الليلة ليلتك يا معلم ..

[ميرو المصريه]

اه يا مهند متكمل وتخلص
نحن متشوقين
عايزين نعرف اخر اخبار عبده

[العاشقة المجروحة]

دى مفترية انا لو منه اسيبهم يولعوا فيها
هههههههههههه ياعينى على عبده وسنين عبده واللى جابوا عبده
طلعت عين عبده تسلم يا مهند

[((مهند))]

شكرا لكل إلي ردو


الملاك

ميرو

العاشقة


وربنا يكون في عونك يا عبده ... تعالو نشوف حصل إيه ؟

[((مهند))]

3- يقفل عبده السماعة ويفكر إزاي هيتصرف في ال10 تلاف الباقيين .... وعمل المستحيل عشان يلمهم , لكن كل محاولاته بائت بالفشل .... فقرر إنه يروح يقابل العصابة , ويحاول يفاوضهم في باقي الفلوس .


وراح في معاده ومعاه ال30 ألف ...... واول ما وصل المكان , قابله واحد وخده معاه للمقر بتاعهم .

عبده : عاوز أعرف إنتو واخدني على فين ؟

- متتكلمش كتير وهتعرف كل حاجة .

أول ما وصلو المكان قرب منه واحد من العصابة ومد إيده عشان يسلم عليه : معاك برعي رئيس مجلس العصابة ...... إتفضل .... إتفضل يا أستاذ عبده .... حضرتك شكلك متوتر أوي ..... إحنا بشر عاديين , مش زي ما السيما مبوظة سمعتنا وبتجبنا وحوش معندناش قلب ...... هو أنت أول مرة تقابل رئيس عصابة عالحقيقة ؟

عبده : حقيقي دي أول مرة ...... أنا كنت بشوفهم بس في الافلام ...وكان لازم الراس الكبيرة يكون أقرع .... بس حضرتك ما شاء الله الشعر في راسك ملوش عدد ..... ميبنش على ساعتك خالص إنك رئيس عصابة .

برعي : هههه ..... ما إحنا لازم بقى نجاري الموضه ونعمل النيوبوك إلي بيقولو عليه ده ......... قولي يا عبده إنت جبت ال 40 ألف , ولا لأ .

يبلع عبده ريقه بصعوبة وهو بيقول : في الحقيقة .... في الحقيقة , أنا معاييش غير 30 ألف ....... وأوعدك إني هديك العشرة الباقيين بعد الإستلام .

برعي : تؤ تؤ تؤ ....... كده هزعل منك يا عبده ..... إحنا متفقين على 40 , وإنت مجبتش غير 30 ...... أنا آسف أوي هنضطر نحبسك في أوضه جنب عروستك على ما باقي الفلوس ييجو ...... خدوه .
وياخده راجل لأوضه جنب أوضة عروسته , وأول ما يوصل يربطه الراجل , ويطلع من الأوضه ويقفل عليه .

شوية كده ويلاقي صوت جاي من الأوضه إلي جنبه , فيروح يقرب من مصدر الصوت إلي جاي من فتحة موجودة في الأوضة , ويبص يلاقي عروسته لسه بفستان الفرح إلي معداش عليه غير تلات تيام ..... يحاول يطلع إيده من الفتحة ويمسك إيد عروسته ويقول : منى ...... إزيك يا حبيبتي ... وحشتيني أوي التلات تيام دول ..... أنا معرفتش أنام غير لما إتصرفتلك في ال30 ألف ..... بس هما حبسوني عشان كانو عاوزين كمان عشرتلاف ..... نفسي أعرف مين الجزمة إلي طلب منهم يزودو الفلوس .

إستنو آخر حلقة ...

[((مهند))]

4- الاخيرة

منى : حرام عليك يا عبده ماتشتمهمش , دول عصابة لطيفة أوي .... أنا عمري ما شفت حد خطاف بيعامل المخطوفين بتوعه بالطريقة دي ...... يا عبده دول ناس محترمين أوي ..... تخيل يا عبده مفيش حد فيهم سكعني كف على وشي ولّا إداني بونية ولّا حتى قالي كلمة وحشة ..... بجد ناس زوق أوي يا عبده ...... بس هي الظروف إلي ملطشة معاهم وخليتهم يمشو في الطريق ده .

عبده : معقولة يا منى إنتي بتدافعي عنهم كده ؟

منى : أديك يا سيدي مخطوف زيي , وبكره تشوف معاملتهم معاك هتبقى إزاي ؟ ....... بجد يا عبده هتتمنى إننا نكمل شهر العسل هنا ..... وهيبقى أحلى شهر عسل .

عبده في رومانسية : طالما إنتي جنبي يا موني ..... يبقى أيامي كلها عسل ...... مخبيش عليكي يا حبيبتي , أنا مبسوط أد إيه دلوقتي .... أي نعم مخطوف وكمان مربوط .... لكن آعد جنب أحلى إنسانة .

