مقدمة البرنامج ضيف كانت ناوية تعمل من وراه فرقعة....أو تثبت أنها غير كل القنوات
والبرامج اللى استضافته وأسلوبها يختلف ويتغير ويتميز...فركزت أوى أوى على
الجانب الشخصى والأسري واستعانت بزوجته وأبناوءه للظهورفى الحلقة بدون أى
مناسبة مع ضيفها اللى كان حديث الساعة فى الشهورالماضية....فخرج اللقاء مشوها
ومفتعلا وزى اللى مرسوم بالقلم والمسطرة....و كانت مع....طلعت السادات
ورغم لكنة السخرية فى معظم كلامه....لكن اللكنة دى هى اللى شدتنى أنى أكمل معاه
لحد ما دخلوا فى العوائيليات وبطلت أتابع
اللى قاله طلعت السادات باختصار وكان السبب أنه قضى 272يوم فى السجن
العسكري....يتلخص فى الاساءة للقوات المسلحة واتهامها اما بالضلوع أو المساعدة أو
تسهيل اغتيال عمه الراحل الرئيس أنور السادات....وغنى عن التعريف حدوتة اسقاط
عضوية البرطمان الموقر عنه
وما يلي هى النقط اللى شدتنى جداااااا فى كلامه
1-رفع ايديه زى اللى بيسلم نفسه أو بيختم بالعشرة وقال....القوات المسلحة ناس مية
مية
2-قوات المسلحة هم درع الوطن وسيفه وحمايته
3-القوات المسلحة رائعة...والجيش قلبه كله رحمة وخير
4-السجون العسكرية كلها معاملة انسانية ولا تتمتع الا بها
5-الأكل كان أما فراخ ..وأما لحمة...وأما هامبورجر...والأهم هناك طريقة صناعة الأكل اللى أنا شفتها بنفسي ومش عاوز أبالغ لو قلت (أن المشير بنفسه أعطى التعليمات بعمل الأكل على أحدث مستوى آدمي)
6-المعاملة مع نزلاء السجون العسكرية فوق الممتازة....العيال كانت بتقول للمأمور يا
بابا فوزي...وبالنسبة لى كان أخ وصديق....وعقبت زوجته قائلة...طبعا السجون
العسكرية يتختلف عن السجون العادية لأن نزلاء السجون العسكرية كلهم من الناس
الكويسة والنخبة والمحترمين...على عكس السجون التانية بتاعت المجرمين والحرامية
والحثالة....علشان كدة بيعاملوهم هناك كويس أوى ومعاملة فوق
الآدمية....(هااااااااااة....ي� � بختهم)....وكان كل ما طلعت السادات يحاول يلبّخ فى
الكلام زى ما حصل فى القاهرة اليوم مع عمرو أديب واللى بسبب التلبيخ دة اتحبس
التسع شهور وشوية.....تكح المدام وتتنحنح أوى علشان يفرمل لسانه أول ما بدأ يعك فى سيرة أحمد فتحى سرور ورضوخه لضغوط عز و شركاه فى المجلس ....لحد ما
مقدمة البرنامج والمعدين لاحظوا فقطعوا الكلام والنحنحة والكحة.... ونزلوا باعلانات
عز الدخيلة على طووووووول....والسويدى وسيراميكا رويال وخلافه
7-سيادة الرئيس يشكر والله....وسيادة المشير كتر ألف خيره
8-السجن العسكرى فيه كباين ميناتيل...وأى حد يقدر يتصل ويتكلم لو معاه كروت
الاتصال...مش ميزة ليا انا بس يعنى....ماعرفش بقا السجون العادية فيها
اية؟؟...(قال يعنى مش عارف بجد فيه ولا مفيهوش)....حكم
9-ميزة السجون العسكرية أن الكل متساويين....التخين زى الرفيع
10- أنا نصحت النواب بدخول السجن العسكري....لتغيير الجو والنقاهة...دة انا كنت
كل يوم بأروح الجمانيزيوم هناك...(الجملة دى كانت ردا على جملة خفيفة الدم والروح
لدرجة تفقع المرارة الحصينة.... قالتها مقدمة البرنامج بأن السكر وضغط الدم اتظبط
على طلعت السادات فى السجن العسكرى)...وعجبى
سجلت الكلام اللى شد انتباهى....والباقى تابعته لحد قبل الدخول فى المهاترات العائلية
اللى لا تخص المشاهد لا من قريب ولا من بعيد....وقعدت أعيد وأزيد فى قرايته
وأنا رايحة أنام...حطيت راسى عالمخدة...وبصيت لسقف الأوضة وبحلقت فى السقف
أوى زى اللى مشتهى حاجة من الدنيا
ولقيتنى رفعت ايدى للدعاء و بأدعى ربنا من نخاشيش قلبى وأقول
اللهم أرزقنى زيارة سجننا العسكري ومتعنى بلذة النظر اليه
أنا وأمة المصريين الفقراء المحرومين من اللحمة والفراخ والهامبورجر والميناتيل
والجيمانيزيوم.... جميعا يااااااااارب العالمين
اللهم تقبّل....اللهم استجـــــــب
