الدكتور عصام شرف قائد الثورة المضادة !!!

[محمد ياسين طه]

أعتقد أن موقف الدكتور عصام شرف من الثورة قد ظهر بوضوح .
الرجل ضد الثوار .
حملناه على أعناقنا .. وكان هذا خطأ كبير وقع فيه الثوار .. أن تسرعوا بإعطاء الشرعية لرجل إختاره مبارك من قبل وزيراً ومكلف من أعضاء المجلس العسكرى المختار بالكامل فى عهد مبارك أيضاً بما فيهم وزير الدفاع .. ولكن البعض يؤكد أن الذين حملوه على الأعناق ليسوا من الثوار .. بل كانوا مجرد حرس خاص لرئيس الوزراء وإندسوا بين الثوار .
الرجل يرينا اليوم نفس الوجه الذى قابلنا به مبارك .. عناد وإصرار على إبقاء الفساد .. ويصر رئيس الوزراء على ما يلى :
(1)إبقاء المحافظين الذين إختارهم بنفسه ثم رفضهم الشعب بإصرار وعناد شديد .. وعدم إحترام إرادة الثوار المطالبين بتغيير المحافظين .. والذين فشل بعضهم فى محافظات أخرى من قبل .
(2)يصر على إبقاء مباحث أمن الدولة تحت مسمى قطاع الأمن الوطنى .. مع إبقاء نفس الضباط الذين عذبوا الشعب ومارسوا ضدهم أبشع الجرائم ضد الإنسانية .. والذى سيبدأ عمله إعتباراً من 1 مايو .
(3)الإصرار على بقاء المجالس المحلية الممتلئة بفساد أعضاء الحزب الوطنى .
(4)إصدار قانون منع التظاهر والإعتصام والإضراب حماية للفساد .. بحجة حماية الإقتصاد الوطنى .. وهذا قانون لم يصدر حتى فى عهد مبارك .. وقد فض الجيش ثم الأمن حالياً بالفعل عدة إعتصامات بالقوة وبالوحشية عودة لعصر مبارك .
(5)يصر على إبقاء قانون الطوارئ سيئ السمعة .
(6)الإصرار على إبقاء رؤساء مجالس إدارات شركات قطاع الأعمال العام ( القابضة والتابعة ) ورئيسهم عادل الموزى .. وكلهم معينون من النظام السابق .. وكلهم يبقون أقارب ضباط مباحث أمن الدولة وأعضاء الحزب الوطنى المنحل .. وأكثرهم فاسدون وقدمت ضدهم بلاغات للنائب العام .. وعلى رأسهم عادل الموزى المتهم بإهدار المال العام .
(7)يصر على عدم الإهتمام بمحاسبة الصف الثانى والثالث من قيادات المؤسسات الوطنية الفاسدين .. والإكتفاء بمحاسبة الصف الأول الذين يعرفم الثوار والظاهرين لهم .
(8)يصر على إبقاء رجال الدين السابقين الذين أيدوا مبارك ودافعوا عنه ووقفوا ضد الثوار وإتهموهم بأنهم خوارج وخارجين عن الحاكم .
(9)يصر على الإبقاء على القوانين الإجتماعية سيئة السمعة والتى أضرت بالأسرة المصرية .. تلك القوانين التى صدرت بالكامل تحت رعاية سوزان مبارك .
وفى النهاية نؤكد للسيد رئيس الوزراء أننا كثوار حقيقيين نراك جيداً .. ولم نغفل عنك لحظة منذ تعيينك فى منصبك .. وأعطيناك فرصة جيدة ووقتاً كى تعمل ولنحكم على عملك .. وكان فى مقدورك لو كنت من الثوار حقاً أن تتخلص من كل الفاسدين وأعداء الثورة فى كل المؤسسات الوطنية المصرية وعلى كل المستويات خاصة أعضاء الحزب الوطنى ورجال مباحث أمن الدولة .. ولكنك جئت تبقى الفساد كما هو ولا تحرك ساكناً إلا بثورة جديدة وجمعة تظاهر جديدة .. ثم نجدك حتى لا تحترم تلك المظاهرات والثورات فى المحافظات والجامعات والشركات .. وتصر كما أصر مبارك على إبقاء قدامى الفاسدين .
قل لنا يا سيادة الرئيس ما الفرق بينك وبين أحمد نظيف أو أحمد شفيق لو بقوا فى منصبك ؟؟؟؟

[مصراوي كافيه]

يا مولانا طب بس براحة مش كده ..

انت قولت دلوقتي 9 نقط كل نقطة منهم محتاجة ردح من الزمن عشان تتنفذ زي ما احنا عايزين ..

الراجل شغال بأيده و سنانه ..

و بعدين مش فاهم انت ليه ركزت اوي في ان مبارك هو اللي اختاره ..

و نسيت _او تناسيت_ ان المشير نفسه اللي هو الحاكم العسكري و اللي بقينا بنغنيله ليل نهار برده مبارك اللي مختاره ..

