الجامع والكنيسه من زمان العشره بينهم
المسلم والمسيحى دايما حبايب طول سنينهم
الحب والتعاون كان ف دينا وكان ف دينهم
واثقين ف بعض مفيش شكوك قاتلين ظنونهم
الاتنين موجودين ف مظاهرات ده مش عشانهم
عشان عشرتهم ووحدتهم عشان وطنهم
اصحاب وجيران ومفيش سؤال هو انت منهم؟
لو غاب حد لحظه التانى يسال هما فينهم
قران وانجيل دايما حاكمهم وده قانونهم
هلال وصليب ف دايره واحده لو زاد انينهم
زمان سؤال انت مسلم ولا مسيحى كان مفيش
بيحبو بعض والحب كااااااااان مبينتهييييييش
بيدافعو عن بلدهم الاتنين ف الجيش
عايشين يقسمو مع بعض رغيف العيش
كريستينا كانت تروح لفاطمه وتقولها ليه مبتجيش
احمد وجرجس زى السمك لو طلع م الميه مش بيعيش
ف زمنا ده لو شوفتهم مع بعض تعملهم تشبيه وفيش
بقت حاله نادره وغريبه عايزينلهم صورة ف افيش
يا ناس هو الرسول مش كان وصانا ع الجيران
مفرقش بين مسلم ومسيحى قال كلنا اخواااااان
قال كل واحد على دينه وليه الاماااااااان
وكلنا نعامل بعض برحمة وحب واحسان
سيدنا عيسى عمره ماكان هيحط بينا خراسان
والعدرا كانت هتنشر خير وحب وعدل وحنان
المسلم كان بيزور المسيحى هو وتعبان
والمسيحى كان بيطلب منه يقراله قران
كانو بيفطرو مع بعض ف شهر رمضان
حاجات جميله ومعانى حلوه كانت زمان
راح فين كل الحب ده والمشاعر والاحاسيس
ليه كل مكان بنلاقى فيه ماكر وخبيث
ليه كل واحد دلوقتى بيزرع جواسيس
وده اكيد اللى كان بيتمناه استاذ ابليس
فين لما المسيحى كان بيمسك معانا الفوانيس
والمسلم كان ف الكنيسه يقعد جنب القسيس
وف الغربه كان كل واحد للتانى ونيس
ولو مات حد منهم بيخلى التانى ليه وريث
مشاكلهم بيحلوها بايديهم مش بالبوليس
ولو كان فى فرح بيكون الكل فرحان وبيهيص
الحل ايه ياخلق هوو؟ ولا هنعمل معركه اهليه
بدل مانكون ضد العدو تبقى الحرب مصريه
لازم ننهى الخلاف ده لوكان موجود ونشيل الحساسيه
لازم نسامح ونرحم وهنشوف نتيجة مرضية
الحل نرجع ليالى زمان ونبعد العصبيه
ونمد ايدينا لبعض من تانى وبلاش العنديه
والكل هيضربلنا تعظيم سلام واجمل تحيه
وبكده هنكون حلينا اصعب واول قضيه
وبلدنا يخف مرضها وازمتها القلبيه
وترجع تانى مصر احلى واجمل صبيه
انا كتبت الشعر ده قبل احداث الاسكندريه وحتى قبل احداث نجع حمادى
سبحان الله ربنا يبعد عنا العنف والارهاب والحاجات اللى انتو عارفينها
