سرسوب شجن .. أحمد سعيد موسى
سرسوب شجن
.....
..
العيب ف مين يا زمن ؟؟
متقول وريحنــي
أنــا ليـه رخيـص التمـن
والكـل يجـرحنـي
أبكـي بـدمع النـدم
علـى كـل ثـانيـة تفــوت
وبــرضـه رغــم البكـا
الليــل يمـرجحـنـي
...
يــا قلبــى ليـه الهـوى
خاصـم حدود الباب
وانت اللى بعت الهوى
للقرب والأغـراب
الليـل حضـن سكّتك
مطرح ما تبقى يكون
عايش غريب دنيتك
مدبوح من الاصحاب
...
عدى النهار مالقاش
لون الخضار ع الأرض
شاف الدمار بالطول
شاف الصفار بالعـرض
اتخــض بــص لفــوق
جــوه السمـا مكتـوب
حتمـا دا يبقـى مصيـر
كـل اللي ضيّع فرض
...
سرسوب سنين الهنا
إتسرسبت وخلاص
أبكـى عليّــا أنـــا
والا علـى الإخــلاص
أزرع تقــاوي الدفـا
الشمـس ترمي جليد
والضهـر ييجي الليل
من سوّ فعل الناس
...
إيـاكي تبـدي النـدم
علـى اللي عـدّى وراح
قلبي اللي كان لك وطن
فاتح حدوده بـراح
بعتيـه فــى قلــب مــزاد
من غيـر ألا أونا
سيبتيــه مـع الأمـوات
وياريته حتي ارتاح
...
منتــش خـلاص ليـا
ولا كنت انــا ليكـي
الجــرح كـان فيّــا
والطـعنــه بــإديكــي
لملمــت ورق التــوت
وغــزلتلك تـوبك
ما لقيتى من صُحبتي
غير دمي يرويكي
...
متجيـش تنـوحي بقـى
حبل الأمان اتقصّ
حبـك ضـلام ف ضـلام
قـدام عنيّـا اترصّ
شـوفتك يـا خاينـه معـاه
والقلب لما حـنّ
وزعته بين السكك
على كل ناصيه فصّ
...
يـا هم فـارق بقى
وارحـل وشوف غيـري
مليت خـلاص الشقى
والنوح على طيري
دنـا قلبـي لسـه خضار
مش قد صد الريح
والحلــم لســه بسيــط
محتــاج لتفسيــري
.......
..
بقلم / أحمد سعيد موسى
