موضوع مميز و طرح اكثر تميز...
السلام عليكم ورحمة الله و بركاته...
يشرفنى و يسعدنى ان اول مشاركة ليا فى الكافيه تكون فى قسم المناقشات او الكافية كما هو اسمه;) و تكون فى موضوع حضرتك كمان...
و اسمحلى اتكلم بتفصيل شوية بما ان المجال مفتوح للنقاش طبعا...
المشكلة كما حضرتك ذكرت بتكون فى ان المشاهدات كتير و الردود قليلة جدا، يعنى مثلا بنلاقى 3 او 4 بس اللى ردوا و المشاهدات ممكن تكون وصلت 30 و ساعات 40 .. و ده فى حد ذاته بيكون شئ مستفز فى قسم نقاشى، المفروض ان موضوع طرح للمناقشة و قضية اجتماعية او مشكلة بنتكلم فيها لازم نلاقى ردود من الناس و محاولة للتفكير بالكتابة و المشاركة على غرار مبدا التفكير بصوت عالى:).
فى هنا من اخواتنا فى الكافية ناس قالت سبب و هو ان اللى بيدخل زوار، طيب ده جايز .. بس الاعضاء دورهم ايه؟!!!
المفروض انى كعضو دخلت قسم فى مناقشات يبقى اناقش و اتكلم و اتحاور علشان احسس صاحب الموضوع ان موضوعه له اهمية مش اى كلام، بل و ده ممكن يظهر اكتر لما الاقى الاعضاء اللى دخلوا بيناقشوا بعض هما كمان مش بيكتفوا بمناقشة صاحب الموضوع فقط .. و ده معناه ان الموضوع اخد اهمية فعلية و فى ناس كتير استفادت منه حتى و ان كانوا بيختلفوا فى الراى.
المشكلة ان فى ناس مبتعرفش تناقش و لا تحاور اصحاب الموضوع و بيخرجوا و بيقولوا شكرا علشان صاحب الموضوع مش يتضايق و يكونوا عملوا حاجة .. طيب دى حالة ممكن نلاقيها فى مشاركة و لا اتنين، لكن لما تلاقى الموضوع بحاله مفيهوش غير مشاركة و لا اتنين بس اللى بيناقشوا و الباقى بيقول شكرا علشان بيستسهل و خلاص و عاوز يزود مشاركته .. فهل ساعتها هتكون مشكور او شكرا على الموضوع هى الحل؟!!!:-/
يبقى الاصح و الانسب اننا نقول جملة بسيطة و مفيدة بحيث مش نعمل احباط لصاحب الموضوع من ناحية ولا يكون ردنا شكرا و خلاص و دمتم على كده و المواضيع متاخدش حقها .. و لا ايه؟!!!;)
بعتذر ان كنت طولت فى الكلام بس الموضوع شدنى بجد لانه متواجد بكثرة فى اى منتدى عربى او مصرى .. و اى نقطة انا مش موضحها فى كلامى يا ريت تنبهنى و هكون شاكر ليك.
بشكرك على طرحك البسيط و المميز للموضوع...
محمود...