منى : الله على كلامك يا عبده .... قول ... إشجيني .

وقبل ما يرد عبده , إتفتح الباب بتاع الأوضة إلي آعد فيها , ودخل برعي وهو بيقول : الله الله ...... إحنا نخطف عروستك وبعدين نخطفك ..... وإنتو آعدين تحبولي في بعض حضراتكو ..... ده إسمه تهريج وتسيب وعدم إحساس بالمسؤولية ...... يا أستاذ حس شوية بالموقف إلي أنا وعصابتي فيه ...... واحد كنا طالبين منه 40 ألف وهو مجبلناش غير 30 بس .... العشرة الباقيين دول هييجو إزاي ؟ ....... أرجوك يا أستاذ ساعدني ..... أنا مبقتش عارف أفكر ....... كل المعلومات إلّى الواحد كان عارفها عن الخطف إتبخرت ......

عبده وهو صعبان عليه الراجل : خلاص يا عم برعي ..... إستهدى بالله كده ..... وصلى عالنبي .
برعي في إيمان عالي : عليه أفضل الصلاة والسلام .

عبده : بص يا سيدي , إحنا نتصل بأبويا عشان نطلب منه العشر تلاف ونديله مهلة أسبوع عشان يقدر يتصرف ويجيبهم ...... إيه رأيك يا عم ؟

برعي : والله فكرة مش بطالة .... وتقديرا مني لفكرتك دي .... أنا هفكك , وهخليك في الأوضة إلي جنب أوضة عروستك ...... إحنا عارفين بقى إنكو عرسان جداد وملحقتوش تتهنو ببعض ...... بس أمانة عليك يا شيخ أوعى تكون شايل مني يعني أنا ولا حد من الرجالة دول عشان حرمناك من عروستك يوم فرحك .

عبده : عيب عليك يا برعي ..... إنت شكلك راجل طيب وإبن حلال وربنا هيكرمك , وأبويا يتصرف في العشرتلاف بسرعة ..... بس عندي طلب صغير منكو ........ تكبرولي الفتحة إلي في أوضتي شوية .

وبعد إتصال عبده بوالده , قضى عبده مع منى 6 أيام ..... كل يوم يصحي فيها عبده .... يجري على الفتحة ويبص على عروسته وينادي عليها عشان تصحي وتكمل معاه اليوم ...... وطول اليوم يتكلمو مع بعض في حياتهم بعد كده وفي أحلامهم وأمنياتهم ...... وكانو عايشين ملوك ..... الأكل يجيلهم لحد عندهم وكل إلي بيعملوه إنهم آعدين مع بعض وكل العصابة بتخدّم عليهم ...... إكتشفت منى في الايام دي إنها غالية اوي عند عبده .... بعد ما حكالها على إلي عمله عشان يتصرف في المبلغ ده ..... وعدت ست أيام عليهم كانو فعلا أحلى شهر عسل ....
وصل أبو عبده ومعاه باقي الفلوس ...... وخد عبده عروسته عشان يمشو , لكن برعي وقفهم : استني يا عبده ...... أنا عاوز أديك حاجة ..... وراح مديله شنطة ..... فتحها عبده ولقى فيها فلوس : إيه الفلوس دي ؟

برعي : دول ال 40 ألف بتوعكو ..... وعليهم ألفين من عندي ... الفلوس دي بتاعتكو إنتو .... انا خلاص قررت أتوب وأروح أدور على واحدة أتجوزها وأعيش معاها باقية عمري ....


تمت ..

[العاشقة المجروحة]

نعم ياخويا تاب
ده ايه الخطاف الموكوس ده
قصره يالا خليها علينا
بكرة يتجوز ويقول ياريت اللى جرا ماكان
تسلم الايادى يا مهند فى انتظار قصة جديدة
تحياتى وتقديرى

[ELBRNSISA ESRAA]

الله ونعم التوبه ميرسى اوى على الموضوع

[((مهند))]

نعم ياخويا تاب
ده ايه الخطاف الموكوس ده
قصره يالا خليها علينا
بكرة يتجوز ويقول ياريت اللى جرا ماكان
تسلم الايادى يا مهند فى انتظار قصة جديدة
تحياتى وتقديرى

هههههه ... إيه إلي وكسه بس ؟ ... الراجل بطل خطف وتاب ..ربنا يكرمه ويكتر من امثاله

وبعدين حرام عليكي إنتي كده هتخوفي الراجل من الجواز ... الراجل عاوز يبتدي صفحة جديدة

[((مهند))]

الله ونعم التوبه ميرسى اوى على الموضوع

شكرا يا إسراء ...

[ميرو المصريه]

ايه ده ياعم
بعد ده كله
تابوه
ربنا يهدى الجميع
ويتوبه على اللى بيعمله