معلش يا استاذ .. اصل انا فصلت خلاص
قصة خيالية من تاليفي بس ليها هدف.. الحكاية وما فيها .. ان واحنا بنبني العمارة .. بابا كان لازم يتعامل مع الصنايعية .. ففي مرة كده لقى واحد شاب يعني هوا صنايعي كان شغال عندنا تقريبا 25 سنة قاعد في ركن كده http://haridy.com/ib/images/smilies/hlp.gif
* مالك يا محمد قاعد كده ليه ؟
- معلش يا استاذ أصل انا خلاص فصلت شحن النهاردة ....
* عملت ايه ؟
- هنجت معنتش قادر .. معلش يا استاذ مش هقدر اكمل شغل النهاردة
* هنجت ؟؟
- اه خلاص على اخري .. جبت جاز والله ..
* طيب يا بني انا من كلامك فهمت انك تعبان
- فل عليك يا استاذ .. بالظبط كده .. تعبااااااان
* طب قوم روح مش مشكلة نبقى نكمل بعدين
- سلامو عليكو * سلامو عليكو
أنا لقيت بابا راجع البيت مستغرب .. راح مناديني .. تعالي يا روزي .. هيا ايه المصطلحات الغريبة اللي انتشرت اليومين دول بين الشباب ..
- مصطلحات ايه يا بابا ؟؟http://haridy.com/ib/images/smilies/2.gif
* مش عارف انا النهاردة سمعت حاجات غريبة كده .. اشي هنجت على جبت جاز على فصلت شحن .. ده كده الواحد هيشك في جنسيتو انو عربي ..
- لا يا بابا .. ده بقى العادي عندنا .. امال لما كنت في الجامعة كنتو بتتكلمو ايه ؟؟
* سؤال غبي .. كنا بنكلم عربي يا بنتي
وطولت القعدة ولقيت بابا مش مقتنع أبدا بعلم المصطلحات اللي نازل جديد في السوق اليومين دول .. هوا فعلا أقنعني ان اللغة دي ليها تأثير على اللغة العربية وممكن تضعف اللغة العربية عندنا .. ومش عارفة ليه لما سالني : اشمعنى اللغة دي منتشرة في مصر بس ؟؟ ... معرفتش ارد ..http://haridy.com/ib/images/smilies/dntknw.gif تفتكرو ايه السبب في ان اللغة دي انتشرت بين المصريين بس .. بصراحة انا عن نفسي بستخدم اللغة دي .. بس فعلا حاجة غريبة .. لأنها فعلا عاملة زي العلم اللي كل يوم يطلع جديد .. لسة اول امبارح كنت متخانقة مع واحدة فصاحبتي بتقوللي : يا ستي .. كاف جيم ..
قلتلها : نعم يختي .. دي جبنة أريش ولا دوا كحة ؟؟
قالتلي : لا يا جاهلة .. كاف جيم يعني ( كبري الجمجمة ) http://haridy.com/ib/images/smilies/...ones_nose2.gif
أنا بصراحة استغربت .. للدرجادي مش عاوزين نكلم وبنختصر .. ده احنا شعب ابتلينا بالكلام .. كل من هب ودب بيتكلم في اي حاجة وفي كل حاجة .. انما حكاية كاف جيم دي لسة جديدة .. تفتكروا ايه عواقب المصطلحات دي على اللغة العربية ذات نفسها ؟؟ وده يطلع مين بسلامتو اللي اخترع المصطلحات دي وراح الشباب كلو جاري ورا زي ما يكونو بيشترو كيلو لحمة .. لأن الموضوع انتشر بصورة فظيعة وبسرعة جدا .. وحكاية كاف جيم ( ك - ج ) و به ألف ( ب - أ ) دي على فكرة حاجة من ضمن الحاجات اللي بيخلينا نستهيف شباب اليومين دول . .. وعلى فكرة ( ب - أ ) يعني بطلي استهبال .. من باب إثراء المعلومات ..
ايه رأيكو انتو