استنا انا هقولك ليه .. عشان مفيش حل تاني ده خط حمايتنا الاخير ..

يا نصبر و نشوف هينصرفوا ازاي ..

يا يحصل انقلاب عسكري _ و دي كارثة _ ..

يا نبقى زي ليبيا عقبال املتك ..

اه هو كان وزير في عهد مبارك .. بس لو هنشكك في خلق الله كلها يبقى لو جابولنا صحابي هنقول عليه من فلول الحزب الوطني ..

الراجل مشهود ليه بالاحترام و طالع من قلب ميدان التحرير ..

و طبعا انت في غنى عن اني اقولك ان في اولويات لازم يهتم بيها الاول ..

زي علاقتنا بباقي الدول _ و خصوصا اللي لينا فيها اصول و ارصدة للي ينشك في زورة _ ..

و النيل اللي مش هنلاقيه بعد كده ..

و غيرهم ..

[Serag Magdy]

برنس....
اهدي كدة يا معلم
كل حاجة بتتاخد براحة
بشويش علينا والنبي....ناخدهم واحدة واحدة

ولكن البعض يؤكد أن الذين حملوه على الأعناق ليسوا من الثوار .. بل كانوا مجرد حرس خاص لرئيس الوزراء وإندسوا بين الثوار .

علي ما اظن ان الراجل كان من اول يوم في ميدان التحرير ....حتي قبل ما يبقي رئيس وزراء....بل ان تكليفه لهذا المنصب كان بناء علي انه كان من الثوار

(1)إبقاء المحافظين الذين إختارهم بنفسه ثم رفضهم الشعب بإصرار وعناد شديد .. وعدم إحترام إرادة الثوار المطالبين بتغيير المحافظين .. والذين فشل بعضهم فى محافظات أخرى من قبل .

ماهو السيد رئيس مجلس الوزراء هو المكلف باختيار المحافظين...يعني مش بيفن الراجل يعني....بل ان اسمه رئيس مجلس المحافظين تقريباً.....ثم مين اللي الشعب رفضهم؟مفيش غير بتاع قنا...وكل المحافظات اساسا مش عاجبها اللي بيعمله الشعب في قنا
حضرتك اللي مكبر الموضوع حبتين....ثم انه مش اي 1000 نفر في اي محافظة مش ها يعجبه شكل المحافظ الجديد بتاع ها يروح يعتصم....فيه مثل بيقولك أدي العيش لخبازه
علشان كدة بأظن ان عصام شرف هو الادري مش احنا

(2)يصر على إبقاء مباحث أمن الدولة تحت مسمى قطاع الأمن الوطنى .. مع إبقاء نفس الضباط الذين عذبوا الشعب ومارسوا ضدهم أبشع الجرائم ضد الإنسانية .. والذى سيبدأ عمله إعتباراً من 1 مايو .

يا ابني يا حبيبي
يا حبيبي يا ابني
اسرائيل....فيها جهاز للأمن الداخلي يسمي الشين بيت
اميريكا.....فيها الــ"الاف .بي .اّي"
انجلترا.....فيها سكوتلاناديارد
حتي ايران فيها جهاز مسمي بالحرس الثوري
وبعدين يعني ماهو مش ها ينفع نشيل كل ظباط امن الدولة
امال يعني ها نجيب ظباط منين؟؟؟
من الشرطة المدرسية مثلاً؟؟؟
ثم بقي عايز تحاسب الظابط الفاسد.....يبقي حاسب كل موظفين الدولة الفاسدين....

(3)الإصرار على بقاء المجالس المحلية الممتلئة بفساد أعضاء الحزب الوطنى .

اقسم بالله...
عليا النعمة..
ورحمة خالي حسن...
الحزب الوطني اتحل.....يعني دلوقتي مفيش كيان اسمه الحزب الوطني....ثم ان اول ناس باعوا الحزب الوطني هما كبار وقيادات الحزب الوطني
فبلاش ناخدي الحزب الوطني زي اللبانة في بقنا...كل ما تحصل حاجة مش حلوة يبقي اكيد من الحزب الوطني

(4)إصدار قانون منع التظاهر والإعتصام والإضراب حماية للفساد .. بحجة حماية الإقتصاد الوطنى .. وهذا قانون لم يصدر حتى فى عهد مبارك .. وقد فض الجيش ثم الأمن حالياً بالفعل عدة إعتصامات بالقوة وبالوحشية عودة لعصر مبارك .

تسمح لي اسألك سؤال لولبي مرن؟؟؟
انت عايز الاعتصامات في ايه؟؟؟
عايز ايه سموك من الاضراب؟؟؟
اصل مش معقول واحد بقاله 30سنة طالع عين اهله وساكت ولازم يعمل اضراب في اليومين المنيلين دول؟؟
يصبر يا اخي اما نعرف مين الريس .......اما نعرف نعمل ام برلمان
وبعدين يطالب بحقوقه
ثم والله العظيم كل واحد عايز يعمل اي حاجة يقولك نعمل اضراب
-موظفي البنوك.........اضراب
اللي مش عاجبه ريسه............اضراب
لحد ما هنضرب نفسنا بالنار بعد كدة

(5)يصر على إبقاء قانون الطوارئ سيئ السمعة .

