انا محتار اوى وتعبان ومش عارف اعمل ايه

[ahmed fares]

السلام عليكم ورحمة الله وبركاته
********************************
انا عندى مشكله وعايزكوا تحلولهالى بعد اذنكوا اعتبرونى اخوكم الصغير بس يا ريت تردوا عليا عشان اعرف اخد قرار
بسم الله الرحمن الرحيم
انا معايا مشكله مع حبيبتى ولسه سايبها وده كله علشان عايز اروح اتقدملها رسمى قبل ما تخش الكليه وعندها فى البيت مش موافقين وبتقولى انا مش بايدى حاجة وانا مش هينفع ما اكملش تعليم , قولتلها طيب ايه العمل من هنا لهنا سيبنا بعض وبعد تالت يوم رجعتلى وقالتلى عايزين نفكر فى اى حل تانى غير ان احنا نسيب بعض واتفاقنا ان بعد سنتين المعهد اللى احنا فيه دلوقتى هتكلم والدتها عليا وانا وعدتها انى هتقدملها ومكنتش عايز العب بيها بجد لانى بجد بحبها موووووووت ورغم اللى عملته فيا بردوا لسه عايزها ومش قادر اشوف ولا اتخيل انها تكون لحد غيرى , المهم انا قابلت امها وكلمتها ولاقيتها مصممه ان بنتها تكمل تعليم ومش هيوفقوا باى حد يتقدملها غير لما تخلص التعليم يعنى استناها اربع خمس سنين الكليه وبعدين اروح اتقدملها وبعدين نتخطب سنتين بعد الكليه وانا مكنتش موافق على الكلام ده لانى مش عايزها تخش كليه الا لما تكون مخطوبالى حتى ولو هقرى فاتحه مش هلبس شبكه على الاقل , وبعد ما قابلت امها , قولتلها انى مش هينفع اكمل معاكى الفترة دى كلها من غير ما اخش بيتكوا قالتلى وانا مش هينفع مااكملش تعليم قولتلها خلاص يبقا كل واحد يروح لحاله , وبعديها سمعت كلام يا ريتنى ما كنت بسمع عشان ما اسمعش الكلام اللى قالته ولا اللى عملته قدامى , مع العلم وديه مهمه للهيقرى الموضوع انها قالتلى انا هضمنلك ان استناك ولما تيجى بعد ما اخلص التعليم وهنفضل نكلم بعض عادى خالص لغايهزى ما احنا وعقبال ما تخلص جيش هكون ليك باذن الله وهقف قصاد اى حد علشانك ومش هوافق باى حد يتقدملى غيرك ومع العلم انى ما خرجتش معاه وله مرة ولا حتى بعد السنتين اللى انا قعدتهم معاها سلمت عليها بايدى لانها كانت رفضه حتى مكنتش راضيه تتدينى صورة ليها الا لما نتخطب رسمى وانا بصراحة مكنتش قادر استحمل الفترة ديه وكمان فترة الكليه معرفش حتى اروح اوصلها فى اى مكان عشان كدة كنت عايز اتقدملها وانا قولتلها هستناكى العمر كله بس على الاقل اخش بيتكوا غير كدة يبقا بنتضحك على بعض , وانا كان عندى راى انها تقصر المسافه بينى وبنها وترضى اهلها ونفسها وترضينى وكانت تخش سنتين جامعة عماليه ويبقا بردوا معاها باكرليوس , على فكرة هى عارفه انها مش هتشتغل