:: احسب معايا حسبة بسيطة كدة ::

[Rosy magic]

حسبة بسيطة

محتاجة مفكرين المنتدى و المحاسبين بتوعنا شغالين تمام


على طول كده ندخل فى المفيد و قوام قوام



حضر الكالكيوليتور ( مش عارفة ايه دة ) بتاعك و الا افتح موبايلك

اعمل اللى انت عايزه و خلى جنبك كوباية شاى صعيدى تقيل عشان انت ما تضمنش ايه اللى هيحصلك بعد ما تقرا الموضوع ده



شوف يا سيدى


واحد اعرفه شغال موظف

موظف يعنى 240 جنيه مرتب و 40 حوافز يعنى من الاخر واد تقيل و عليه الطلب

فكر انه يخطب بقى ما هو اخد 30% علاوة بقى و الحياة زهزهت

نزل السوق و حسب كل شىء بالورقة و القلم عشان يبقى عارف كل حاجة قبل ما ياخد الخطوة الكبيرة بقى و يفرح الحتة بتاعته ( الجو بتاعه يعنى )

الدهب وصل 170 جنيه للجرام على الاقل يعنى على الاقل 4000 جنيه شبكة ( ماشى عدى دى )

فستان الست هانم فى وسط البلد من عند المحل اللى جابت منه شفيقة جارتها يعنى هى احسن منها فى ايه !!! سعره من 1800 الى 2400 جنيه متوسط و ما تنساش الحبشتكانات ( جزمة و حاجات كده )

الكوافير اللى هى بتروح له دايما و بترتاح له عايز 700 جنيه و كده عامل معاه واجب ( بيحلف لى انه عمره ماشاف عليها امارة على انها بتروح للحلاق اصلا )

الاستوديو عايز 800 جنيه و هياخد منظرين فى الحديقة كده عشان التركيبات ( فوت دى رخرة )

ايجار عربية للزفة طبعا 200 جنيه ( الصحاب مش بيتضمنوا فى المواقف دى يبقى عربية يد و الا الحوجة لحد )

اه نسيت و الصالة المكيفة اللى فى المول لازم ما تقلش عن 180 فرد و بالدعوات يعنى حسبة 7500 جنيه كده على الحروكروك ( بوفيه مخنوق مش مفتوح ابدا )

الافندى قال على ايه اشترى بدلة ليا ان اودى الحتة السودة بتاعة فرح اختى للمغسلة و عليها قميص جديد بكرافتةو تعدى فى الزحمة و يجيب معاها جزمة و حزام و شراب حسبة 300 جنيه كده

بس لحد كده و قال ماشى اهو يميل على الحج و يطلب منه سلفة كده يمشى بيها الحال على سلفة من الشغل و جمعية مع صحابه و يلم الليلة

الليلة دى اتكلفت عليه بمبلغ هوما يقدرش يجمع منه الا 6000 جنيه




سؤال بسيط و برىء و عادى و غير شرير و غير هادف للشحاتة و الا الاحسان



تفتكروا يقدر يجمع الباقى فى كام سنة ؟؟؟؟

بلاش دي ،

اقترحت عليا واحدة صحبتي وقالتلي هي مالها القعدة في البيت

ضروري يجوز يعني ..

انتو ايه رأيكو !!!!!!!

[Essam Net]

انا والله من رائي انوا ما يفكر بالجواز خالص ..

تعرفى يا روز انا مره كنت قاعد جمب جدى .. لقيتوا بيقول ..
الاهى اللى اتجوز قبلى ربنا ما يوريه فرحه .. واللى يتجوز بعدى ربنا يبتليه بنصيبه ..
فسالتوا ليه ؟؟ قالى لان اللى اتجوز قبلى ما نصحنيش .. واللى اتجوز بعدى ما شرنيش ..

متهيئلى كدهـ رأى واضح جدا .. ودا شاب غلبان .. مالوا بالحاجات دى ..

[Rosy magic]

انا والله من رائي انوا ما يفكر بالجواز خالص ..

تعرفى يا روز انا مره كنت قاعد جمب جدى .. لقيتوا بيقول ..
الاهى اللى اتجوز قبلى ربنا ما يوريه فرحه .. واللى يتجوز بعدى ربنا يبتليه بنصيبه ..
فسالتوا ليه ؟؟ قالى لان اللى اتجوز قبلى ما نصحنيش .. واللى اتجوز بعدى ما شرنيش ..

متهيئلى كدهـ رأى واضح جدا .. ودا شاب غلبان .. مالوا بالحاجات دى ..

هههه ... جدك عندو حق ....

بس بتهيئلي بردو يعني .. لو متجوزوش هيعملوا ايه ؟؟؟؟؟

ممكن يقزقزو لب بردو

مضطرين وأمرهم لله ...

[ELKHWAGA]

والله يا روز عندك حق وده الموجود فعشان كدا انا قررت انى ابقى خفيف خفيف كدا عشان وجع الدماغ ده هههههههه تسلمى يا قمر على موضوعك ...........

[Rosy magic]

والله يا روز عندك حق وده الموجود فعشان كدا انا قررت انى ابقى خفيف خفيف كدا عشان وجع الدماغ ده هههههههه تسلمى يا قمر على موضوعك ...........

ههههه ... ميرسي للتعليق الطريف ...

ان شاء الله البشرية كلها هتنقرض كدا ... خفيف خفيف برده