غيابه يوم الممات
********
فى يوم من الشهر اللى فات
وناس بتدور عن حافز ومكافآت
غاب عبد الرازق بلا اجازات
والغريب ان غيابه كان يوم الممات
**********
الفجر تلاقيه عالشغل شد الرحال
بعفوية طفل وبعزيمة الرجال
ما يقول دا صعب او دا محال
صابر ويشيل بالصبر احمال
********
كل الورود والخضرة وحتى الشجر
يتمتع بها الموجود واللى حضر
زرعها فى صيف ومطر وما همه خطر
شغله وهو مين كان للتانى بينتظر؟
يارب بجنتك يكون ممن فاز وانتصر
**********
كان ريس حتى بدون عمة
شاكر ربه وحامده على النعمة
شغله كان الابن والخال والعم والعمة
جايب فطاره ويحب الصحبه واللمه
بفاس وبدن مداس شغله كان بهمة
*********
كان بيحلم يعيش بعد المعاش
ويصور افلام دون كاميرا وفلاش
ويضحك فى دنياعن حاجةما شفهاش
وما ندم يوم عن حاجة ما طلهاش
لانه يعرف ان بيت النتاش مايعلاش
********
عالشجر كان بيعلق الهدوم
فى الجنينة ينسى الحزن والهموم
حافى ما يهمه تعبان بنابه بسموم
لانه عارف ان ما فى انسان يدوم
*******
كان انسان ابسط من البساطة
الشاى عنده هو الحلو والشيكولاته
ينام فى ظل شجرة وراسه عالبلاطة
********
مين هيبكى على الصابر اللى راح
لأ بنقول انه من الشقى ارتاح
يارب تكون آخرته سعادةوافراح
*******
الدموع فى عيون زمايله متحجرة
والجنينة من بعده حقيقى متغيرة
وناس كتيرة فى الدنيا متحيرة
من شر لشر وتقول مسيرة
********
خليك مخلص اوعى تكون غدار
الدنيا آخرتها جنة ا و نار
بعملك منهم ايه يا ترى هتختار
اقولك
الدنيا برسيم وبيعشقه الحمار
********
كلمات
عماد الدين محمد عبد المنعم
رثاءا
فى
المرحوم باذن الله تعالى
عبد الرازق محمد وهبه
نسألكم
الدعاء له ولأموات المسلمين
والدعاء لكل مخلص فى عمله
دمتم
جميعا فى حفظ الله ورعايته
