استغاثه(هام جدا)

[SAD EYES]

السلام عليكم ورحمة الله وبركاته

اولا برحب بالجميع ويسعدنى انضمامى لاسرة الكافيه
لكن في موضوع اعتقد ان مهم جدا مناقشته معاكم وياريت اسمع رد او تعليقات تفيدنى في ايجاد حل للمأساه دي

الاستغاثه موجهه من مرضى الفشل الكلوى في وحدة الكلى الصناعى بمستشفى السنبلاوين (محافظة الدقهليه)
المرضى بيواجهوا مشكلات كبيره جدا من اهمال في المعامله من الاطباء ومشاكل فى اجهزة الغسيل الكلوى المعطله وكمان فلاتر تنقية الدم والاكبر من كده مشاكل في صرف اكياس الدم والعلاج
للاسف الناس دى بتعانى كتير جدا ومحدش حاسس بيهم وهما ميقدروش يعملوا حاجه غير الرضا بالوضع الحالى لان للاسف ظروفهم الاقتصادية سيئه جدا

كل طلبات المرضى تتلخص فى
1-اصلاح اجهزة الغسيل الكلوى المعطله باستمرار
2-توفير العلاج اللازم لحالتهم وبالكمية الكافيه (لانهم ميقدروش يشتروه من بره)
3-وجود اطباء مختصين يتابعوا الحالات اثناء الغسيل (لان الممرضات بس هى اللى بتكون موجوده والدكاتره منفضين)
4-صرف وتوفير اكياس الدم للمرضى
5-كمان محتاجين اجهزة غسيل كلوى جديده كتير لان حالات المرضى بتزيد ومش عارفين نوقف استقبال الحالات الجديده..


الموضوع كبير جدا وعارفه يمكن ملاقيش الحل هنا ..بس حبيت اعرفكم معاناة مصريين زينا مطحونين بجد ومعرفوش ينزلوا ميدان التحرير ويطالبوا بحقوقهم ...اللى نسينا نطالب بيها فى الثوره وحتى بعد الثورة هتفضل منسيه لان للاسف مبقاش في عين تشوف الناس دى او قلب يحس بيهم


على فكره انا بشتغل فى المستشفى بس مش عندى حلول الا انى اكلم المدير وطبعا مفيش اى نتيجه من الكلام ده الا انهم يشيلونى من مكانى عشان بتكلم كتير

ياريت حل يفيد الناس دى
اتمنى مكنش ازعجتكم بموضوعي
بس الناس دى تستحق اننا نفكر فيهم شويه لان طلباتهم اقل من حقهم بس هما راضيين (صدقونى معندهمش أمل ان اى حاجه تتصلح ولا أمل فى الحياة ..وللاسف كل حاله منهم سايبه وراها هم كبير وناس هتضيع لما يموتوا)
شكرا ليكم
مع خالص تمنياتى للجميع بدوام الصحة والعافيه

[ابو احمد رزق]

أسأل الله أن يعافي كل مسلم
وجزاكي الله كل خير أختي
علي إهتمامك بحال إخواننا
وأبدا لن ننسي معاناتهم
فأنا علي يقين
بأن الامر خطير
وخاصه في تلك القسم
أسأل الله العافيه للجميع
عل أن يسمعنا مسؤل
عنده ضمير
وجزاك الله خير
وجعله في ميزان حسناتك

[زهور الحياة]

اسأل الله ان يشفى اخواتنا المرضى واتمنى من الاخوة المسئوليين الانتباه الى هذا الامر الخطير