فى بلد تشبه بلادنا ذهب جحا بعيدا هناك
وجلس على شاطئ بحيرة راكدة معصوب العينين
تارة يبكى وتارة يضحك
ثم يردد بصوت خافت كأنه يحدث نفسه فكانت تلك الكلمات بعنوان
جحا وبيسألونى
**********
بيسألونى ايه سبب الشكاوى و الصراخ
قلت لأن الفساد كتر وكبر وشاخ وباخ
وناس دايما بتنهب لحد ما جالها انتفاخ
وناس محرومة نسيت طعم اللحمة والفراخ
عرفتم سبب الشكاوى وسبب الصراخ؟
*********
وبيسألونى ليه يا بويا شايل هموم ؟
قلت شايف غنى بيبنى بأسمنت مدعوم
وغلبان فى عشه بيحلم بسقف مخروم
وناس كرهت حياتها وبتبيع الهدوم
وتشترى جاز او تغرق او تشرب سموم
عرفتم ليه ابوكم شايل هموم ؟
************
بيسألونى ليه دمك علطول محروق
قلت غابت الأمانة فزادت بينكم الفروق
وبتضيع على الغلابة كل يوم الحقوق
حتى الفن فى المتاحف مهمل او مسروق
وناس بتمص الدم وبتقطع كمان العروق
والسفينة هتغرق لو زادت الشقوق
عرفتم ليه علطول دمى يا ناس محروق؟
**********
بيسألونى ليه العيشة ما عادت تلذ
قلت رقاصة ملايين بتاخد لما الوسط تهز
وعقود فاسدة لناس عشان تعيش فى عز
وناس بتشتهى سمك وبط او طعم الوز
عرفتم ليه طعم العيشة ما عاد يلذ؟
*********
بيسألوني ليه فى بلدنا عشرة مليون عاطل
قلت السلطة مع المال فى جواز وباطل
وفلان بالروتين بيراوغ وكمان يماطل
ويمضى عقود بسرعة قال القانون عنها باطل
عرفتم ليه فى بلدنا عشرة مليون عاطل؟
********
بيسألونى هتقول ايه للى زيك غلبان
قلت هدعى من قلبى على ابو سليمان
اللى باع اراضينا بالتخصيص زمان
يارب يكون آن خلاص الاوان
وينور السجن مع معارفه كمان
عرفتم هقول ايه للى زيى غلبان؟
********
بتسألونى هتهاجر وتبعد وعننا هتطير
قلت كان نفسى أغرد مع العصافير
بس خلاص أملى أربى ابنى الصغير
وبدعى من قلبى ربى كتير
يحميكى يا بلدى ونكون فيكى تسعين مليون غفير
********
بس اوعوا يا ناس لما تيجوا عليا تهلوا
حتى لو نسيتم طعم الكندوز او البتلو
هوصيكم واقول اوعوا تزهقوا او تملو
كفاية رغيف عيش فى الشاى نبلو
بس ندعى كل فاسد ربنا يهدو ويشلو
وهنشجع المنتخب ونختلف حول عقد جدو
************
كلمات م/ عماد الدين محمد
وآسف للاطالة
فقد قال جحا الكثير وحاولت الاختصار
دمتم جميعا فى اطيب حال
