تيجوا نتناقش شوية : إيه هو السبب الرئيسي ورا بوزان الجيل ده؟؟؟ اقرا وشاركنا رأيك
السلام عليكم
أعضاء المنتدى الكرام
موضوع شاغل بالي قلت اما اسمع ارائكم فيه
ياترى ايه هو السبب الرئيسي ورا التهمة اللي احنا متهمين بيها كلنا ان احنا جيل بايظ وتلفان :( جيل مهبب ومنيل :(
دايما دايما اكتر جملتين بنسمعهم كلنا بس هل ياترى الجيل اللي قبلنا اللي بيتهمونا بكده فكروا في سبب الحكاية دي او فكروا احنا ليه اصبحنا في نظرهم جيل تلفان وبايظ ؟؟؟؟X-(
بصوا بصراحة شديدة جدا انا شايفة ان الجيل ده عنده وعي كبييييير جدا جدا عن الجيل اللي قبل منه ومقصدش وعى يعني تطور وتكنولوجيا لا لا :) انا أقصد وعي من الناحية الدينية وده نظرا لانتشار الوعاظ طبعا في المقدمة وانتشار القنوات الدينية وغيره وغيره يعني مثلا زمان زمان في الجيل اللي قبل مننا كانوا امهاتنا مش كلهم يعني بس معظمهم بيلبسوا ايه الميني جيب والميكرو جيب والكت والجينز بس بزيادة كبيرة جدا عن دلوقت :->
تقريبا كانوا كلهم الا من رحم ربي طبعا ده بيرجع لقلة الوعي الديني
بس سبحان الله ياربي زمان مكانوش بقا اللي قبلهم بيقولوا عليهم جيل تلفان ولا بايظ بل بالعكس كانوا بيشجعوهم وعارفين ايه كمان انا شايفة انهم كانوا بيصاحبوهم ودي النقطة اللي احنا مفتقدينها دلوقت الصحوبية بينا وبين أهلنا فعشان كده هما حاسيين اننا بعيد اوي عنهم وتصرفاتنا كلها في نظرهم غلط في غلط وكذلك احنا كمان واصلنا نفس الاحساس
لأن معظمنا للأسف معرفتش والدتها تصاحبها ولا عرف والده يصاحبه معرفوش يقربوا مننا صح فبقا كل الكلام الصادر منهم اوامر وبس وشايفين كل التصرفات غلط جدا وعيب :(
أنا متهيألي وفي رأيي ان بعد الأهل عن أبنائهم وبناتهم هوالسبب الرئيسي ورا المقولة اللي دايما بتتردد
بس بجد مع الأسف كتير من أهالينا مقدروش يدونا فرصة نصاحبهم ونحكيلهم بحرية وهما يسمعونا وينصحونا بأسلوب الصديق لصديقه مش بأسلوب الأمر والنهي احنا اكيد عارفين انهم خايفين علينا كتير وقلقانين بس هما معرفوش يوظفوا الخوف ده صح كان لازم يكون في طريقة تانية للتعامل معانا والدخول لنا ولعقولنا غير الأمر والنهي
يعني ندي مثال بسيط : الأم يوم لما تعرف ان بنتها مرتبطة بشخص ما فورا تثور وانتي ازاي تعملي كده وليه وغلط وحرام اه فعلا كلامها صح مية المية بس طريقة الكلام هي اللي غلط يعني هيا لما تثور كده بالشكل ده وجايز تضرب البنت وتحبسها وتاخد منها الموبايل وتمنع عنها النت طب ليه :-/ ما تقربي منها شوية لأن أكيد المشاعر مش هتنتهي بالضرب ولا بالكلام دي مشاعر مش أفعال هنبطلها بسهولة لية الأم ساعتها متقربش من بنتها وتعرف ايه مدى العلاقة دي وتخلي العلاقة دي تحت عنيها وفي ظل الأسرة على الأقل الشاب ساعتها لو بيتسلى هيبان على حقيقته والبنت في الوقت ده هتتعلم من التجربة دي كويس اوي ولو الشاب ده كويس ومحترم اهو برضه هيبان وهتكون العلاقة واضحة وصريحة ومحددة وتكون قدام الاسرة برضه في الحالة دي هتتطمن الأم لأن بنتها مش هتخبي عنها حاجة وهتكون العلاقة قدامها وفي النور وهتكسب صداقة بنتها للأبد لكن للأسف العكس تماما بيحصل فبتضطر البنت تخبي على مامتها ووالدها وساعتها بيحصل ما لا يحمد عقباه ومن هنا بيكون في نظرهم الجيل بايظ وجيل مهبب ومنيل :Dوهما مش عارفين انهم بيكونوا السبب :D
عاوزين نقلهم انه مش بالضرب ولا بكتر الأوامر والنواهي بل بالقرب ايوة بالقرب قربوا مننا شوية واحنا اكيد هنبقا احسن
واللي انا متوقعاه بقا ان جيلنا كله كأمهات وأبهات هيصاحبوا ولادهم وبناتهم فهيطلع الجيل الجاي احسن من الأجيال اللي فاتت كلهااااااااااااااااا ان شاء الله :D:D
مستنية أرائكم ومشاركتكم :)
ولكم منى التحية :)
