ليه يعنى كده هما مش زينا؟؟!!
أيوه ليه يعنى كده.ليه الواحد أو الواحده
لما يكون ليهم قرايب بيشتغلوا فى النظافة
اللى هما يعنى (عمال البلديه)بتستعرو منهم
علشان يعنى وظيفتهم ويسلام لو الواحد أو الواحده
ماشيه مع أصحابها وبالصدفه شافت قريبها ده وقت
شغله ماسك المكنسه وعمال يلم فى الأوساخ تلاقيها
وشها جاب الألوان الطبيعيه كلها من كتر الخوف
والدم نشف فى عروقها لحد من أصحابها يعرفو إنه قريبها
ليه يعنى كده؟
مش هما برضه ناس زيهم زينا؟
مش لحم ودم زينا برضه؟
مش عندهم إحساس ومشاعر وكرامة؟
مش عندهم كمان عزة نفس؟
دول كمان عندهم شرف وأمانه فى الشغل عننا؟
ليه يعنى كده؟
بس علشان بيشتغلوا فى البلديه؟
أيه يعنى عيبهم.والله ولا حاجه
يعنى كده أحسن ولا يسرقوا وينصبوا على الناس؟
والله هذا حصل أمام عينى!
كُنا ماشين مره مجموعة بنات مع بعض ومن ضمن البنات
واحده والدها من عمال البلديه وإحنا أغلبنا عارفين
والدها بس كان فيه بنات مش عارفها فلما شفنا والدها
حبينا نقولها بس والله بنيه عاديه يعنى راحت البنت صرخة
فينا وقامت قايله ده مش أبويا ولا عايزه أعرفه
والله بنفس الكلمه والحرف كده.
سبحان الله ولا حول ولا قوة إلا بالله العلى العظيم.
ليه كده يعنى؟
علشان بينظف بلدك؟
علشان بيجيب فلوسه بعرق جبينه؟
علشان بيصرف عليكى وبيكبرك؟
علشان بديكى فلوس تخرجى مع أصحابك؟
وبعد كده تتبرى منه قدامهم؟
علشان بيلم وساخه من على الأرض؟
إنتى وأصحابك أصلاً اللى عملتوها؟
بجد بجد حاجه محزنه للغايه.
طيب لو أنت أو أنتى كان فيه حد قريبكم كده
كنتم ها تعملوا أيه لو قابلكم مره بصدفه
وقت عمله وكان معاكم أصحابكم؟
ياترى؟
هاتلف وترجع من شارع تانى ؟
ولا هاتعمل نفسك ولا كأنك تعرفه؟
ولا عادى ها تكلمه وترحب بيه قدام أصحابك؟
بالله عليكم عايزه الردود بكل صراحه
وبكل مصداقيه ماشى
وكمان بكل واقعيه
