إحنا فقعنا مرارة الريس ....
اه من الاعتقال وسنينه السودا
حد يعرف ان ممكن يتم اعتقالي في اي لحظه
يعني لو حد عرف هيعمل ايه ؟؟
طيب وليه يعتقلوني اساسا؟؟
يمكن عشان لساني طويل شويه
واتعلمت اقول الكلمه القبيحه اللي بتكرهها الحكومه ..اللي اسمها لا
اه من لساني اللي هيوديني في داهيه ده
نفسي حد دلوقتي يضربني ضربه جامده اوى
تعرفوا ليه عشان اقول اه اه اه واتعلم الكلمه كويس وابطل اقول لا
المهم لو اعتقلوني هاتنفخ وبدل ما اقول اه هقول فسسسسسس
عشان كدا لازم ارضي الحكومه وماتكلمش في اللي يزعلها واقول اه
لو قالولي تنتخب مبارك هقول اه ولو قالوا مبارك مش وحش هقول اه
بس خايف اول ما اخد علي الكلمه حد يعمل فيا مقلب
ويقولي الحكومه ظالمه وطبعا هكون متعود علي كلمه اه واقوله اه اه اه
واكيد حد هيعمل كدا انا عارف اللي ممكن يحصل لو الحكومه غضبت علي حد
انا سمعت ان عندهم خزوق كبير مقاس عشرين
وانا مش عاوز اتخزوق اليومين دول كفايه خزوق كل سنه
اه باين عليا هتبهدل يعني.. كان لازم لساني يطول علي البهوات
وعشان ارضيهم هقول تعيش الحكومه اللي مش ظالمه دول قمرات وحلويات وسكر نبات وابوهم السقا مات
واحنا اللي وحشين ومش بيطمر فينا الحكومه بتحوش لينا فلوسنا في سويسرا
بإسم الرئيس شخصيا عشان يضمن ان محدش يطمع فينا وياخدها.. يعيش الرئيس ابو قلب كبير
احنا شعب مش طامران فيه.. الناس بتتعب عشانا واحنا مش هنا
انا سمعت ان الرئيس من كتر التفكير في الشعب اتفقعت له مراره اه
مين السبب في فقع مراره الريس؟؟؟ اكيد احنا اللي فقعنالوا مرارته
فاضل ايه تاني يتفقع بسببنا؟؟ده حتى مجوع نفسه عشنا
الرئيس بياكل اقل مننا... بيفطر بيض ..ويتغدا بيض ..ويتعشى بيض
وهيخلي ايامنا كلها بيض اصل الرئيس بيحب البيض ونفسه الشعب كله يبيض
اقصد ياكل بيض
اه يا بلد ال...
( منقول مما راق لى )
