]الحل ايه لما نهر النيل يجف

[misterattia]

الحل ايه
لما نهر النيل يجف
لما عقل الناس يخف
لما هيموت الولاد
لما هنسوق فى العناد
لما مصر تفضل فى الرقاد
الحل ايه لما تحرقوها
ولايبقى منها غير رماد
الحل ايه فى البلطجه
وانعدام الامن
وكمان بطاله ونقص زاد
عملنا ثوره
طاب يعنى ايه
واخدنا ايه
اتغير ايه
ايه اللى زاد
والفقر اصبح اعتياد
والذُل عاد
كُلنا اصبح خلاص
فقيه سياسه
ولاعاد ذكاء
ولاعاد فراسه
ولاعاد شعور
ولاعاد حساسه
سايبين شياطينهم
وعايشين فى النجاسه
واحنا خلاص زى العبيد
وهيبعونا فى سوق نخاسه
هيبيعوا فينا ويشتروا
والله وبجد انتكاسه
يلعنها ايام السياسه
واللى خدناه م السياسه
ويلعن الثوره وسنينها
ويارب ع المفترى
واللى ماسكينها
واللى حابسين دمها
كاتمين شرايينها
مصرنا بتموت
ياربنا عينها
وامسح دموع عينها
ياخلق هووه
حرام عليكم بقه
وابعدوا عنها
معدتش تزرع ارضها
ولاعدش فيه طينها
حرام عليكم كفايه
حرقه مساكينها
حرام عليكم جروحها
ما احنا اللى حاسينها
واحنا اللى ساكنينها
الغوله طمعانه
وسنت سكاكينها
وامنا هتموت
وانتوا اللى ماسكينها
بمؤامره حبكينها
بتقفلوها ليه
وساكين دكاكينها
مش انتوا قال منها
وياما قلتوا كتير
ان انتوعايزينها
ورئيسكوا هيزينها
لكنها كلمه
وناسنا قايلينها
يا تنصلح من تانى
وتعدل موازينها
يا تنعمل ثوره
وتكونوا خاينينها
يا تتقوا ربنا
وتحافظوا على دينها
لجل ماتسير
الحياة
وتفتح ميادينها
=========

عطيه الخضرى

[محمد مطاوع]

وايه الحل يا مستر دلنا لأن عقولنا مشتتة