الفِتنــة البيسينيّــة

[Young DeviL]

الفِتنــة البيسينيّــة

الموضوع كبر يا جدعان.. كل يومين يطلع إعلان مستفز ونقول ماشي.. مش مشكلة
هوجة الإعلانات اللى بتتحدى الملل جابت لنا شلل رعاش وصبرنا وقلنا ماشي.. أهو كله بثوابه عند ربنا باعتبار اننا بنصبر على المكروه
هوجة إعلانات الزبادى اللي خلت الطفل يسرق ويكذب ويتشقلب ع الحيطة عشان يحلق لابوه وياخد علبة زبادي.. وقلنا ماشى
الحكومة عايزة تعلمنا القواعد الجديدة لكى تعيش فى هذه البلد وهي: ماتقولش إيه ادتنا مصر.. قول هننهب إيه من مصر.. ولاّ إعلان شيبسي فوكس اللى من يوم ماشفته بقيت باروح أشترى شيبسي أجيب كل نوع ماعدا فوكس ده أسيبه زي الكلب على الرف.. أظن اللى عامل الإعلان ده شركة منافسة لفوكس يعني
ولاّ إعلان سيراميكا رويال اللىي جايبين سعادة الباشا مهند عشان يضحك للكاميرا ويرطن بالأجنبي ويقول مملكة من الجمال.. طب حد فاهم هوه بيقول إيه؟؟ مش ممكن يكون بيقول سيراميكا رويال.. ليه انتوا مابتستحموش؟؟.. كان الأحسن يعلموه يقول الجملة بالعربي عشان نفهم زي البت الصينية لما بتيجى تبيع حاجات للشقق وتقول: أندى هاجات هلوة
*******
ولاّ إعلانات السياحة الجديدة اللي محسسينا اننا عالة على السياح أساسا والمزّة الأجنبية تقولك: إنني لا استطيع أن أعيش بحرية فى هذه البلد.. طب ما إن شالله ماعشتي انت وأهلك هنا يعني.. ماتغوري وتريحي نفسك من الناس الزبالة اللي زينا.. هوه احنا بنستفيد منكم حاجة.. كل شوية يقول لك إيراد مصر من السياحة يضرب رقما قياسيا واحنا مش عارفين نشتري ساندويتش فول عشان بقى بجنيه وربع
وبعدين معروف أصلا ان مصر سياحة درجة تالتة.. يعني السياح النضاف بيروحوا أسبانيا وفرنسا ولبنان كمان.. إنما السياح بتوعنا دول يبقوا عم مايكل بتاع المكواة اللي في نيويورك.. والست إليزابيث اللي بتبيع فى العتبة والشواربي بتوع هولندا.. وعم فرناندو بتاع وصلة الدش المركزي اللي في لندن.. ناس مننا وعلينا يعني.. يبقى بلاش فزلكة بقى
*******
المهم كل الحاجات دي لذيذة وبنعديها إنما الإعلان الأخير ده ياجماعة اللي مش هيعدي بالساهل أبدا
عيل صغير.. بس نضيف قوي بصراحة.. ييجي ويقولك: أنا باحب الصيف عشان بانزل البيسين.. وواحدة تانية: أنا باحب الصيف عشان باتفسح في ملعب الجولف.. والتالتة: أنا باحب الصيف عشان باروح اشترى من أكبر مول.. وكل واحد جايب أسباب حضرته فى إنه.. اسم النبى حارسه وصاينه.. بيحب الصيف
ده كله عشان مكان جديد للمعيشة طبعا مش لينا احنا .. ليهم يعني.. هوه انت عمرك شفت بيسين عشان تنزل فيه ياعم؟؟
طبعا احنا مش بنقرّ على العالم دي اللى بتنزل البيسين.. هوه يعني إيه بيسين أصلا؟؟.. أكيد حاجة بتتنزل يعني.. ولا على الأمورة اللي بتتفسح ولا على الست هانم اللي بتروح تشتري وناسية ان ازازة الزيت بحداشر جنيه
وهما دول بيفرق معاهم زيت؟؟ دول لو طبخوا بزيت البترول برضه مش هيأثر معاهم
أنا بس غرضي اقول ان الإعلانات دى مش لينا.. فبلاش منها.. يعنى قاعدين نتكلم عن الفتنة الطائفية.. وفيه فتنة أكبر منها على شفا حفرة.. وهيه الفتنة البيسينيّة
يعنى اشمعنى الواد ده ينزل البيسين وانا لأ؟؟ مما سيؤدى إلى إن أنا هاروح افجّر البيسين ده اللى انا مش عارف هوه ايه.. وتكبر المسألة.. وتنقسم البلد فريقين.. فريق اللي عنده بيسين وفريق اللي مش بيستحمى أساسا.. وتكبر الفتنة.. ويظهر فى الخارج فريق: بيسينات المهجر.. وفريق: اتحاد البيسينات.. والموضوع يكبر
*******
ولهذا ومنعا لكل ما سيحدث فأنا عملت إعلان موازي لهذا الإعلان.. وزي ما إعلانهم خاص بالأغنيا بس.. أنا إعلانى خاص بالفقرا بس.. يعنى أنا وانت حضرتك.. وهيكون على هذا المنوال
يبدأ الإعلان بصورة من أعلى على شارع فيصل والعربيات واقفة والطريق مقفول والناس مش طايقة بعض.. والجو رهيب والناس بتقع من الحر
ثم تبدأ لقطات الإعلان
عيل هدومه مقطعة وقاعد يشحت على باب جامع وبيقول للكاميرا وهو بيبتسم: أنا باكره الصيف عشان السبّوبة بتقل
بنت ناكشة شعرها وواقفة قدام الحمام وقرفانة وبتقول: أنا باكره الصيف عشان الميّة بتبقى مقطوعة
موظف فى المترو فى إيده الجرنال ونص كيلو موز وبيضحك وبيقول: أنا باكره الصيف عشان الدنيا زحمة
سيدة عجوزة واقفة فى موقف الأتوبيسات في عز الضهر وبتزغرط وبتقول: أنا باكره الصيف عشان مفيش مواصلات
بنت ستايل فى الجامعة اصحابها مش راضيين يقربوا منها.. بتقول : انا باكره الصيف عشان العرق
وفى الآخر ييجي صوت المذيع: انت كمان انضم لينا عشان تكره الصيف.. انضم لأكتر من سبعين مليون مصرى بيكرهوا الصيف.. وبأقل الأسعار

[Princess maya]

أنا باكره الصيف عشان السبّوبة بتقل

[Young DeviL]

هههههههههههههههههههه نورتي يا مايا وعقبال ما يجي الشتا بسرعه

[بيبيتو]

عندك حق والله الاعلانات بقت مستفزة قوى
تسلمى يا قمر

[Young DeviL]

تسلم يا بيبيتو

[Shi3a]

موضوع جاااااااااااااااااااااااا امد جدااااااااااااااااا
انا بحييكي علي الموضوع ده بجد
مرسي ليكي

يعنى اشمعنى الواد ده ينزل البيسين وانا لأ؟؟ مما سيؤدى إلى إن أنا هاروح افجّر البيسين ده اللى انا مش عارف هوه ايه.. وتكبر المسألة.. وتنقسم البلد فريقين.. فريق اللي عنده بيسين وفريق اللي مش بيستحمى أساسا.. وتكبر الفتنة.. ويظهر فى الخارج فريق: بيسينات المهجر.. وفريق: اتحاد البيسينات.. والموضوع يكبر

[Young DeviL]

العفو نورت الموضوع