مــــقــهي الـــمصريين .. قفلنا القهوه بالشمع الاحمر

[SCREEM]

موضوع رائع وحوار جاد ونقاش هادف
وان شاء الله
لى عوده

تنوري في انتظارك

[SCREEM]

اذا الاخوان قالوا نعم او لا فدى حرية ومش من حق اى حد يهاجمهم اومال المظاهرات اللى اتعملت دى كانت ليه والشباب اللى ضحى بحياته ماهى علشان الحرية والعدالة ومحدش يفرد رايه على حد

اهلا وسهلا بيكي ف القهوه وف المنتدي

رايي من رايك طلما طالبنا بالديمقراطيه الحقيقيه يبقي نتمسك بيها ايا كانت النتيجه وربنا يرحم الشهداء يارب

[SCREEM]

تصبحو علي خير

[ايسل]

ايه القهوه اللى مبتفتحش خالص دى طيب ايه رايك انا هقعد على الباب بره وجايبه الكرسى بتاعى معايا وهتكلم اها
اولا انا معاكم طالما طالبنا بالحريه والديمقراطيه علينا ان نتقبل الجميع
ومن حق اى احد ان يقدم نفسه وعلينا ان نختار ولكن ولكن ولكن
احب اعرف ايه رأيكم فى خداع شعب ايه رأيكم فى الكذب والتخويف ايه رأيكم فى من يقوم بهذه الاشياءلأقناع الاخر بألتاكيد رأيتم الدعايه بتاعت الاخوان على الأستفاءما دخل الأستفتاءعلى الدستور بالدين وما هو الأرتباط بين انك تقول نعم تبقى مسلم ولا يعنى كافر
نفسى افهم عايزه اعرف لما واحده ست عندها ستين سنه تروح لجنه تصوت تقولها هتقولى ايه تقولك نعم علشان ننصر الاسلام وليه قالو للناس اللى هيقولوا لا المسيحيين ده تسموه ايه مش خداع سياسى كيف اثق بهم وهم استخدموا نفس اساليب الحزب الوطنى وعملو بمبدأ (الغايه تبرر الوسيله)
ارفض ان يخطف الاخوان المسلمين ثورتناوارفض بشده ايضا
شكرا كريم على الفكره بجد رائعه بس ياريت تخلى القهوه ورديتين علشان مقعدش على الرصيف تانى

[SCREEM]

معلش ياخالتي القهوه لسه واخدينها جديد ولسه الرجل ما خدتش عليها

بالنسبه لموضوع الاخوان

في قسمين مهمين

انا ضد ان حد يستخدم الدين ف اي حاجه ولكن الاخوان قدرو يتعاملو مع الموضوع بذكاء يحسب ليهم وللاسف الناس الي قالت لا استخدمت فزاعه الاخوان الي كان بيستخدمها النظام السابق (وعلي فكره يا ايسل انا عندي فيديوهات لقساوسه ف كنائس كانو بيقولو للناس قولو لا ومش هقول عشان ايه بس ده برضه مش يبقي تحريض) اانا بس مش حابب اتكلم ف النقطه دي عشان حساسه شويه بس زي ما لينا زي ما علينا يعني الجبهتين عملو زي بعض بالظبط بس بطرق مختلفه

ايا كانت الاستفتاء خلص ولازم نبص لقدام لكن ف حاجه دايقتني علي فكره انا مش ضد الاخوان ولا معاهم انا بس مبحبش التحيز لراي علي حساب راي ولكن يوم اعلان نتيجه الاستفتاء احد الناس الي قالو لا ف احد القنوات الفضائيه قال ان الي قالو نعم ال 14 مليون يعني قال ده راجع لجهل الشعب وان الي قال لا هما المثقفين واصحاب الراي وان الي قالو نعم خانو البلد وهان عليهم دم الشهداء طب ده ينفع هل عشان حد قال نعم يبقي جاهل يعني 14 مليون جاهل هسيبلك انتي التعليق علي دي

وللاسف معظم القنوات ontv دريم عمرو اديب الحياه الجزيره معظم القنوات ماشيه علي نفس الخط

دي اكتر حاجه دايقتني اذا كان احنا لسه ف أ ب ديمقراطيه وف استفتاء امال لما الدستور يصدر هنعمل ف بعض ايه

ده تعليق بسيط ع ردك

وهبقي اسيبلك المفتاح عشان متقعديش ع الرصيف تاني

[SCREEM]

صباح الخير جميعا

[SCREEM]

العربيه

وزير الخارجيه المصري يحذر اسرائيل من شن أي عملية عسكرية على غزة

[SCREEM]

ياريت اي حد يعرف حاجه عن وليد (عفريت افندي) يقول يارب يكون بخير انا بقالي فتره مبفتحش معرفش ظروفه ايه

[SCREEM]

سؤال مهم

حاسس ان البلد بقت بتاعتك وايه اهم الظواهر الي نفسك تختفي؟

سمعنا رايك

[هشام اللول1]

السلام عليكم ورحمه الله وبركاته
صباح الفل ياكريم

وليد ياحاج نزل مصر اجازة وممكن يكون مشغول شوية علشان كده مش بيدخل المنتدي

ام بالنسبه لسؤالك
اكيد طبعا احسسنا اتغير بعد الكبت والمهانه اللي عيشنا فيها 30 سنه في عهد الرئيس المخلوع
وانا بجد لحد دلوقتي لسه مش مستوعب ان المصريين قاموا بثورة وخلعوا رئيسهم

واكيد طبعا مصر دلوقتي اتغيرت كتير
وان شاء الله ربنا هيهدي الحال وتتغير للاحسن والافضل

بارك الله فيك وحفظك ورعاك كريم