بالتعليم , مش عارف بقا فرقه معاها ليه الموضوع ده ,, قعدت تقولى انت بعتنى ومفيش حد يتحب , انت لو بتحبنى كنت استنتنى , انت ما تستهلش والكلام ده كله بس انا كنت مقدر الكلام ده علشان هى عصبيه شويه ومضيقه , بس انا مش شايف انى انا مكنتش بتكلم فى الغلط انا كنت بتكلم فى الصح , كنت حاسس انى كنت عايز احافظ عليها عشان محدش يتكلم عليها كلمه وحشه واكون خطيبها , تانى يوم على طول بعد ما سيبنا بعض راحت وقفت مع واحد عارفه كويس اوى انى بغير عليها منه جدا جدا جدا وقالتلى بعضمه لسانها انا عملت كدة عشان انت اتخليت عنى وبعتنى وعشان عارفه انك ممكن تجيلى فا انا عملت كدة عشان انهى الموضوع واجرحك وكانت عامله الحاجة ديه قصاد عينى يا جماعة وانا كنت بطقطع من جوه وهى عماله تتكلم معاه وانا اللى المفرود ابقا مكان الواد ده , مع العلم ان الواد ده اتخنقت معاه فى يوم من الايام علشان خاطرها ووصلت للضرب وضربنا بعض , بس والله انا كنت ناوى بعد ما رفضت انى اكمل معاه كنت رايح اقولها انا هقف جنبك وهستناكى عشان تحققى حامك وتخشى هندسه , بس لما لاقيتها عملت مع الواد ده كدة بصراحة انا صرفت نظر على انى ارجعلها بس على فكرة هى بتعمل كدة مش عشان بتحب الواد ده , لا ده عشان تتضايقنى انا واثق تماما , بس لاغايه دلوقتى والله عايزها بس مش عارف انا الصح ولا هى الصح انا تعبت كل ما اخد راى حد فى الموضوع ده ناس قالولى انت عندك حق وناس قالولى لو بتحبها كنت تستناها وكمان عقبال ما تخلص الجيش تكون المسافه قصرت شويه بصراحة مش عارف اعمل ايه انا تعبان والله ومحدش حاسس بيا ونفسى ارجعلها بس من غير ما اقل من كرامتى واحنا بقالنا تلت ايام سيبين بعض , وكل ما اخش المعهد واشوفها وقفه مع الواد ده بتعب اكتر وببقا عايز اديها باالم عشان بحبها وبغير عليها , مش عارف اسمع كلام مين الناس اللى معايا ولا الناس اللى مغلطانى وانا قولت اعرض المشكله دى عليكوا يمكن تفيدونى بس بالله عليكوا تردوا عليا انا كدة صح ولا غلط واروح اصلحها ولا لاء, بس انا بجد كنت هروحلها تانى عشان بحبها وهغصب علي نفسى وهستناها عشان بحبها بس قبل ما تستعجل وتستفزنى وتروح تكلم الواد ده , هل ممكن الموضوع يتصلح ونرجع لبعض وهل لو رجعتلها هبقا ضعيف بالنسبه ليها وهقل من نفسى وكرامتى ؟ , ولا هكبر فى نظرها وتتاكد انى بحبها ؟ ولا اخلينى على اللى انا عليه ومكلمهاش تانى ؟؟؟؟ وهى كان كلمها صح لما قالتلى انت بعتنى , وانا كدة بعتها فعلا ؟ ولا انا الصح ؟ وشكرا
ومعلش انا عارف انى طولت عليكوا بس اعتبرونى اخوكم

