميت مرحبة ههههههههههههه
متاااااااااااابعة معاك شد حيلك شوية

[لبنى مصر]

والله انت مشكله وحاجه مذهله بجد دماغك كبيره تسلم ايديك ومنتظرين الباقى
على راى سموحه كاننا بنتفرج على ام بى سى ربنا يزيدك من موهبتك
فى انتظارك متابعين

[محمد أبراهيم]

الشبيه
قصه و عنوان
لها مغزى وبيان
مازلنا
فى خضم
أعاصير الحكايه
ننتظر بصمت
ماستفسر
عنه تلك الروايه
الرائع مهند
هكذا ستكمل
الصفحات
يتوشحها لونك
الوردي
فالصفحات تعشق
ابداعك فيها
والجمال قرب
حروفك يبقى ابدي
فشكرا على القصه الرائعه
لك جل تقديري
وعميق ودي

[((مهند))]

شكرا ... ملاك ... اسراء .... العاشقة .... لبني ... فارس اتمنى باقي القصة تعجبكو ..

[((مهند))]

4- وبعد إستلام الشاليه ... نادت السيارة على العائلة : ده مش كل حاجة على فكرة .... عندي ليكو مفاجئة تانية ....

ورد الجميع في صوت واحد : مفاجئة إيه !

السيارة : إتفضلو إستريحو الاول وبعدين هقولوكو عالمفاجئة .

ولكن ما رأته السياره من فضول على اوجه الجميع جعلها تتراجع عن قرارها وتعجّل بإخبارهم بالمفاجئة : واضح إنكو كلكو مش هتستريحو إلا لما تعرفو المفاجئة .

الدكتور فخري وعائلته في صوت واحد : يستحسن تقوليلنا دلوقتي .

السيارة : أنا قولتلكو إن الكوكب ده شبيه لكوكب الارض ... وكمان الحاجة إلي مقولتولكوش عليها إن كمان إلي عايشين هنا يشبهو إلي عايشين عالارض .... بمعنى إن كل واحد عالارض ليه شبيه هنا ... مش شبيه من حيث الشكل والملامح .... لا ... شبيه من حيث الحياة إلي عايشها ...

صمت الجميع من هذه المفاجئة .. فمعنى ذلك ان هذه العائله لها عائله شبيهه ... وما يفعلونه هم أيضا يفعلون مثله .... إنه لأمر عجيب ومثير للدهشة والفضول ايضا ان تعلم ان هناك شبيه لك قد قضى عمره مثل ما قضيته انت .... تستيقظ من النوم هو ايضا يستيقظ ... تذهب للعمل هو ايضا يذهب لنفس العمل ... تعشق القهوة هو ايضا يعشقها مثلك .... ما تفعله هو يفعله ... وما تشعر به هو يشعر به ... توحدت الافعال والاحاسيس .. وإختلفت الاجسام .

الدكتور فخري بعد ان افاق من دهشته : معنى ذلك إن إحنا لينا اشباه هنا .

السيارة : بكل تأكيد .. كل واحد فيكو ليه شبيه هنا ... وكمان أشباهكو آعدين هنا في نفس القرية.

وكانت مفاجئة للجميع ... فأسرع الدكتور فخري وعائلته للسيارة ... وإستعلمو منها عن أي الشاليهات بالضبط التي يسكنها اشباههم .. فقد إعتراهم فضول كبير ليقابلو هذه العائله ...

ركب الجميع السيارة وإنطلقو إلي الشاليه الذي تسكنه العائله الشبيهه ... والكل يتخيل افضل الاشكال لشبيهه ... فقد تمنت مها ان تكون شبيهتها اكثر جمالا .. كي ترى نفسها في اجمل الاشكال ... اما زوجة الدكتور فخري فقد تمنت ان تكون شبيهتها اكثر رشاقه حتى ترى نفسها كأرشق سيده على كوكب الارض ( على الرغم من ان الجميع يعلم ان زوجة الدكتور فخري والرشاقة كلمتان متضادتان ولا يصح إجتماعهم في موقف واحد ) .

وصل الجميع لمكان الشاليه .... طرقو الباب .. فتح احدهم وكان من الواضح أنه شبيه الدكتور .... وفي الحال إحتضنه الدكتور فخري ... وكان الشوق كافيا لان يتساقط الدمع من عينيه في غزارة شديدة قائلا : حبيبي حبيبي يا شبيهي .... والله وليك وحشة ... بقى كده أفضل 55 سنة ما اعرفش إن ليه أخ وحبيب .... ولا رنة ولا مرة تبعتلى جواب مع العربية .... إخص عليك إخص .

أزاح الشبيه الدكتور فخري من امامه وهو في غاية الدهشه : إنت مين يا عم إنت ... إنت مجنون ولا إيه .... ومع صوته العالى خرجت زوجته واولاده ... وقد كانو بالضبط كما قالت السيارة ... (زوجة وبنت وولد في نفس أعمار عائلة الدكتور فخري) ... وما ان شاهدو اشباهم حتى إحتضن كل منهم شبيهه ... وسالت دموع الشوق وإبتلت الارض وإرتفعت حرارة اللقاء .... وكانت العائله الشبيهه في تعجب كبير .. فلم يكن يعلمو بعد انهم اشباههم .

اسرعت السيارة إلي العائله الشبيهه كي تشرح لهم ان هؤلاء هم عائله الدكتور فخري وهم اشباههم على كوكب الارض .

يتبع ..

[لبنى مصر]

هههههههههههههه لا بجد جميله
ده انتى خيالى اوى يا مهند دى الافلام الامريكيه مش بتجيب خيال زى كده
متابعين للدكتور فخرى واولاده واشباههم والله بتخيل القصه زى ما اكون شايفاها هتوهنى عن الارض شكلك

[العاشقة المجروحة]

ههههههههههههههههههههههههه
الله ينور والله انت دماغك مالهاش حل
تسلم الايادى بس لو سمحت على اخر القصة تجيبلى الشبيه بتاعى ماليييييشى دعوة
أحسن أعيط وأعملك تسونامى فى الصفحة هههههههههه