من الشعب الطارئ الى الرئيس الطارئ
مبروك يا جماعة احسن مفاجأة مجلس الشعب قاصدى مجلس النظام وافق يجدد قانون الطوارئ لمدة عامين .
بس اناعاوزة افهم حاجة هو يعنى ايه طوارئ ، أصل انا أخدت فىالمدرسة إن الطوارئ كلمة معناها حاجة عارضة . انا طبعا مش باعترض ، لان ده قانون كلنا اتربينا عليه و بقى عِشرة بس انا حابة افهم و بس .
عموماً انا عاوزة أسأل اسئلة بريئة جداً مش قاصدى حاجة منها خالص ، الرئيس اللى مش قادر يعيش لمدة سنة واحدة من غير طوارئ ده معناه انه عارف ان الشعب مش طايقة و انه كاتم على نفسنا ، الرئيس ده مُصْر يقعد ليه و هايفضل كاتم على نفسنا لأمتى ؟؟و بعدين احنا بقالنا 27 سنة طوارئ و مع ذلك لسه فيه تجار مخدرات و لسه فيه حرامية و الا هو القانون معمول علشان يحمى الناس دى ؟ و سؤال تانى معلش هو ليه بيسموه قانون طوارئ ما يخلوه قانون عادى ، اه انا نسيت ما هو فيه قانون اسمه قانون الارهاب اللى ان شاء الله هايطبق على نفس المعارضين .
يا عالم يا هو نفسى اعيش زى اى حد امشى فى الشارع ما أحسش ان اى ضابط ممكن يوقفنى فى الشارع و يدخلنى الحبس لمجرد اشتباه .
نفسى اقف مع اصحابى اكتر من خمس افراد و ما نبقاش مهددين بتجمهر.
نفسى اعمل مظاهرة سلمية اعرض فيها طلباتى من غير ما أخاف .
نفسى ابقى زى اى شعب فى العالم عايش من غير طوارئ .
من الآخر نفسى ابقى حرة فى بلد حر يطبق قوانين عادية .
نفسى اعيش زى كل الشعوب اللى عايشة من غير طوارئ ، الطلب ده صعب ؟؟!! ما أعتقدش .