[عاشقة الرومانسية]

بص يا احمد انا عايزة اقولك ان انت اول موضوع ادخله بعد غياب كبير اوى اوى عن المنتدى
المهم بقا بالنسبة لموضوعك انا شايفه انك مش غلطان ولا هى غلطانة ولا اهلها غلطنين
انت حقك طبعا انك تتضمن الانسانة اللى بتحبها وتدخل البيت من بابه ودى حاجة حلوة طبعاا انك مش عايز حد يتكلم نص كلمة عليها موقف رجولى منك واثبات انك بتحبها
تانى حاجة هى حقها تكمل تعليمها وانها الصورة اللى بتنقلهالك عن اهلها وموقفهم من ناحيه الموضوع ده لانكوا بتحبوا بعض يعنى اكيد هى لو واثقة من موافقه اهلها كانت اديتلك اى امل فى انك تيجى البيت عندها وبعدين هى قالتلك انا مش هوافق على حد غيرك وانها هتستناك لو طالت العمر كله انسانة محترمة وتستحق التقدير
بالنسبة لاهلهاا حقهم ان بنتهم مافيش اى حاجة تعطلها على مستقبلها وطبعا دى من وجهه نظر الاهالى ان اى خطوة فى الخطوبة تعطيل دراسى للبنت وهما طبعا موقفهم ده خايفين عليها وعايزين يطمنوا عليهاا وتخلص دراستها الاول حق اى اهل على بنتهم
بالنسبة بقاا للخلافات اللى حصلت لما اتخانقتوا ده عادى جدا اى كلمة خطأ طلعت منك او منها لان كل واحد فيكم مضغوط انت بتدور على حل يوافق عليه اهلها وهى عايزة برضه حل تقنعك تأجل موضوع انك تتقدم رسمى عشان كده كل واحد اتصرف نتيجة ضغط نفسى بتمروا بيه والانسان مش معصوم من الخطأ وانها تقف مع واحد هى عارفه انك متخانق معاه وبتغير عليها منه ده تصرف طبعا هى غلطانة فيه هى حبت تقنعك بشكل خاطئ انها تعمل كده عشان انت تصرف نظر عن الموضوع ده

حاليا بقا تتصرف ازاى او ايه الحل من وجهه نظرى
طبعاا ارجعوا لبعض وكل واحد فيكوا يحافظ على التانى باقصى ماعنده واهتموا بدراستكم وخدواا الشهاده مش شرط زى ماقولت يا احمد انها مش مهم تكمل تعليمها كده كده مش هاتشتغل ومين اشتغل بشهادته ولا حتى مين اصلا اشتغل ده سلاح بيعتز بيه اى شخص والشهاده مهمه مش تتهاون بيهاا
اثبت نفسك بدراستك وخلص جيشك واشتغل واتقدم ساعتهاا محدش هيرفضك نهائى لانك عملت اللى عليك وخليك يا سيدى عارف ان دى خطيبتك وهى كمان تعتبر كده وتراعى الموضوع ده فى تصرفاتها فى المعهد لحد مايجى الوقت اللى ان شاء الله تكون حلالك ورنا مايحرمكوا من بعض ابداا ويسير لكم الامور ان شاء الله
وعلى فكرة لما ترجهلها مش هايكون غير فى دماغها حاجة واحده وهاتقول الانسان ده بيحبنى اوى مش من اول مطب اتخلا عنى واتمسك بيااا

اثبتلها انك بتحبها واقولها هستناكى العمر كله

[آية الرحمن]

السلام عليكم
بص يا احمد انا مع عاشقة الرومانسية فى كل كلامها هى عندها حق انسى كل الخلافات دى واثبتلها حبك خليك معاها بلاش تتخلى عنها هى لمجرد انها تغيظك راحت لحد تانى ودا ممكن يلعب بيها يبقى انت كدة فعلا بعتها انسى كل حاجة واثبت حبك وحافظ على حبيبتك من اى حد وخليها جوة عيونك لانكم كلكم صح محدش يعرف يغلط حد فيكم يبقى توصلوا لحل وسط احسن كتير من الفراق حافظوا على حبكم بجد
ويارب يوفئق بنكم ويريحكم ويحل كل المشاكل بأذن الله

[ahmed fares]

بصراحة يا جماعة كلامكوا على عينى وعلى راسى بس حتى لو رجعنا لبعض هتبقا بتكلم الواد وهتقولى مش هينفع ما اكلمهوش بعد ما روحت صالحته وانا اصلا انا والواد ده اعـــــــــــداء خالص تفتكرو ان المفروض تقطعه زى الاول على شان خطرى ولا تكلمه ؟ وازاى اقنعها انها ما تكلمهوش تانى ؟

