>>> لا تتزوجى <<<

**بريق النجوم** · 26 - 10 - 2009, 10:15 PM

السلام عليكم
احم احم
كلامنا طبعا مع البنات وكل رغينا هنا
هقولك نصيحه بودنك يوم ما تقرري انك ترتبطي .. تتأهلي يعني... او حتي تفكري بالمستقبل هيكون شكله ايه
وقبل ما تتخطبي ويجي واحد يعقدك والبنات اصلا متعقده من الي بنشوفه...
فكري كويس مره واتنين وتعالي نحسبها صح

لا تتزوجي
من لا يقرب الصلاه
اذا مش بيصلي وهتعيشي معاه هيعاملك علي اي اساس
اساس الزواج ان يتقي الله فيكي
(طب هو انتي بتصلي؟)

لا تتزوجي
من النكدي
هو احنا ناقصين نكد الدنيا ضحكه وفرفشه مش نكد وخنقه
هتتصبحوا كل يوم بخناقه يعني؟
(طب هو انتي مش نكديه؟)

لا تتزوجي
من المهمل
هيهمل بمشاعرك وبالمصاريف وحتي بنفسه وبمظهره
من الاخر هيكون شكل تاني بعد الجواز لا يطاق بالعربي
(طب هو انتي مش مهمله؟)

لا تتزوجي
من المبزر
هيضيع كل فلوسه اونطه اما دخان او هدوم او منظره كدابه
وناسي ان له بيت وعيله الفلوس دي البيت اولي بيها
(طب هو انتي مش مبزره؟)

لا تتزوجي
من الناقم علي الدنيا
هو احنا ناقصين يقولك فلان وفلان اخدوا منصبي وده معرفش معاه ومعاه
ويحسد خلق الله وباصص دايما لغيره حتي بجوازته منك يجي يقولك
ناس ليها بخت وناس ليها..............
(طب هو انتي مش ناقمه؟)

لا تتزوجي
من دلوع امه
ده كمان مالوش حل يسمع كلام الماما ويجي ينفذ يبقي ماشي ورا كلمه مامته
ولو اخدتي رايه يقول نشوف رأي الماما
وتلاقي اسراره كلها بدل ما تكون معاكي تبقا معاها ضره مستتره يعني
(طب هو انتي مش دلوعه ماما؟)

ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــ

شدينا خط لان الكلام مش هيخلص
قبل ما تفكري بعيوب خطيب المستقبل
نحاول نحسن من عيوبنا احنا الاول
مفيش انسان كامل الكمال لله وحده
قبل ما نحاسب غيرنا
نحاسب انفسنا