قصة حب جميله...بليييز عايزه اسمع رأيكم لاني متردده
انا عايزه احكيلكو عن قصة حب بجد جميله ... كلها مشاعر واحاسيس صادقه... والموضوع عني.
انا حبيت واحد من وانا لسه عندي تسع سنين..طبعا ممكن مش تصدقوا بس بجد انا مش بهزر ،اسمعوني وانتم تعرفوا.
من اول مره شوفتوا فيها وانا حسيت نحيته بحاجه..في الاول قلت دا عبط وانا لسه صغيره وبعمل زي البنات وبقلدهم وخلاص.المهم اني فضلت احبه بردو وكان دايما في بالي ومكنتش بنساه لحظه..قاعدت في حبه ده لوحدي سنيييين ومن غير ما احكي لحد حاجه ولا لمحت له باي حاجه ..مع اننا نعرف بعض وكنا بنتقابل كتير بس انا عمري ما بينت قدامه حاجه لاني كنت شايفاه عادي جداا معايا..في الفتره اللي فضلت احبه فيها مع نفسي اتحبيت مرتين من ولاد تانين ...كانوا ظراف اوي وحبوني بجد وانا كنت مصدقه مشاعرهم نحيتي...بس لاني قلبي مش بيفكر في حد غير (m) فا كنت رافضه اني احب اي حد تاني حتى لو مقلتلوش لـ(m) اي حاجه وفضلت ساكته ...كنت مخلصه له اوي في حبي ليه..لدرجه اني خسرت اعز صديق عندي عشانه.المهم اني قعدت فتره كبيره متلعقه بيه رغم اني مكنتش بشوفه كتير لانه كان دايما بيسافر.. وحتى لما كان يرجع كنت انا اللي ابقى مسافره...بس بردو كان عقلي وقلبي مش شايفين غيره.
وبعد فتره عرف اني بحبه..وانا اللي رحت قلتله..بعد ما كنت تعبت من الفراغ اللي انا عايشه فيه ده..وهو سمعني وصدقني وحس بكل كلمه قلتها..وطلع هو كمان حاسس من نحيتي حاجه..ويوم بعد يوم من كلامنا مع بعض بدأ يحبني وكل يوم يفوت يحبني فيه اكتر من الاول...وعشنا مع بعض اجمل قصه حب في الدنيا..الحب الصادق المخلص اللي بجد اللي انعدم الايام دي ومبقاش موجود..احنا رجعناه تاني..وحبينا بعض اوي اوي فوق ما تتخيلو ...بقيت بخاف عليه اكتر من نفسي ومستعديه اضحي باي حاجه في الدنيا عشان حبي ليه..ومكنتش عايزه اي حاجه غير اني اكون معاه وبس ...حلمنا نكون مع بعض لحد اخر يوم في عمرنا وعمر ما في اي حاجه تحاول تفرق بينا..كانت كل ثانيه بتعدي كان هو بيبقى معايا فيها بقلبه وروحه..كل حلم حلمته هو شاركني فيه..باختصار بقينا ملناش غير بعض.
ولاني مصدقه ده حاولت اني اعترف لوالدتي بكل شىء ..وقلت لها وهي فهمتني وقدرت مشاعري انا وهو ..بس قالتلي بلاش تعيشي نفسك في حلم انتي عارفه انك هتصحي منه..انتي لسه صغيره ومفيش حب للي في سنك ده...واتاكدي انك بكره نظرتك في الحب هتتغير وانك ممكن تقابلي حد تاني وتعجبي بيه ..وبكره تقولي ان كل ده كان لعب عيال وهزار مش حب..انتم مش لبعض ولازم تفهمي كده..في الاخر كل واحد هيشوف حياته ..مفيش حب بيستمر للاخر ويعيش كتير لازم هينتهي يا إما منكم يا إما من اهلكم..بس لازم تتاكدي ان دي فتره وهتعدي.
الكلام ده بردو سمعتو من خالي ومن كل صحابي..كلهم قالو نفس الكلام....بس انا حاسه من جوايا ان عمري ما هتغير من نحيته ولا هنساه لاني بجد بحبه.. ومش شايفه حد غيره لا دلوقتي ولا بعدين...انا واثقه في حبينا ده اوي عمرى ما هتخلى عنه مهما حصل..لاني لو ضيعته صعب الاقي زيه تاني.
فا كنت حابه اسمع رايكم في الموضوع ده .. وكل واحد يقولي وجهة مظره..واي حاجه عايزين تقولوها يااااريت تقولوها...حتى لو كان نفس رايهم بس انا عايزه اعرف ردكم ايه.