[مونه]

بص يا أحمد المفروض لو انت أسبتلها
حبك وحافظت عليها يبقى المفروض منها هى كمان تعمل كده ومتكلمش الشخص ده خاالص وإنت قولها كده تختار تكلم الولد ده ولا تفضل معاك
وأكيد لو بجد بتحبك هاتعمل اى حاجه علشان حبها يدوم
وربنا يارب ما يحرمكم من بعض

[misterattia]

لو هى بتحبك صحيح وتقدر مشاعرك وصدقك يعنى تقف مع واحد تانى وقدام عينك
ايه الكلام ده يا ابنى اللى بيحب ميكرش وميجرحش انته فعلا انسان نبيل وصادق فى مشاعرك ولكنها لا تستاهل هذه المشاعر ولا تتحجج باهلها او بالظروف الحب لايعرف ظروف واللى يحب ياكل الصخر علشان حبيبه ويستحمل اى شىء وانته بتقول عايز تخطبها عشان كلام الناس وهى الناس كده مش هتتكلم عنها وهى مع الولد التانى يا احمد انت راجل كويس ولكنها متستهلكش
يعنى لو افترضنا انك اتزوجتها وزعلتوا مع بعض هل ينفع انها تقف مع حد عشان تغيظك
طبعا دا كلام فاضى اللى يحب ميجرحش ويصون ميخنش مخطوب او مرتبط او متزوج سيبك منها يا احمد وانت اقوى من تلعب بك مثل هذه البنت المتلاعبه اللاهيه

[احمد محمد كمال]

بص يا احمد انت ترجع للبنت اللي بتحبها وتسيبك من كل المشاكل دي وعلي فكره لو انت لو اللي سيبتها ضميرك هيتعبك ولو هيا اللي سابتك ضميرها هيوجعها ف خليك مع البنت اللي بتحبنها وهيا لو بتحبك هتستناك

[ahmed fares]

على فكرة انا كلمتها وقالتلى انا كمان لسه بحبك بس فى مشكلتين الاولى ان هى قالتلى انا هرجعلك بس انا خايفه منك تسيبنى تانى واتجرح , استنى عليا افكر واصلى استخارة وهقولك , ايه رايكوا استنى لما تفكر ولا لاء ؟ المشكله التانيه قالتلى انت كدة هطلعنى صغيرة مع الشخص ده ما ينفعش اقوله ما تكلمنيش تانى عشان انا اللى روحتله برجلى وصلحته . وممكن يطلع عليا كلام انى بتاعت مصلحتى وشكلى هيبقا وحش . انتوا شايفين من وجهة نظركوا ايه فى المكلتين دوول ؟؟؟؟؟؟؟؟

[smart girl]

بجد انا نفسى ااقول لكل الاشخاص اللى بتتعذب من الحب انا عارفة انة مش بأديهم بس يهونوا على نفسهم ويقتنعوا ان كل شىء نصيب ...يا أحمد كمل جيشك و امشى فى حياتك وانت وصلتلها بما فى الكفاية انك بتحبها وانك عايزها ولغاية أخر وقت
هي لسة هتفكر فى أية بقااااا؟؟؟؟؟؟؟؟؟
عموما متحاولش تعمل اى حاجة تانى وهى لما توصل لقرار فاكيد معاها رقم تليفونك وهتعرف توصلك ..وسدئنى الموضوع فى الاول وفى الاخر بيكون نصيب
ربنا يوفقك

[ahmed fares]

على العموم يا جماهة شكرا شكرا اوى على ردكم للموضوع وانا معلش هقرص على نفسى شويه وهخليها تفكر عشان تيجى وهى راضيه , وانا هستنا عليها بجد اسبوع وبس عشان حرام بجد , انا مش عارف هتفكر في ايه ديه , المفروض اصلا ما تفكرش فى حاجة غير انى رجعتلها ولسه باقى عليها واثبتلها انى بحبها .