المشاركة الأصلية كتبت بواسطة ekrammegawer
مكر الستات
ياللي بلغت الشباب ونويت تحب حريم
إسألني عنهم دا انا بيهم خبير وعليم
الآية قالت عليه كيدهن عظيم
معناها صنف النسا خاين الهش أمان
الواحدة منهم تحبك تبقى تجري وراك
وان كان سكنه الهرم في القلعة تستناك
وتقول بحبك بشدة وقلبي داب في هوالك
وكل يوم تشتكي م البعد والحرمان
إن غبت عنها يومين خد منها ميت تليفون
يظهرلك إن غرامها ليك غرام بجنون
واحسن حكاية حداها قصة المأذون
وازاي نجيب الدبل ونفصل الفستان
تفضل تقولك بحبك حب من قلبي
ما اقدرش افارقك عايزالك تكون جنبي
لو بس حبك يوازي العشر من حبي
ماتنامش ليلك وتشوف العذاب ألوان
جوزين كلام من كلامها يدهنوا البلاص
وتقول دي دابت في حب وانتهينا خلاص
قلبك يميل بالقوي وتحبها بإخلاص
وتلاقي نفسك في دوامة وبحر ملان
عرفت بمكر ودهى ترميلك السنار
شبكت به قلبك وقادت فيه حرقة نار
وتشوفك إنك بقيت مطوي مع التيار
تنسى اللي قالته وتتلوى ولا التعبان
تبدأ تسوق في الدلال والتقل صنعتهم
تمنع تقابلك ودي أفكار بتاعتهم
دي الجنة شوف وسعها ملّت مساعتهم
إزاي ح تقدر عليهم إنت يا غلبان
تطلبها عشان تقابلك لأ مانيش فاضية
عارفه إن سكينها صبحت ع البعيد ماضيه
فاهمة إن عدم المقابله ضربة ليه قاضية
بتخلي عقلك يطير وتشعلل النيران
وبعد أسبوع تقابلك ربع ساعة وبس
وتقولك وحق الغلاوة جاية دس ف دس
لو كان أخويا لمحني ولا بيا حس
كان لمّ عيلتي وكانوا اتفرجوا السكان
يثبت كلامها إن البنت من عيله
ومش ح تقدر تقابلك بعد دي الليلة
فضلت وراك بالخداع والمكر والحيلة
لما وقعت في غرامها واللي كان أهو كان
وتقول دا واحد مدير شركة جاي يطلبني
ورفضته عشانك انت وربي يحاسبني
عجّل بسرعة وتعالى لبابا واخطبني
علشان نلم الشمل والعيشة تبقى أمان
تضطر تاخد لابوها ناس وتتورط
وهو يقعد على الكنبة ويتشرط
ويدوس عليك بالقوى يشد ويربط
دول جوم لبنتي خمستاشر من الأعيان
الشبكة تيجي وتتدبر في باقي المهر
بعديها كتب الكتاب والدخلة في نفس الشهر
وخلاص بقيت في العسل وتقول صفالي الدهر
وبعد شهر العسل كل المخبي يبان
من بعد شهر العسل يتغير الإسلوب
وتلاقي نفسك في دربكة وحال مقلوب
وان يوم لسانك غلط أهو هوّا دا المطلوب
تعمل لك خناقة وتبرز لك بألف لسان
تقوم م النوم لشغلك والمدام نايمه
وإن قلت قومي تقول لأ مانيش قايمه
عايزه تخانق وبايته للخناق هايمه
وانت تخاف م الفضيحة ولمة الجيران
تحمل كلامه وتقول الصعيب بيهون
عشان أنا لسه طالع م الجواز مديون
لحسن تزيد الحكاية وصنفهم مجنون
تاخد حاجتها وتترك لي المكان خربان
تبقى انت في الشغل والهانم بتتفسح
عارفه ميعادك تشبع لف وتروّح
تسيب سريرها وفوق الأرض تتلقح
وتروح تقول دا جسمى م الشقا همدان
في أول الشهر تاخد منك المصروف
وتلف شيكوريل شملا مع معروف
جميع محلات فؤاد سليمان شريف بتطوف
مايهمهاش إن فوق راسك متين ديان
ترجع م الشغل تلقى البهجة محطوطه
فستان وجزمة وقميص للنوم وكام فوطه
ودي حته تنفع جونيلا من حدا طوطه
ودا جوز شراب ليك ولكن في الحقيقه جنان
وإن قلت ليه كل دا ماكانش له لزمه
وانتي عارفه إننا طالعين من أزمة
تثور في وشك وتضرب روحها كام جزمة
وتقعد تعيط وتنعي بختها الندمان
محمد محمد مجاور