يعني ينفع بالله عليك تبقي الدبابة - مش شيفورليه الدبابة- اكتر في الشارع من التوك توك ونمشي من غير قانون طوارئ؟؟
طب ايه مفهوم الطوارئ عند حضرتك غير ان بلدك من غير رئيس ومن غير برلمان وان اللي حاكم البلد العسكر؟؟؟

(6)الإصرار على إبقاء رؤساء مجالس إدارات شركات قطاع الأعمال العام ( القابضة والتابعة ) ورئيسهم عادل الموزى .. وكلهم معينون من النظام السابق .. وكلهم يبقون أقارب ضباط مباحث أمن الدولة وأعضاء الحزب الوطنى المنحل .. وأكثرهم فاسدون وقدمت ضدهم بلاغات للنائب العام .. وعلى رأسهم عادل الموزى المتهم بإهدار المال العام .

طب صلي ع النبي
انت شد ع الصين وهات صفقة رؤساء مجالس ادارات يديروا الشركات دي
يا عم عليا النعمة لو انت معاك اي دليل يدين اي حد روح قدمه ضد عادل الموزي ضد عادل المانجاوي ضد اي فاكهة تعجبك...انما حضرتك بتكرس كل جهودك للتشنيع علي اي حد

(7)يصر على عدم الإهتمام بمحاسبة الصف الثانى والثالث من قيادات المؤسسات الوطنية الفاسدين .. والإكتفاء بمحاسبة الصف الأول الذين يعرفم الثوار والظاهرين لهم

يا عم اللي الحكومة تقصر فيه ...نعمله احنا
معاك اي دليل ضد اي مسئول في الصف الثاني او الصف الثالث او حتي في محو الامية اطلع ع النائب العام وقدمه

(8)يصر على إبقاء رجال الدين السابقين الذين أيدوا مبارك ودافعوا عنه ووقفوا ضد الثوار وإتهموهم بأنهم خوارج وخارجين عن الحاكم .

اااااااااااااه
ممكن يسلخهم.....او ينفخهم....او يعتقلهم ويعذبهم حتي يرتدوا الي دين ابائنا واجدادنا...او يكهربهم.....او يدخلهم اوضة الفيران....او يجيبلهم ابو رجل مسلوخة
يعني بس فهمني انت عايز ايه من اللي بيؤيدوا مبارك؟؟؟
ملحوظة:انا منهم...

(9)يصر على الإبقاء على القوانين الإجتماعية سيئة السمعة والتى أضرت بالأسرة المصرية .. تلك القوانين التى صدرت بالكامل تحت رعاية سوزان مبارك .

بص يا ابني ....رئيس الوزارة ليه دور مختلف تماماً عن دور مجلس الشعب
يعني مش ها يقدر يسن قانون او يلغي قانون أخر
فحضرتك معلش يعني استحملنا لحد ما نستورد برلمان-اسرع يعني- يعمل كل اللي عايزينوه

وفى النهاية نؤكد للسيد رئيس الوزراء أننا كثوار حقيقيين نراك جيداً .. ولم نغفل عنك لحظة منذ تعيينك فى منصبك .. وأعطيناك فرصة جيدة ووقتاً كى تعمل ولنحكم على عملك .. وكان فى مقدورك لو كنت من الثوار حقاً أن تتخلص من كل الفاسدين وأعداء الثورة فى كل المؤسسات الوطنية المصرية وعلى كل المستويات خاصة أعضاء الحزب الوطنى ورجال مباحث أمن الدولة .. ولكنك جئت تبقى الفساد كما هو ولا تحرك ساكناً إلا بثورة جديدة وجمعة تظاهر جديدة .. ثم نجدك حتى لا تحترم تلك المظاهرات والثورات فى المحافظات والجامعات والشركات .. وتصر كما أصر مبارك على إبقاء قدامى الفاسدي

احب انا بقي العيال الصاحية دي
بس كل اللي بطلبه من حضرتك ادي للناس فرصة تشتغل
شرف ومن قبله شفيق لم يستخدموا حتي الان مصباح علاء الدين او العصا السحرية لحل مشاكل تم بناؤها في عقود في ظرف اسابيع
الراجل يمكن منامش في بيتهم يومين علي بعض
وكل يوم في حتة بيحاول يبني دولة من اول وجديد

قل لنا يا سيادة الرئيس ما الفرق بينك وبين أحمد نظيف أو أحمد شفيق لو بقوا فى منصبك ؟؟؟

نظيف محبوس
شفيق معجابش الشعب
شرف احنا-اللي هو الشعب يعني-اللي جيبناه
اسف للأطالة