الرقم الغريب إلي اتصل بيا !! ( مقال الأسبوع )
في الصحراء بين قطيع غنمي وفوق حماري كنت جالس وممسك بعصا طويلة أضرب بها على ظهر الحمار كي يسرع في المشي . . . وفجأة يقطع المخرج التصوير ويقول : هايل هايل اوي يا احمد .. انت صح انك ممثل مبتدئ لكن أنا بشهدلك بمستقبل جميل في التمثيل ...
في هذه الأثناء يدخل زميل لي ويحمل موبايلي ويقول : موبايلك بيرن يا احمد ...
أخدت منو الموبايل فإذا بالمتصل رقم غريب !!!
أنا : ألووو !! مين ؟؟
المتصل : ألو ازيك يا احمد ...
أنا : مين حضرتك .. بس الصوت ده مش غريب علي دا شبه صوت جدي الله يرحمه ...
المتصل : ما أنا فعلا جدك يا لوح ...
أنا : إزاي !!!!!!!! جدي ميت من 10 سنين !!!!!!
المتصل : يا لوح أنا جدك بأمارة يوم المستشفى لما خبطت العربيه عندها ومحدش عارف غيري أنا وانت ...
أنا : ايوه ايوه ... بس انت ميت بتكلمني ازاي ..
المتصل : من موبايل واحد جاري هنا في القبر ...
أنا : اااااااااااااه وانت ايه اخبارك .. واحشني اوي يا جدو ...
المتصل : انت اكتر والله يا ابو حميد .. بس قولي ايه اخبار والدك ووالدتك واخواتك ؟؟
أنا : كويسيين اوي ... المهم انت عايش ازاي .. قصدي ميت ازاي ..
المتصل : ميت ايه يا حمار دا انتوا الي أموات ... مهو جاري ده لسه جاي قريب وحكالي على حال الدنيا عندكو .. انتوا مش لسه برده مبارك ماسك مصر ومش لاقيين تاكلوا ومفيش عيش وعندكوا غلاء أسعار والحياة بقت تقرف ..
أنا : الله يرحمك يا جدو دايما كنت تعرف الاخبار اول بأول كده ..
المتصل : الله يرحمك انت ويرحم مصر كلها ..
أنا : طيب مقلتليش انت ايه اخبارك ..
المتصل :يوووووووووه اقولك ايه ولا ايه دا انا مرتاح اوي ونايم في حته دفا وحلوه والمكيف شغال تمام ومبيعطلش وكل حاجه ببلاش ..
أنا : يا حظك يا عم .. واحنا الي قرفانين هنا ومش لاقيين ناكل والبلد كلها بدأت تشحت بس من مين يا حسره دول بروحوا يشحتوا عالحدود ..
المتصل : ولد ..بص ..لو مش عاجباك العيشة عندكوا أنا عندي قبر لقطه قريب مني ومن امي وابويا الله يرحمهم وباصص على شارعين .. فكر وردلي خبر ... قبل ما يروح .. دا كان فيه قبر لازق فيا كان نفسي يبقى من حظك ونصيبك بس الراجل الي شتم مبارك في التلفزيون الساعه 7:00 في البرنامج أخد القبر الساعه 7:05 وقبل حتى ما يكمل البرنامج ..
أنا : ااااااااااااه مهو مكملش على فكره و مذيع تاني الي كمل ...
المتصل : مهو التاني برده جه الساعه 7:10 بعد ما سأل المخرج عن صاحبه .. اوعى يله شطانك يوزك وتقول كلمه صح عن سيادة الريس ..
تيييييييييييييييييييييييي ييييييييييييييييت ينقطع الخط
( وجهة نظر )
